ސްޕެއިންގެ ޤައުމީ އަންހެން ފުޓުބޯޅަ ޓީމުގެ ކޯޗުކަމުން ޖޯޖް ވިލްޑާ ވަކިކޮށްފި އެވެ.

އެ މަގާމުން ވިލްޑާ ވަކިކުރީ، މިއަހަރު އޮތް ފީފާ އަންހެން ވޯލްޑް ކަޕްގެ އިނާމު ދިނުމުގެ ރަސްމިއްޔާތުގައި ސްޕެއިންގެ ފުޓުބޯޅަ އެސޯސިއޭޝަންގެ ރައީސް ލުއިސް ރުބިއާލެސް އަންހެން ކުޅުންތެރިޔަކަށް ބޮސްދިން މައްސަލައިގަ އެވެ. އެ މައްސަލައިގައި ގިނަ ބަޔަކު ރުބިއާލެސް އަށް ފާޑު ކިޔަމުން ދަނިކޮށް، ވިލްޑާ ވަނީ އޭނާގެ ދިފާއުގައި ވާހަކަ ދައްކައިފަ އެވެ. އެކަމާ ގުޅިގެން ގިނަ ބަޔަކު ވަނީ ވިލްޑާ އަށް ވެސް ފާޑު ކިޔައިފަ އެވެ.

ސްޕެއިންގެ އަންހެން ޓީމުގެ ކޯޗުކަމަށް ވިލްޑާ ހަމަޖެއްސީ 2015 ވަނަ އަހަރު އެވެ. އޭގެ ފަހުން މި ފާއިތުވި މުއްދަތުގެ ތެރޭގައި އޭނާ ވަނީ އެ ޓީމާއެކު ތިން ތައްޓެއް ކާމިޔާބު ކޮށްފަ އެވެ. އެއީ 2017 ވަނަ އަހަރުގެ އަލްގާވް ކަޕް، 2018 ވަނަ އަހަރުގެ ސައިޕްރަސް ކަޕް އަދި މިއަހަރު ކުރިއަށް ދިޔަ ފީފާ އަންހެން ވޯލްޑް ކަޕް އެވެ. އޭނާ ވަނީ 2018 ވަނަ އަހަރު ފީފާ އިން ހޮވާ ދުނިޔޭގެ އެންމެ މޮޅު އަންހެން ކޯޗުގެ މަގާމަށް ނޮމިނޭޓްވެފަ އެވެ.

ސީނިއާ ޤައުމީ އަންހެން ޓީމާ ހަވާލުވުމުގެ ކުރިން ވިލްޑާ ވަނީ، ޒުވާން އުމުރުފުރާގެ ޓީމުތަކަށް އިރުޝާދު ދީފަ އެވެ. އޭނާ ވަނީ 17 އަހަރުން ދަށް، އަދި 19 އަހަރުން ދަށުގެ ޤައުމީ ޓީމަށް އިރުޝާދު ދީފަ އެވެ. ސީނިއާ ޓީމަށް ވިލްޑާ ހަމަޖެއްސީ ޒުވާން ޓީމިތަކާއެކު އޭނާ ނެރުނު ނަތީޖާތަކުގެ ސަބަބުންނެވެ.