ޑިސެމްބަރު 10ގައި އެމްޑީޕީން ބާއްވާ "ޤާނޫނުއަސާސީގެ ދިފާއުގައި" އެއްވުން ރޭވިފައިވާ ގޮތް ފުލުހުންނާއި ހިއްސާކޮށްފިއެވެ.
މިއަދު ހެނދުނު 10:00 އަށް އެމްޑީޕިން ވަނީ ފުލުހުންގެ އިސްކަންދަރު ކޮށްޓަށް ހާޒިރުވެ ފުލުހުން އެދުނު މައުލޫމާތުތައް ހިއްސާކޮށްފައެވެ. އެކަމާއި ގުޅޭގޮތުން ރާއްޖެ އެމްވީއަށް މައުލޫމާތު ދެއްވަމުން، އެމްޑީޕީގެ ޗެއަރޕަރސަންގެ ނައިބު އިބްރާހިމް ވަހީދު ވިދާޅުވީ ފުލުހުންގެ އިދާރާ އަށް ހާޒިރުވީ ފުލުހުން އެދިގެން ކަމަށެވެ. އެއީ އެމްޑީޕީގެ އެއްވުމުގެ ތަފްސީލްތައް ހިއްސާކުރުމުގެ ގޮތުން ކަމަށާއި ފުލުހުންގެ އެއްބާރުލުން ދޭނެކަމުގެ ފުރިހަމަ ޔަޤީންކަން ފުލުހުން ދީފައިވާ ކަަމަށެވެ. އަދި މި އެއްވުމަކީ އެމްޑީޕީގެ ޤައުމީ މަޖިލީހާއި އެމްޑީޕީގެ އާއްމު ޖައްސާ އެއް ބާއްވާ ހަރަކާތެއްކަން ހާމަކޮށްފައިވާނެ ކަަމަށް އޭނާ ވިދާޅުވިއެވެ. އެ އެއްވުމުގައި ޤާނޫނީ އިމުގެ ތެރެއިން ލިބޭ ހުރިހާ ބާރެއް ބޭނުންކުރާނެކަމަށާއި އެ އާއި ޚިލާފަށް ޤާނޫނީ އިމުން ބޭރުން އެއްވެސް ކަމެއް ނުކުރާނެކަމުގެ ޔަޤީންކަން ދީފައިވާނެކަމަށް އޭނާ ވިދާޅުވިއެވެ.
އެއްބާރުލުން ދެއްވާނެ ކަމަށް ވިދާޅުވި. އެހެންނަމަވެސް މި ސަރުކާރު ވެރިކަމުގައި ތިބެ މިކަހަލަ ކަންކަން ބަދަލުވެދާނެ ކޮންމެ ވަގުތަކުވެސް. އެއީ އެކަން އޮތް ގޮތަކީ. އެ ޔަޤީންކަމެއް ނެތް. އެހެންނަމަވެސް މިހާތަނަށް ފުލުހުންގެ ފަރާތުން ހުރިހާ އެއްބާރުލުމެއް ލިބޭ.އެމްޑީޕީގެ ޗެއަރޕަރސަންގެ ނައިބު އިބްރާހިމް ވަހީދު
ގާނޫނު އަސާސީގެ ދިފާއުގައި އެމްޑީޕީން ބާއްވާ އެއްވުމަށް މީހުން ދިޔަ ނުދިނުމަށް ސަރުކާރުން އެކި ސިފަ ސިފައިގައި މަސައްކަތް ކުރާ ކަަމަށް އެމްޑީޕީން ވަނީ ބުނެފައެވެ. އެގޮތުން މަޤާމުގެ ބިރު ދެއްކުމާއި، ރަށުން ބޭރަށް ފޮނުވާލުން ފަދަ ކަންކަން ކުރާ ކަމަށް ވަނީ ބުނެފައެވެ. ހަމައެހެންމެ މި އެއްވުމަކީ ޤާނޫނާއި ޚިލާފު އަނިޔާވެރިކަމަށް ހިތްވަރުދޭ އެއްވުމެއް ކަމަށް ބުނެ އާއްމުންގެ ހިތުގައި ބިރުވެރިކަން އުފައްދާ އެއްވުމަށް މީހުން ނުދާނެ ފަދަ ދޮގު މައުލޫމާތުތައް ސަރުކާރުން ފަތުރަމުންދާ ކަމަށް އެމްޑީޕިން ވަނީ ބުނެފައެވެ.
