ދެކުނު ކޮރެއާގައި ކޮވިޑް-19 ޖެހިގެން ރަނގަޅުވާ މީހުން އަނެއްކާ ވެސް ބައްޔަށް ޕޮޒިޓިވްވަމުން އަންނަ ކަމަށް އެގައުމުގެ ސެންޓަރު ފޮރ ޑިޒީސް ކޮންޓްރޯލް އެންޑް ޕްރިވެންޝަނުން ބުނެފިއެވެ.

ދެކުނު ކޮރެއާގެ ސީޑީސީން ބުނެފައިވަނީ އެގައުމުގައި ބަލި ޖެހުނު މީހުންގެ ތެރެއިން ރަނގަޅުވި 163 މީހުންނެއް ބައްޔަށް ދެވަނަ ފަހަރަށް ޕޮޒިޓިވްވެފައިވާ ކަމަށެވެ. ދެކުނު ކޮރެއާގެ އިތުރުން ޗައިނާގައި ވެސް މި މައްސަލަ އަންނަނީ ދިމާވަމުންނެވެ. ނަމަވެސް ސައްހަ އަދަދެއް އަދި އެގައުމުން ހާމައެއް ނުކުރެއެވެ.

މިއާއެކު ދެވަނަ ފަހަރަށް މީހަކު ކޮވިޑަށް ޕޮޒިޓިވް ވަނީ ކީއްވެގެން ކަމެއް އަދި މިހާތަނަށް ދެނެގަނިވިފައި ނުވެއެވެ. އަދި އެކަން ހޯދުމަށް ޑޮކްޓަރުން ދަނީ މަސައްކަތް ކުރަމުންނެވެ.

ދެކުނު ކޮރެއާގައި މިހާތަނަށް ބަލިޖެހުނު މީހުންގެ ތެރެއިން އަލުން ބަލި ޖެހުނު މީހުންގެ އަދަދު ނިސްބަތުން ދަށެވެ.

މިހާތަނަށް އެގައުމުން 8،000 (އަށް ހާސް) އާ ގާތްކުރާ އަދަދަކަށް މީހުންނަށް ބަލި ޖެހެގެން ރަނގަޅުވެފައިވާ އިރު، އޭގެ ތެރެއިން ދެވަނަ ފަހަރަށް ޕޮޒިޓިވްވި މީހުންގެ ނިސްބަތް އުޅެނީ 2.1 އިންސައްތައިގައެވެ.

ނަމަވެސް ރަނގަޅުވި މީހުންގެ ތެރެއިން މިހާތަނަށް ދެވަނަ ފަހަރަށް ބަލިޖެހިފައިވޭތޯ ބެލުމަށް ޓެސްޓްކޮށްފައިވަނީ ކިތައް މީހުންކަމެއް އަދި ސާފު ނުވާ ކަމަށެވެ.

ދެ ވަނަ ފަހަރަށް ކޮވިޑް-19 އަށް މީހުން ޕޮޒިޓިވްވަމުން އަންނާތީ ދެކުނު ކޮރެއާއިން ވަނީ އެކަމުގެ ކަންބޮޑުވުން ފާޅުކޮށްފައެވެ.

ވައިރަސްގެ އައުޓްބްރޭކް ކޮންޓްރޯލް ކޮށްފައިވަނިކޮށް ދެވަނަ ފަހަރަށް ޕޮޒިޓިވްވާ މީހުން ފެންނަމުންދާތީ އެކަމުގެ ބިރުވެރިކަން ވަނީ އުފެދިފައެވެ.