ފްރާންސްގައި ކޮވިޑް-19ގެ ކޭސްތައް އިތުރުވަމުން އަންނަ އިރު، އެގައުމުގެ ހޮސްޕިޓަލްތަކުގެ އައިސީޔޫގައި ފަރުވާދޭންޖެހޭ މީހުންގެ އަދަދު އިތުރުވަމުން އަންނަކަމަށް ރިޕޯޓްތަކުން ދައްކައިފިއެވެ.

ރޮއިޓަރސްގައި ރިޕޯޓްކޮށްފައިވާ ގޮތުން 24 ގަޑިއިރުގެ ތެރޭގައި އެގައުމުގައި އިތުރު 145 މީހުންނަށް ކޮވިޑް ޖެހިގެން މަރުވެފައިވާއިރު އޭގެ ކުރީ ދުވަހު އައިސީޔޫގައި ފަރިވާދެމުން ދިޔަ 5,958 މީހުންގެ އަދަދު ވަނީ 5,978ށް އަރާފައެވެ. އަދި އިތުރު 24,465 މީހުން ވަނީ ކޮވިޑަށް ޕޮޒިޓިވްވެފައެވެ.

ފްރާންސް އަކީ ކޮވިޑް-19ގައި އަށް ވަނައަށް އެންމެ ގިނަ އަދަދެއްގެ ބަޔަކު މަރުވި ގައުމެވެ. އެގައުމުން މިބަލީގައި މަރުވި މީހުންގެ އަދަދު ވަނީ 102,858ށް އަރާފައެވެ.

ކޮވިޑް-19ގެ ތިން ވަނަ ރާޅާއި ފްރާންސުން ކުރިމަތިލާފައިވާއިރު، އެގައުމުން ކޮވިޑަށް ޕޮޒިޓިވްވި މީހުންގެ ޖުމްލަ އަދަދު ވަނީ 147 މިލިއަނަށް ވުރެ މައްޗަށް އަރާފައެވެ. ބަލި ކޮންޓްރޯލްކުރުމަށް ކުރަމުންދާ މަސައްކަތްތަކުގެ ދަށުން އެގައުމު ވަނީ މިހާރު ތިން ވަނަ ފަހަރަށް ލޮކްޑައުންކޮށްފައެވެ.

ފްރާންސްގެ ރައީސް އެމެނުއަލް މެކްރޮންގެ އަމާޒަކީ އެގައުމުގައި މިހާރު އިއުލާނުކޮށްފައިވާ ލޮކްޑައުން އާއި ކުރިއަށް ގެންދާ ވެކްސިނޭޝަން ޕްރޮގްރާމްގެ ސަބަބުން ކޮވިޑް ކޮންޓްރޯލް ކުރެވި މެއި މަހުގެ ތެރޭގައި ކެފޭ ރެސްޓޯރަންޓްތައް އަލުން ހުޅުވި، ރައްޔިތުންނަށް ބޭރަށް ނުކުމެ އުޅެވޭވަރު ވުމެވެ.