ދެ ފުރޮޅަށް ވުރެ ގިނަ ފުރޮޅުލީ އުޅަނދުތައް ރަޖިސްޓަރީ ކުރުމަށް ހުށަހަޅާއިރު ގަރާޖެއްގައި އެ އުޅަނދެއް ބޭއްވުމާ މެދު ގަރާޖުގެ ވެރިފަރާތުގެ އިއުތިރާޒެއް ނެތް ކަމުގެ ލިޔުން ހުށަހަޅަން ޖެހޭ ގޮތައް ގަވައިދު ބަދަލުކޮށްފިއެވެ.
އެއްގަމުގައި ދުއްވާ އުޅނަދުފަހަރު ރަޖިސްޓަރީ ކުރުމުގެ ގަވައިދަށް ގެނައި ފަސް ވަނަ އިސްލާހުގައި ބުނެފައިވާ ގޮތުން ގަރާޖުގެ ވެރިފަރާތުގެ ދިވެހި ރައްޔިތެއްކަން އަންގައިދޭ ކާޑުގެ ކޮޕީއަކާއި، އުޅަނދު ބާއްވާ ގަރާޖަކީ ރަޖިސްޓަރީ ކޮށްފައިވާ ގަރާޖެއްކަން އެނގޭނެ ލިޔުންތައް ވެސް އުޅަނދު ރަޖިސްޓަރީ ކުރަން ހުށަހަޅަން ޖެހެއެވެ.
ނޮވެމްބަރު 5 ވަނަ ދުވަހުން ފެށިގެން އަމަލު ކުރަން ފެށި އައު ގަވައިދުގައި ބުނާ ގޮތުން އުޅަނދު ބާއްވާ ގަރާޖުގައި އުޅަނދު ބޭއްވޭނެ ޖާގަ އޮތްކަން ޓްރާންސްޕޯޓު މިނިސްޓްރީން ނުވަތަ މިނިސްޓްރީން ކަނޑައަޅާ ފަރާތަކުން ކަށަވަރު ކުރަން ޖެހޭނެ ކަމަށެވެ.
2024 ވަނަ އަހަރުގެ ޑިސެމްބަރު 5 ން ފެށިގެން ކުންފުނީގެ ނަމުގައި އުޅަނދެއް ރަޖިސްޓަރީ ކޮށްދެވޭނީ އެކުންފުނީގެ އަމިއްލަ ބޭނުމަށް ޓަކައި ބޭނުން ކުރާ އުޅަނދުތައް އެކަނި ކަމަށްވެސް ވަނީ ގަވައިދަށް ގެނައި ބަދަލުގެ ތެރެއިން ކަނޑައަޅާފައެވެ.
އެހެން ނަމަވެސް މީގެ ތެރޭގައި ޚާއްސަ އެހީއަށް ބޭނުންވާ މީހުން ދުއްވުމަށް ޚާއްސަ ކުރެވިފައިވާ ތިނެއް ނުވަތަ ހަތަރު ފުރޮޅުލީ ސައިކަލު ނުހިމެނޭ ކަމަށް ގަވައިދުގައި ބުނެފައިވެއެވެ.
