އުމުރުން ދުވަސްވީ މީހުންނަށް ދޭ 5000ގެ ބަދަލުގައި 2025 ވަނަ އަހަރުގެ ބަޖެޓުގައި އޮތީ 4000 ރުފިޔާ ޖަހާފައި ކަމަށް އަލިފުށީ ދާއިރާގެ ކުރީގެ މެންބަރު މުހައްމަދު ރަޝީދު ހުސައިން (ބިގޭ) ވިދާޅުވެއްޖެއެވެ.
އެމްޑީޕީގެ ހަރުގެ ޖަލްސާފައި އަލިފުށީ ދާއިރާގެ ކުރީގެ މެންބަރު މުހައްމަދު ރަޝީދު ހުސައިން ވިދާޅުވީ މި ސަރުކާރުން ދޮގާއި، މަކަރާއި އޮޅުވާލައިފި ކަމަށެވެ. ދޮގާއި މަކަރާއި އޮޅުވާލައިގެން ވެރިކަމަށް އައީ ރައީސް ޑރ. މުހައްމަދު މުއިއްޒު ކަމަށެވެ. އަދި ވެރިކަމަށް އައިސް ރައްޔިތުންނަށް ހަނާކޮށްފި ކަމަށާއި، ބަނޑުފުރާނަމުއްތި ނުކުރެވޭނެ ވަރަށް ތަކެތީގެ އަގުބޮޑުކޮށްފި ކަމަށާއި، މިއީ ބަލައިގަނެވޭނެ ކަމެއް ނޫން ކަމަށެވެ.
ބަޖެޓަށް އިޝާރާތްކުރައްވާ ބިގޭ ވިދާޅުވީ ބަޖެޓް ހުށަހަޅާފައިވަނީ ގާނޫނު އަސާސީއާއި ގާނޫނާއި ހިލާފަށް ކަމަށެވެ. ގާނޫނު އަސާސީއާއި ގާނޫނުގައި ވަރަށްސާފުކޮށް، ކައުންސިލްތަކަށް ބްލޮކް ގްރާންޓް ދޭންޖެހޭ ކަމަށް ބުނެފައިވާ ކަމަށާއި، އެކަން ކުރުމަށް ކައުންސިލްތަކަށް މަޖުބޫރުކޮށްފައިވާއިރު، ކައުންސިލްތަކުން އެކަމާއި ގުޅިގެން ދައުވާވެސް ކުރެވޭނެކަމަށް ބުނެފައިވާއިރު، އެވަރުކަމެއްގައި ގާނޫނާއި ގާނޫނުއަސާސީއާއި ހިލާފަށް އޮޅުވާލައިގެން ލާމަރުކަޒީ ގާނޫނުގެ ތެރެއިން ދޭންޖެހޭ ބްލޮކް ގްރާންޓް ދިނީ އެތައް ބައެއް ކުޑަކޮށް ކަމަށެވެ.
ބިގޭ ވިދާޅުވީ މިއީ ރައްޔިތުން ވިސްނަންޖެހޭ ކަމަށާއި، ކައުންސިލް މެންބަރުންނަށް އެކަނި ދޫކޮށްލައިގެން ދެކޮޅު ޖެހޭނެ ކަމެއް ނޫން ކަމަށެވެ.
ކައުންސިލްތައި ތިއްބެވި މެންބަރުންނަށް އެކަނި ދޫކޮށްލައިގެން ވާން ދެކޮޅު ޖެއްސޭނެކަމެއް ނޫން. އެއީ ރައްޔިތުން އެންމެންނަށްޓަކައި ރަށްރަށުގެ ތަރައްގީއަށް އެބޭފުޅުންގެ މިނިވަންކަމާއެކު، މަސައްކަތްތައް ހިންގުމަށް ދޭ ފައިސާ. ޑަބްލިއުޑީސީން ރައްޔިތުންގެ ކަންކަމަށް ހަރަދުކުރަން ދޭ ފައިސާ. އެ ފައިސާގެ ބާރުވެރިކަން ވެސް މިނަގަނީ މި ސަރުކާރުގެ ތެރެއަށް. ޒަމާނުއްސުރެ ރަށްރަށުގައި ކަތީބުން ތިބި ދުވަސްވަރު އެކަންކަން އޮތްގޮތަށް އަތޮޅުވެރިން ލުމާއި، ކަތީބުންގެ ގޮތުގައި ބާރެއް އޮތް އޮތުން، އެގޮތަށް ރާއްޖެ ފަރުމާކުރަމުން މިދަނީ. އަޅުގަނޑުމެން މިދަނީ އެތައް އަހަރެއް ފަހަތަށް.އަލިފުށީ ދާއިރާގެ ކުރީގެ މެންބަރު މުހައްމަދު ރަޝީދު ހުސައިން (ބިގޭ)
ބިގޭ ވިދާޅުވީ ގާނޫނާއި ހިލާފަށް އެތަކެއް ކަމެއް މި ސަރުކާރުން ކުރަމުން އަންނަ ކަމަށާއި، އެންމެ ކަންބޮޑުވާ ކަމަކީ ލާމަރުކަޒީ ގާނޫނުގެ ދަށުން ކަންކަން ކަށަވަރުކުރުމަށް، ރައްޔިތުންގެ ކަންކަން ކުރިއެރުވުމަށް ދޭންޖެހޭ ފައިސާ އުނިކުރުން ކަމަށެވެ.
އެންމެ ކަންބޮޑުވާ ކަމަކީ އެމްޑީޕީގެ ފުރަތަމަ ސަރުކާރުން ފެށިގެން ވުޖޫދުކުރި، އުމުރުން ދުވަސްވީ މީހުންނަށް އަޅުގަނޑުމެންދޭން ކަނޑައެޅުނު ފައިސާ، އެފައިސާ 65 އަހަރުގެ ކޮންމެ ބޭފުޅަކަށްމެ، 5000 ރުފިޔާ ދެމުންދަނީ. އެހެންނަމަވެސް، މިފަހަރުގެ ބަޖެޓް ހުށަހެޅިފައި ހުރި ގޮތުން، 5000 ރުފިޔާ ދެވޭނެ މިންވަރަކަށް ނެތް. 4000 ރުފިޔާ ދެވޭނެ މިންވަރު މި ފެންނަނީ. އުމުރުން ދުވަސްވީ މީހުންނާއި އޮޅުވާލުމާއި މަކަރު ހަދައިފި. ހަރަދަށް ޒިންމާވާ ގާނޫނާއި ހިލާފަށް މި ބަޖެޓް ހުށަހަޅާފައި އޮތީ. މިހެން ގޮސް ބަޖެޓް އޮތީ ގާނޫނާއި ހިލާފަށް.އަލިފުށީ ދާއިރާގެ ކުރީގެ މެންބަރު މުހައްމަދު ރަޝީދު ހުސައިން (ބިގޭ)
ބިގޭ ވިދާޅުވީ މިވަގުތުގެ މާލީ ވަޒީރު ގާނޫނާއި ހިލާފަށް މަޖިލީހަށް ބަޖެޓް ހުށަހަޅާފައި އޮތުމަކީ ގާނޫނީ ހަމަތަކުން އެ ވަޒީރެއްގެ ގައިގައި ހުންނަންޖެހޭ ސިފަތައް ހަމަނުވުން ކަމަށެވެ. ބިގޭ ވަނީ ގާނޫނާއި ގާނޫނުއަސާސީއާއި ހިލާފަށް ނުތިބޭނެ ވަޒީރުން އަމިއްލައަށް އިސްތިއުފާދިނުމަށް ގޮވާލާފައެވެ.
ބިގޭ ވިދާޅުވީ ތަކެތީގެ އަގަށް ބަދަލު އައިސްފައިވާއިރު، ބަޖެޓުން އެނގެނީ ރައްޔިތުން ހަނާވާވަރަށް ޓެކްސް ބޮޑުކުރިތަން ކަމަށާއި، އަސާސީ ބާވަތްތަކުން ސަބްސިޑީގެ ބޮޑުބައެއް އުނިކޮށްފައިވާ ކަމަށާއި، ރައްޔިތުންގެ ޖީބަށް އާމްދަނީ ނުވަންނަ ނަމަ މިއީ ރައްޔިތުންނަށް ލިބޭނެ ތަކުލީފަކަށް ވެގެންދާނެކަމަށެވެ.
