ކަމަށް ކަމޭ ހިތައިގެން ވަޒީފާގެ ޒިންމާތައް އަދާ ކުރާ މީހަކު މި ޒަމާނުގައި ފެނުމަކީ ނާދިރު ކަމެކެވެ. ދިރިއުޅުމުގެ ޙާލަތު މަޖުބޫރު ކުރުވައިގެން ވަޒީފާއަށް ދާތީ ވާ ގޮތެއް ކަމަށްވެސް ބައެއް މީހުން ބުނެފާނެއެވެ. ކުލި ދައްކަން ޖެހޭތީ ނޫނީ، ދަރިންގެ ޚަރަދުތައް ކުރަން ޖެހޭތީ ޢާމްދަނީއެއް ހޯދަން ކުރާ ކަމެއްގެ ގޮތުގައި ވަޒީފާއަށް ނުކުންނަ މީހުންގެ ޢަދަދު ގިނަ ވުމާއެކު، އިޚްލާސްތެރި ޚިދުމަތްތެރިން ފެނުމަކީ ކާޅަކުން ހުދުފަތެއް ފެނުން ކަހަލަ ކަމެކޭވެސް ބުނެވިދާނެއެވެ.

އުޑު މައްޗަށް ބަނަ ވިލާކޮޅެއް އަރާއިރަށް އޮފީސްތަކުގެ ސަލާމް-ލިސްޓު ފިސާރި ދިގުވެއެވެ. ވަރުގަދަ މެޗެއް އޮތީވިއްޔާ، ޖެހިގެން އަންނަ ދުވަހުގެ ޙާލަކީވެސް ހަމަ އެއީއެވެ. ނަމަވެސް، ނިމޭނެ ދުވަހެއްގެ ކޮޅުމަތިވެސް ފެންނަން ނެތް ވަރުގަދަ ޤަތުލުޢާންމެއްގެ ޝިކާރައަކަށް ވެފައި އޮތް ޣައްޒާގެ ރަށްވެހިންގެ ފަރާތުން ފެނިގެންދަނީ މުޅިން ތަފާތު މިސާލެކެވެ. މުޅި ދުނިޔެއަށްވެސް ލާމަސީލު މިސާލުތަކެކެވެ.

ޣައްޒާ ކޮންޓްރޯލް ކުރަމުން ދާ ޙަމާސް ޖަމާޢަތް ނައްތާލާނެ ކަމަށް ބުނެ ޔަހޫދީ އިޒްރޭލުން ޣައްޒާއަށް ދެމުންދާ ނިރުބަވެރި ޙަމަލާތަކުގައި، 2.3 މިލިއަން މީހުންގެ އާބާދީއެއް އޮތް ޣައްޒާގެ ދިރުން ވަނީ ގެއްލިފައެވެ. ޢުދުވާންތަކާއެކު އޭނާ އަދާ ކުރަމުން ދިޔަ އިނގިރޭސި ޓީޗަރެއްގެ ވަޒީފާ ގެއްލި، ނުވިތާކަށް ގެދޮރުވެސް ގެއްލުނު އެކަކީ ޠާރިޤު އަލް-ނުޢައިމީއެވެ. ނަމަވެސް، އެ ޙާލުގައިވެސް އޭނާ ނިންމީ ކިޔަވައިދިނުމުގެ މަސައްކަތައިގެން ކުރިއަށް ދާށެވެ. ގެދޮރު ގެއްލިފައިވާ އެތައް ބަޔަކު، ވަގުތީ ގޮތުން ހިޔާވަހިކަން ހޯދަމުން ދަނީ ޣައްޒާގެ ސްކޫލުތަކުގައި ކަމަށް ވާ އިރު، ޠާރިޤު ދަނީ އެތަނުން ސްކޫލެއްގައި އިނގިރޭސި ފިލާވަޅުތައް ނަގައިދެމުންނެވެ.

ރަފަޙުގައި ހުންނަ އެ ސްކޫލަކީ މިއަދު ޣައްޒާގެ އެތައް ސަތޭކަ ބައެއްގެ ގެދޮރެވެ. ގިނަ ޢަދަދެއްގެ ކުޑަކުދިންވެސް އެތަނުގައި ދިރިއުޅެމުންދެއެވެ. އެކުދިންގެ ކިބައިން ތާރިޤަށް ފެނުނީ ހިތްދަތި ކަމާއި މާޔޫސްކަމެވެ. އެކަން ބަދަލުކޮށް، ސްކޫލަށް އައު ދިރުމެއް ގެނެސްދިނުމުގެ ނިޔަތުގައި ތާރިޤު ތެދުވިއެވެ. އެކަމަކަށް އޭނާ ފަރިތަ، އިނގިރޭސި ޓީޗަރެއްގެ ގޮތުގައެވެ. ޢާއިލާތަކާއެކު ސްކޫލުގައި ދިރިއުޅެމުންދާ ކުދިންނަށް އިނގިރޭސި ކުލާސްތައް ނަގައިދޭން ފެށިއެވެ.

މީގެ ކުރިން ދަރިވަރުންގެ ސަފުތައް ފެންނަމުން ދިޔަ ސްކޫލު ގޯތި ތެރެއިން މިއަދު ފެންނަނީ ސާފު ބޯފެނާއި ކާބޯތަކެތި ހޯދަން ހަދާފައި ވާ ސަފުތަކެވެ.

ސްކޫލުގެ ގޯތި ތެރޭގައި ޖަހާފައި ހުރި ޓެންޓެއްގެ ތެރޭގައި އެ އިނީ ޢުމުރުން އެންމެ 10 އަހަރުގައި ގެދޮރު ގެއްލިފައި ވާ އިސްލާމް ޢަޒީޒްއެވެ. އެ ކުއްޖާގެ ވާހަކަތަކުގައިވެސް ވަނީ މާޔޫސީ ރާގެކެވެ.

އެ ހިތްދަތި މާޙައުލުގައި ތާރިޤު ފެށި މަސައްކަތުން، ކުދިންގެ ހިތްތަކަށް ކޮންމެވެސް ވަރެއްގެ އުފާވެރި ކަމެއް ވަނީ ލިބެން ފަށާފައެވެ. ޠާރިޤުގެ އިނގިރޭސި ކުލާސްތަކުގައި ކިޔެވުމަކީ، މިއަދު އެ ކުދިންނަށް ލިބޭ އެންމެ ބޮޑު އުފާ ކަމުގައިވެސް ދެންނެވިދާނެއެވެ. މި ހުރިހާ ކަމެއްވެސް ޠާރިޤު ކުރަނީ ހަމަ ހިލޭ ސާބަހަށެވެ. މިއަދު އެއީ އެތައް ކުދިންނެއްގެ ހިތްތަކުން ޚާއްޞަ ޤަދަރަކާއި ލޯތްބެއް ދެވިފައި ވާ "ޠާރިޤު ޓީޗަރެވެ".