ސިޔާސީ މަސައްކަތުގައި ވަރަށް ގިނަ ބޭފުޅުން އެމަނިކުފާނާ ވަރަށް ގާތްކޮށް މަސައްކަތް ކުރައްވާފައި ދުރަށް ވަޑައިގެންފައިވާ ކަމަށާއި، އެންމެ ބޮޑަށް އުނދަގޫފުޅުވީ މިހާރުގެ ޑިފެންސް މިނިސްޓަރު މުޙައްމަދު ޣައްސާން މައުމޫން ދުރަށް ވަޑައިގެންނެވުމުން ކަަމަށް ކުރީގެ ރައީސް ޢަބްދުﷲ ޔާމީން ޢަބްދުލް ޤައްޔޫމް ވިދާޅުވެއްޖެ އެވެ.
ރާއްޖެ ޓީވީގެ ފަށާއިރު ޕްރޮގްރާމްގެ ޚާއްސަ މެހުމާނެއްގެ ގޮތުގައި ބައިވެރިވެ ވަޑައިގެން ވާހަކަ ދައްކަވަމުންް ރައީސް ޔާމީން ވިދާޅުވީ، ޕީޕީއެން-ޕީއެންސީގައި އެމަނިކުފާނަށް ވުރެ ބޮޑަށް އެމްޑީޕީ ސަރުކާރުގެ ކަންކަމާ ފާޑު ވިދާޅުވެފައި ތިއްބެވި ބޭފުޅުން ގޯސް ހެއްދެވުމުން އެކަން ބަލައި ގަންނަން އުނދަގޫ ކަމަށެވެ. އެގޮތުން ރާއްޖޭގެ ކަނޑުގެ މައްސަލަ އާއި، އިންޑިއާ ސިފައިންގެ ވާހަކަ އެމަނިކުފާނު ވަނީ ފާހަގަ ކުރައްވައިފަ އެވެ.
އޭގެ ތެރެއިން ވެސް އެ ބޭފުޅަކު ވަޑައިގެންނެވުމުން އެންމެ ދަތިވާ އެއް ބޭފުޅަކު ނުވަތަ ދެ ބޭފުޅަކު އަންނަ ނަމަ، އެ ބޭފުޅަކީ ޣައްސާން ކަމަށް ރައީސް ޔާމީން ވިދާޅުވި އެވެ. ސަބަބަކީ އެމަނިކުފާނާ ވަރަށް ގާތްކޮށް ޣައްސާން މަސައްކަތް ކުރައްވާފައިވުން ކަމަށާއި، އެކަން ޤަބޫލު ނުކުރެވޭ ކަމަށް ވެސް ރައީސް ޔާމީން ވަނީ ވިދާޅުވެފަ އެވެ. އެގޮތުން ޣައްސާންގެ ބައްޕާފުޅު، ކުރީގެ ރައީސް އަލްއުސްތާޛް މައުމޫން ޢަބްދުލް ޤައްޔޫމަކީ ޤައުމަށް ވަރަށް ބޮޑު ޚިދުމަތްތަކެއް ކޮށްދެއްވާފައިވާ ބޭފުޅެއް ކަމަށާއި، ވަޒީފާއެއް ނުލިބިގެން ނުވަތަ އާމްދަނީއެއް ނުލިބިގެން ޣައްސާން ވަޑައިގަންނަވަން ނުޖެހޭ ކަމަށް ވެސް ރައީސް ޔާމީން ވިދާޅުވި އެވެ.
ޣައްސާންގެ ޠަބިއްޔަތުގައި ދިވެހި ރައްޔިތުންނަށް ޚިދުމަތް ކުރުމުގައި "ކޮމްޕޮރިމައިޒް" ވެގެން ހުރެގެން ޚިދުމަތް ކުރައްވަން ހުންނަވަން ނުޖެހޭ ކަމަށް ވެސް ރައީސް ޔާމީން ވިދާޅުވެފައިވެ އެވެ. އެކަން ޤަބޫލު ކުރަން ވަރަށް ދަތިކަން ފާހަގަ ކުރައްވައި ރައީސް ޔާމީން ވިދާޅުވީ، އެކުގައި މަސައްކަތް ކުރާ ކޮންމެ މީހަކު ދިޔަ ނަމަވެސް، ދެރަ ވާނެ ކަމަށެވެ. އެހެން ނަމަވެސް އެއީ "ފޫނުބެއްދޭ" ވަރުގެ ގެއްލުމެއް ނޫން ކަމަށް ވެސް ރައީސް ޔާމީން ޤަބޫލު ކުރައްވަ އެވެ. ސިޔާސީ ލީޑަރަކަށް ހުންނަ މީހަކީ ކަންކަމާ ކުރިމަތިލުމުގެ ޤާބިލުކަން ހުރި މީހެއް ނަމަ، މީހުން ބިނާ ކުރުމަކީ އުނދަގޫ ކަމެއް ނޫން ކަމަށް ވެސް ރައީސް ޔާމީން ވިދާޅުވި އެވެ.
އަޅުގަނޑަށް އެންމެ ބޮޑަށް ދަތިބާ ބޭފުޅުންގެ ތެރޭގައި އެއް ބޭފުޅަކު ނުވަތަ ދެ ބޭފުޅަކު އަންނަންޏާ، އަޅުގަނޑާ ކައިރީގައި މަސައްކަތް ކުރައްވާފައި ޣައްސާން މައުމޫން ހުންނެވީ. އަޅުގަނޑަށް ޤަބޫލެއް ނުކުރެވޭ އިނގޭތޯ. ޣައްސާން މައުމޫންގެ ބައްޕާފުޅަކީ (ރައީސް މައުމޫން) ޤައުމަށް ނުލާހިކު ޚިދުމަތްތެރި ބޭފުޅެއް. ޣައްސާން މައުމޫނެއް ވަޒީފާއެއް ނުލިބިގެން، އާމްދަނީ ނުލިބިގެންނެއް ދާކަށް ނުޖެހޭ. އޭނަގެ ކެރެކްޓާގައި ދިވެހި ރައްޔިތުންނަށް ޚިދުމަތްކުރުމުގައި ކޮމްޕޮރިމައިޒް ވެގެން ހުރެގެން ޚިދުމަތް ކުރައްވާކަށް ހުންނަވާކަށް ނުޖެހޭ. އެހެންވީމަ އެއީ އަޅުގަނޑަށް ތަންކޮޅެއް އުނދަގޫ ޤަބޫލު ކުރަން.ކުރީގެ ރައީސް ޢަބްދުﷲ ޔާމީން ޢަބްދުލް ޤައްޔޫމް
ރައީސް ޔާމީނާ އާއިލީ ގޮތުން ވެސް ގާތް ގުޅުމެއް އޮންނަ ޣައްސާން މައުމޫނަކީ، އަބަދު ވެސް އެމަނިކުފާނުގެ ގާތް ބޭފުޅެެއްގެ ގޮތުގައި ފެނުނު ބޭފުޅެކެވެ. އެގޮތުން ރައީސް ޔާމީންގެ ވެރިކަމުގައި ޕީޕީއެމްގެ ތެރޭގައި ޖެހުނު މައްސަލައިގައި ރައީސް ޔާމީން އަދި ރައީސް މައުމޫން ދެބައިވެގެން ދިޔައިރު ވެސް، ޣައްސާން ހުންނެވީ ރައީސް ޔާމީންގެ އަރިހުގަ އެވެ. ރައީސް މައުމޫންގެ ހުރިހާ ބޭފުޅުން ރައީސް ޔާމީނާ ދެކޮޅަށް މަސައްކަތް ކުރެއްވިއިރު ވެސް، ޣައްސާން ހުންނެވީ ރައީސް ޔާމީންގެ ފަޅީގަ އެވެ. އޭގެ ތެރެއިން ރައީސް މައުމޫން ޖަލަށް ލީއިރު ވެސް، ޣައްސާން ހުންނެވި ފަޅި ބަދަލު ކުރައްވާފައެއް ނުވެ އެވެ.
އެހެން ނަމަވެސް، މިހާރުގެ ރައީސް ޑޮކްޓަރު މުޙައްމަދު މުޢިއްޒުއާ ރައީސް ޔާމީނާ ދެމެދު ޖެހުނު މައްސަލައިގައި ޣައްސާން ހުންނެވީ ރައީސް މުޢިއްޒުގެ ފަަޅީގަ އެވެ.
