ޤައުމީ ބިލިއާޑް މުބާރާތުގެ ޓީމު އިވެންޓުގައި މާޒިޔާ ސްޕޯޓްސް އެންޑް ރެކްރިއޭޝަން ބަލިކޮށް ކުލަބް އީގަލްސް ޕޮއިންޓު ތާވަލްގެ އެއް ވަނަ އަށް ޖެހިލައިފިއެވެ.

އާދިއްތަ ދުވަހުގެ ރޭ ޤައުމީ ބިލިއާޑް ސެންޓަރުގައި ކުޅުނު މެޗުން އީގަލްސް މޮޅުވީ 4-1 އިންނެވެ. ފުރަތަމަ ކުޅުނު ސިންގަލްސް ޓޭބަލް ކާމިޔާބުކުރީ އީގަލްސް އިންނެވެ. އެ ޓީމުގެ މިގުއެލް ވަނީ މާޒިޔާގެ އަލީ ފަޔާޒްގެ މައްޗަށް 7-0 އިން ކުރި ހޯދާފައެވެ. ދެ ވަނަ ސިންގަލްސް ގައި މާޒިޔާގެ މަލާޔަން ވަނީ 7-3 އިން އީގަލްސްގެ ސާހިލް ހަމީދު ބަލިކޮށްފައެވެ. ދެން ކުޅުނު ޑަބަލްސްގެ ތިން ޓޭބަލް ވެސް ކާމިޔާބުކުރީ އީގަލްސް އިންނެވެ. އީގަލްސްގެ އައްބާސް އަދި އަހުސަންގެ ޕެއާ އިން ވަނީ މާޒިޔާގެ އިބްރާހިމް އަދި ޝަރީފްގެ ޕެއާ 7-4 އިން ބަލިކޮށްފައެވެ. ދެ ވަނަ ޑަބަލްސްގައި އީގަލްސްގެ ސުވައިދު އާއި އަފްރާހް ވަނީ އީގަލްސްގެ އަސްލަމް އާއި އައްފާން 7-6 އިން ބަލިކޮށްފައެވެ. ފަހު ޓޭބަލްގައި އީގަލްސްގެ ޝާޒް އާއި އާފީ ވަނީ 7-1 އިން މާޒިޔާގެ ރާޖޭޝް އާއި ނަފާއު ބަލިކޮށްފައެވެ.

އާދިއްތަ ދުވަހުގެ ރޭ ދެން ކުޅުނީ އައިލެންޑާސް ހޯޕް ސްޕޯޓްސް ކުލަބާއި ދިވެހި ސިފައިންގެ ކުލަބު ބައްދަލު ކުރި މެޗެވެ. އެ މެޗު ފަސޭހަކަމާއެކު ސިފައިން ކާމިޔާބުކުރީ 5-0 އިންނެވެ.

އީގަލްސް އެއް ވަނައިގައި އޮތީ ތިން މެޗުން ހަ ޕޮއިންޓާއި ފައިދާ ތިން ގޭމާއެކުއެވެ. ދެ ވަނައިގައި އޮތް ކަސްޓަމްސް ރެކްރިއޭޝަން ކުލަބަށް ލިބެނީ ދެ މެޗުން ހަ ޕޮއިންޓެވެ. ތިން ވަނައިގައި ސިފައިން އޮތީ ދެ މެޗުން ތިން ޕޮއިންޓު ހޯދައިގެންނެވެ. ތިން މެޗުން ތިން ޕޮއިންޓާއެކު މާޒިޔާ އޮތީ ހަތަރު ވަނައިގައެވެ. ޕޮއިންޓެއް ނުލިބި ފުލުގައި އޮތީ އައިލެންޑާސްއެވެ.