ދެކުނު ލުބުނާނުގައި ހިޒްބުﷲ އާއި އިޒްރޭލާ ދެމެދު ހިނގަމުންދާ ކުރިމަތިލުންތަކުގައި އިޒްރޭލުގެ 6 ސިފައިން މަރުވެއްޖެ ކަމަށް އިޒްރޭލުގެ އަސްކަރިއްޔާ އިން ބުރާސްފަތި ދުވަހު ނެރުނު ބަޔާނެއްގައި ބުނެފިއެވެ.

މީގެ އިތުރުން އިޒްރޭލުން ބުނެފައިވަނީ، އެންމެ ފަހުން މި ފާއިތުވި ހަފްތާ ތަކުގެ ތެރޭގައި މަރުވި ސިފައިންގެ އިތުރުން 16 ސިފައިން ޒަޚަމްވެފައިވާ ކަމަށެވެ.

އަނެއްކޮޅުން ލުބުނާނުގެ ޞިއްހަތާ ބެހޭ މިނިސްޓްރީން ހާމަކޮށްފައިވާ ގޮތުގައި އިރުމަތީ ލުބުނާނުގެ ބެކާ ވެލީ އަދި ބާލްބެކް ސިޓީގެ ސަރަޙައްދުތަކަށް ބުރާސްފަތި ވިލޭރޭ އިޒްރޭލުން ދިން ވައިގެ ޙަމަލާތަކުގައި މަދުވެގެން 40 މީހުން މަރުވެ 53 މީހުން ޒަޚަމްވި ހާދިސާގެ ފަހުން ބެއިރޫތައްވެސް އިޒްރޭލުން ވަނީ ބޮން އަޅާފައެވެ.

ލުބުނާނަށް އިޒްރޭލުން ދިން ޙަމަލާތަކުގައި ލުބުނާނުން މިހާތަނަށް މަދުވެގެން 3،103 މީހުން މަރުވެ 13،856 މީހުން ވަނީ ޒަޚަމްވެފައެވެ.