ސެޕްޓެމްބަރު މަހުގެ 9 ވަނަ ދުވަހު ބާއްވާ ރިޔާސީ އިންތިޚާބުގައި ވޯޓިންގ ބޫތު ހުންނަގޮތަށް ބަދަލުގެނެސްފައިވާކަމަށް އިލެކްޝަންސް ކޮމިޝަން (އީސީ) އިން ހާމަކޮށްފިއެވެ.

ހޯމަ ދުވަހު ދަރުބާރުގޭގައި ބޭއްވި ނޫސްވެރިންގެ ބައްދަލުވުމެއްގައި އިލެކްޝަންސް ކޮމިޝަންގެ ނާއިބު ރައީސް އިސްމާއީލް ހަބީބް ވިދާޅުވީ، އެންމެ ފަހުން ބޭއްވި ލޯކަލް ކައުންސިލް އިންތިޚާބުގައި ވޯޓު ބޫތުތައް ހުރީ ކުރިމަތިން މީހުން ފެންނަ ގޮތަށް ހަދާފައި ނަމަވެސް، ކުރިއަށް އޮތް ރިޔާސީ އިންތިޚާބުގައި ވޯޓުލާ ހުރިހާ މަރުކަޒެއްގެ ބޫތު ހުންނާނީ، ބޫތުގައި ފާހަގަ ޖަހަން ހުންނަ މީހާގެ ފުރަގަސް ފެންނަގޮތަށްކަމަށެވެ. އަދި މި ނިންމުމަކީ ލަފާދޭ ކޮމިޓީގެ ލަފަޔާއިއެކު ނިންމި ނިންމުމެއްކަމަށްވެސް ހަބީބް ވިދާޅުވިއެވެ.

މި ގެނައި ބަދަލުގެ ސަބަބުން ވޯޓް ކަރުދާހުގަ ފާހަގަ ޖަހާ މީހާގެ ހަރަކާތްތައް މޮނީޓަރުންނާއި އޮބްޒާވަރުންނާއި ވޯޓުގެ ކަންކަން ބަލަހައްޓަން ތިބޭ އޮފިޝަލުންނަށް ރަނގަޅަށް ފެންނިގެންދާނެކަމަށް ވެސް ހަބީބް ފާހަގަކުރެއްވިއެވެ.

މީގެއިތުރުން މި ނޫސްވެރިންގެ ބައްދަލުވުމުގައި ވާހަކަފުޅު ދައްކަވަމުން ހަބީބް އިތުރަށް ވިދާޅުވީ އީސީއިން ތައްޔާރުކޮށްފައިވާ ވޯޓްކަރުދާހެއް ނޫން އެހެން ކަރުދާހެއްގައި ދީފާއިވާ ވޯޓާއި، އެއްވެސް ކެންޑިޑޭޓެއްގެ ނަމުގެ ދިމާލުގައި ރަނގަޅު ފާހަގަޖަހާފައިނުވާ ވޯޓު ކަރުދާހާއި ގާނޫނާ ހިލާފަށް ދީފައިވާ ވޯޓެއްކަން އެނގޭ ވޯޓާއި ވޯޓު ލާފައިވަނީ ވަކި ކެންޑިޑޭޓެއްކަން ކަށަވަރުނުވާ ގޮތަށް ދީފައިވާ ވޯޓު ބާތިލްވާނެ ކަމަށެވެ. އަދި ވޯޓް ކަރުދާހުގައި އެ މީހަކަށް ފެންނަ ކެންޑިޑޭޓެއްގެ ނަމާ ދިމާގައި ޖަހާ ރަނގަޅު ފާހަގައިގެ އިތުރުން ދެން ވޯޓް ކަރުދާހުގައި ލިޔުމާއި ކުރެހުމެއް ކުރަހާފައިވާ ވޯޓް ކަރުދާހާއި އެއް ކެނޑިޑެޓަކަށްވުރެ ގިނަ ކެންޑިޑޭޓުންގެ ނަމާއި ދިމާލުގައި ރަނގަޅު ފާހަގަ ޖަހާފައިވާ ވޯޓް ކަރުދާހާއި، ވޯޓް ކަރުދާހުގައި ފާހަގަ ޖެހުމަށް އާދައިގެ ކަޅު ނުވަތަ ނޫ ކުލަ ފިޔަވައި އެހެން ކުލައެއްގެ ގަލަމަކުން ނުވަތަ އެއްޗަކުން ފާހަގަ ޖަހާފައިވާ ވޯޓް ކަރުދާސް ބާތިލް ވާނެކަމަށް ހަބީބް ވިދާޅުވިއެވެ.