ޑައުނިން ސްޓްރީޓްގެ ފްލެޓު މަރާމާތުކުރުމުގައި އިނގިރޭސި ބޮޑުވަޒީރު ބޮރިސް ޖޯންސަން އަމަލުކުރައްވާފައިވަނީ ގަވާއިދާ ޚިލާފަށް ކަމަށް ކުރެވޭ ތުހުމަތުތައް އޭނާ ދޮގުކުރައްވައިފިއެވެ.
ޑައުނިން ސްޓްރީޓްގައި ހުންނަ ބޮރިސް ޖޯންސަންގެ އެޕާޓްމަންޓުގެ އާބާތުރަފިލުވުމަށް ދިޔަ ޚަރަދުތަކަށް ފަންޑު ކުރެއްވި ބެހޭގޮތުން ސީރިއަސް ތުހުމަތުތަކެއް ކޮށްފައިވާތީ އެކަން ހިނގިގޮތް ރަސްމީ ސިފައެއްގައި ތަހުގީގުކުރުމަށް ސިޔާސީ ޕާޓީތަކާއި އިންތިޚާބުގެ ޚަރަދުތަކުގެ ކަންކަން ބަލަހައްޓާ އިލެކްޓޮރަލް ކޮމިޝަނުން ވަނީ ނިންމާފައެވެ.
އިނގިރޭސިވިލާތުގެ އިލެކްޓޮރަލް ކޮމިޝަނުން ނެރެފައިވާ ބަޔާނެއްގައި ވަނީ، އެޕާޓްމަންޓަށް ޚަރަދުކުރުމުގެ ތެރޭގައި ގާނޫނާއި ޚިލާފު ކަމެއް ނުވަތަ ކަންތައްތަކެއް ހިނގާފައިވޭތޯ ތަހުގީގު ކުރުމަށް ނިންމީ، ޝައްކުކުރެވޭ ކަންތައްތަކެއް ހުރުމުން ކަމަށެވެ. އެހެންކަމުން އެކަން ބަލައި ހޯދުމަށްޓަކައި ރަސްމީ ސިފައެއްގައި ތަހުގީގުތައް ކުރިއަށް ގެންދިއުމަށް ނިންމާފައިވާކަމަށް ބަޔާނުގައިވެއެވެ.
މިކަމާއި ގުޅިގެން އެޕާޓްމަންޓު އަލުން ހެދުމަށް ހޭދަކުރެއްވިގޮތާއި ގުޅޭގޮތުން ގިނަ ކަންތައްތަކެއް އޮޅުންފިލުވައި ދެއްވުމަށް ބޮރިސް ޖޯންސަނަށް މިހާރުވަނީ ޖެހިވަޑައިގެންފައެވެ. ޖޯންސަން ވިދާޅުވީ އެޕާޓްމަންޓުގެ މަރާމާތަށް ހޭދަކުރެއްވީ ހުރިހާ ގަވާއިދުތަކާއި އެއްގޮތްވާގޮތުގެ މަތިން އަމިއްލަފުޅަށް ކަމަށެވެ.
އިނގިރޭސިވިލާތުގެ މީޑިއާތަކުން ނެރެފައިވާ ރިޕޯޓުތަކަށް ބަލާއިރު، އެޕާޓްމަންޓު ހެދުމަށް ޖުމްލަ 200،000 ޕައުންޑު ޚަރަދުކޮށްފައިވެއެވެ. އެކަމަކު ރައްޔިތުންގެ ފައިސާގެ ތެރެއިން ބޮޑު ވަޒީރުގެ އެޕާޓްމަންޓުގެ މަރާމާތަށް އަހަރެއްގެ މައްޗަށް ޚަރަދުކުރެވެނީ 30،000 ޕައުންޑެވެ.
އެޕާޓްމަންޓު ހެދުމަށް ހޭދަކުރެއްވި ފައިސާއަކީ ޖޯންސަނަށް، ވެރިކަންކުރާ ކޮންޒަވޭޓިވް ޕާޓީއިން ލިބިވަޑައިގެންނެވި ލޯނެއް ކަމެއް ނުވަތަ ނޫންކަމެއް ސަރުކާރުން ހާމަކޮށްފައެއް ނުވެއެވެ. އެކަމަކު ލޯނު ލިބިވަޑައިގެންފައިވާނަމަ އެކަން ހަމަޖެހުނީ ވަޒީރުން އަމަލު ކުރަންޖެހޭ ގަވާއިދާއި އެއްގޮތްވާގޮތުގެ މަތިންކަން ޖޯންސަން ސާފުކޮށްދެއްވަން ޖެހިވަޑައިގަންނަވާނެއެވެ.
ލޯނެއް ނުވަތަ އެހީއެއް ބޭނުންކުރުމަކީ ގަވާއިދާއި ޚިލާފު ކަމެއް ނޫން ނަމަވެސް، އެ ލިބުނު ފައިސާގެ ހުރިހާ މައުލޫމަތެއް އެނގޭނެހެން ސާފުކޮށް ބަޔާންކޮށްފައި ހުންނަން ޖެހެއެވެ. މީގެ އިތުރުން ވެސް އެ މައުލޫމާތު ކަމާބެހޭ ދަފްތަރުތަކުގައި ހިމަނާފައި ހުންނަން ޖެހެއެވެ. އަދި 7500 ޕައުންޑަށް ވުރެ އިތުރަށް ލިބޭ ހިލޭ އެހީ ނުވަތަ ލޯނުގެ މައުލޫމާތު އިލެކްޓޮރަލް ކޮމިޝަނަށް ދޭންޖެހެއެވެ.
