މިހާރު ކުރިޔަށްދާ އިންޓަރ އޮފީސް ބިލިއާޑް މުބާރާތުގެ ސިންގަލްސް ޗެމްޕިއަންކަން މޯލްޑިވްސް ޕޯޓްސް ލިމިޓެޑް (އެމްޕީއެލް) ގެ މުހައްމަދު ދުންޔާޒް އަދި ކަސްޓަމްސް ރިކްރިއޭޝަން ކުލަބުގެ އާމިނަތު ހަލީމް (ދިލް) ހޯދައިފިއެވެ.

ފިރިހެން ސިންގަލްސްގެ ޗެމްޕިއަންކަން ދުންޔާޒް ހޯދާފައިވަނީ ފައިނަލުގައި އެމްޕީއެލްގެ އަބްދުﷲ އަފީފް އާ ވާދަކޮށް 9-5 ގެ ނަތީޖާއަކުން މޮޅުވެގެނެވެ. އަދި އަންހެން ސިންގަލްސް ޗެމްޕިއަންކަން ދިލް ހޯދާފައިވަނީ ފައިނަލުގައި ރައީސް އޮފީހުގެ ފަގީހާ އިބްރާހިމްގެ މައްޗަށް 6-1 ގެ ނަތީޖާ އަކުން ކުރިހޯދައިގެނެވެ. މިދިޔަ އަހަރުގެ އިންޓަ އޮފީސް މުބާރާތުގެ ސިންގަލްސް ޗެމްޕިއަންކަން ހޯދާފައިވަނީވެސް ދުންޔާޒް އަދި ދިލެ އެވެ.

އިންޓަރ އޮފީސް ބިލިއާޑް މުބާރާތުގެ ޓީމް އިވެންޓު މެޗުތައް މިރޭ ފެށުމަށް ވަނީ ހަމަޖެހިފައެވެ. މިއަހަރުގެ މުބާރާތުގައި 13 އޮފީހަކުން ޖުމްލަ 18 ޓީމު ވާދަކުރާނެއެވެ. އޭގެތެރޭގައި ހިމެނެނީ ފިރިހެން ޑިވިޝަނުގެ 13 ޓީމާއި އަންހެން ޑިވިޝަނުގެ ފަސް ޓީމެވެ.

ޓީމު އިވެންޓުގެ ފިރިހެން ޑިވިޝަނުގެ ގުރޫޕު އޭ ގައި ހިމެނެނީ އެމްއެންޑީއެފް، އެމްއޭސީއެލް، މޯލްޑިވިއަން، ރައީސް އޮފީސް، މޯލްޑިވްސް އިސްލާމިކް ބޭންކް އަދި އެމްޕީއެލް އެވެ. ގުރޫޕު ބީ ގައި ހިމެނެނީ ޕޮލިސް، ދިރާގު، ކަސްޓަމްސް، އެމްޑަބްލިޔުއެސްސީ، ޓީއެމްއޭ، ސްޓެލްކޯ އަދި ބީއެމްއެލް އެވެ.

ޓީމު އިވެންޓުގެ އަންހެން ބައި ކުޅޭނީ ލީގު އުސޫލުންނެވެ. މިއަހަރުގެ މުބާރާތުގައި ބައިވެރިވެފައިވަނީ ރައީސް އޮފީސް، އެމްއޭސީއެލް، ކަސްޓަމްސް، އެމްއެންޑީއެފް އަދި ދިރާގެވެ.

ޖޫން މަހު 8 ވަނަ ދުވަހު މި މުބާރާތް ފަށާފައިވާއިރު، މިއީ މި މުބާރާތް ބާއްވާ 10 ވަނަ ފަހަރެވެ.