ފަލަސްތީން، ސޫދާން ހިމެނޭ ގޮތަށް 16 ގައުމެއްގައި ބަނޑުހައިހޫނުކަމުގެ ކާރިސާ އެއް އުފެދިދާނެ ކަމަށް އދ ގެ ކާނާ އާއި ބެހޭ 2 އެޖެންސީއަކުން އިންޒާރު ދީފި އެވެ.

އދ ގެ ކާބޯތަކެތީގެ ދެ އިދާރާއަކުން ބުދަ ދުވަހު އިންޒާރު ދީފައި ވަނީ ދުނިޔޭގެ އިތުރު އެތައް މިލިއަން ބަޔަކަށް ބަނޑުހައިހޫނުކަމާ ކުރިމަތިލާން ޖެހިދާނެ ކަމަށާއި ފައިސާގެ ދަތިކަން މިހާރު ވެސް ގޯސްވެފައިވާ ކަމަށެވެ.

ފުޑް އެންޑް އެގްރިކަލްޗާ އޯގަނައިޒޭޝަނާއި ވޯލްޑް ފުޑް ޕްރޮގްރާމްގެ ޖޮއިންޓް ރިޕޯޓުގައި ބުނެފައި ވަނީ ނުރައްކާތެރިކަން ފާހަގަކުރެވޭ ގިނަ ގައުމުތަކުގައި ހަމަނުޖެހުމާއި އަނިޔާވެރިކަމުގެ ސަބަބުން މި ގައުމުތަކުގައި ކާބޯތަކެއްޗަށް ޖެހުމުން އަންނަ ކަމަށެވެ.

ރޯމްގައި ހުންނަ އެ އިދާރާތަކުން ލިސްޓްކޮށްފައި ވަނީ ހައިޓީ، މާލީ، ފަލަސްތީން، ދެކުނު ސޫދާން، ސޫދާން އަދި ޔަމަނަކީ އެންމެ ގޯސް ގައުމުތައް ގޮތުގަ އެވެ. އަދި މި ގައުމުތަކަކީ އާބާދީއަށް ކާރިސާ ކުރިމަތިވުމުގެ ނުރައްކާ އޮތް ގައުމުތައް ކަމަށް ބުނެފައިވެ އެވެ.

އަދި ވަރަށް ބޮޑަށް ކަންބޮޑުވާ ކަމަށް ގިންތި ކުރެވިފައިވަނީ އަފްޣާނިސްތާނާއި ޑިމޮކްރެޓިކް ރިޕަބްލިކް އޮފް ކޮންގޯ، މިޔަންމާ، ނައިޖީރިއާ، ސޯމާލިއާ އަދި ސީރިއާ، ބުރްކިނާ ފާސޯ، ޗާޑް، ކެންޔާ އަދި ބަންގްލަދޭޝްގައި ތިބި ރޮހިންޔާ ރެފިއުޖީންނެވެ.

ޑަބްލިއުއެފްޕީގެ އެގްޒެކެޓިވް ޑިރެކްޓަރު ސިންޑީ މެކެއިން ވިދާޅުވީ މިތިބީ، ބަނޑުހައިހޫނުކަމުގެ ނުރައްކާ މުޅިން ހުއްޓުވޭނެ ކަމުގެ ބިރު އޮތް މިންވަރެއްގައި ކަމަށާއި، ފިޔަވަޅު ނާޅައިފިނަމަ، އިތުރު ހަމަނުޖެހުންތަކާއި، ހިޖުރަކުރުމާއި، ހަމަނުޖެހުންތަކަށް މަގުފަހިވެގެންދާނެ ކަމަށެވެ.

އިންސާނީ އެހީތެރިކަމަށް ދޭ ފައިސާ ނުރައްކާ މިންވަރަކަށް މަދުވަމުން އަންނަ ކަމަށް ރިޕޯޓުގައި ބުނެފައިވާއިރު، ނުރައްކާތެރިކަމަށް ހުށަހެޅިފައިވާ މީހުންނަށް އެހީތެރިވުމަށް ބޭނުންވާ 29 ބިލިއަން ޑޮލަރުގެ ތެރެއިން ލިބުނީ އެންމެ 10.5 ބިލިއަން ޑޮލަރެވެ.

ޑަބްލިއުއެފްޕީން ބުނީ ފަންޑު ކަނޑާލުމުގެ ސަބަބުން ރެފިއުޖީންނާއި ގެދޮރު ގެއްލިފައިވާ މީހުންނަށް ދޭ އެހީ މަދުކޮށްފައިވާއިރު ބައެއް ގައުމުތަކުގައި ސްކޫލްތަކުގައި ކާންދިނުމުގެ ޕްރޮގްރާމްތައް ހުއްޓާލާފައިވާ ކަމަށެވެ.