އދ. އާންމު މަޖިލީހުގައި ބައިވެރިވެވަޑައިގަތުމަށް ރައީސް ޑރ. މުހައްމަދު މުއިއްޒު އެމެރިކާގެ ނިއުޔޯކަށް ކުރެއްވި ދަތުރުފުޅާއި ގުޅޭ މައުލޫމާތު ހޯދަން އެދުމުން، ކިޔަން ނެނގޭވަރަށް ކޮންޓްރާސްޓް ހައިކޮށް، މައުލޫމާތުތައް ނޭނގޭ ގޮތަށް ލިޔުންތައް ދީފިއެވެ.

މައުލޫމާތު ހޯދައި ލިބިގަތުމުގެ ގާނޫނުގެ ދަށުން ރާއްޖެޓީވީން އެދިފައިވަނީ އދ. އާންމު މަޖިލީހުގައި ބައިވެރިވެވަޑައިގަތުމަށް ރައީސް ޑރ. މުހައްމަދު މުއިއްޒު އެމެރިކާގެ ނިއުޔޯކަށް ކުރެއްވި ދަތުރުފުޅުގައި، ދިވެހިރާއްޖޭގެ ފަރާތުން ބޭއްވި ސައިޑް އިވެންޓުތަކުގައި ދައުލަތުން ޚަރަދުވި ފައިސާގެ ތަފްސީލާއި، މި ދަތުރުފުޅުގައި ރައީސް ޑރ މުޙައްމަދު މުއިއްޒުގެ މީޑިއާ ޓީމުގައި ހިމެނިވަޑައިގަންނަވަނީ ކިތަށް ބޭފުޅުންތޯ އާއި އެބޭފުޅުންނަށް ދައުލަތުން ޚަރަދުވި ފައިސާގެ ތަފްސީލް ހޯދުމަށެވެ.

ނަމަވެސް ރައީސް އޮފީހުން ފޮނުވި ލިޔުންތައް ހުރިގޮތުން އެއިން އެއެއް މިއެއް ވަކިކުރަން ނޭނގެއެވެ. ބައެއް ލިޔުންތައް ހުރީ އަކުރުތައްވެސް ނުފެންނަ ގޮތަށް މުޅި ކަރުދާސް އެއްކޮށް ކަޅުކުލައިގައެވެ. އަދި ލިޔެކިޔުންތަކުގައި ހުރި މުހިންމު މައުލޫމާތާއި ނަންބަރުތަކާއި ނަންތަކާއި ހަރަދުކުރި ތަންތަން ނޭނގޭ ގޮތަށް ކަޅުކުލައިން ކުލަޖައްސާފައެވެ.

ރައީސް އޮފީހުން ހިއްސާކުރި ދައުލަތުގެ ބޮޑު ސިއްރެއްގެ ގޮތަށް ސިފާވާގޮތަށް ދީފައިވާ ލިޔުންތަކުގައިވާ ގޮތުން، ޓިކެޓަށް އެކަނި 37،188 އެމެރިކާ ޑޮލަރު ނުވަތަ 573،439 ދިވެހި ރުފިޔާ ވަނީ ހަރަދުކޮށްފައެވެ. މީގެ ތެރެއިން ދެބޭފުޅަކަށް ނަގާފައިވާ ޓިކެޓުގެ އަގު، ޓިކެޓަކަށް 8714 ޑޮލަރު ނުވަތަ 134،369.9 ދިވެހި ރުފިޔާ އަށް އަރައެވެ. ދެ ޓިކެޓަކަށް 268،739.8 ދިވެހި ރުފިޔާ ވަނީ ހަރަދުކޮށްފައެވެ.

މީގެ އިތުރުން ޓްރާސްޕޮޓޭޝަންގެ ގޮތުގައި އެކޮޅަށް ވަޑައިގެން އެސްޔޫވީ ގައި ދަތުރުކުރަން 810 ޑޮލަރާއި، ލަގޭޖް އުފުލަން 825 ޑޮލަރާއި، 21 ސެޕްޓެމްބަރުން 27 ސެޕްޓެމްބަރަށް ހިފާފައިވާ އެސްޔޫވީ ކާރަކަށް 8050 ޑޮލަރާއި، ދަތުރު ނިންމާފައި އެނބުރި އެއަރޕޯޓަށް ދިއުމަށް އެސްޔޫވީ ގައި ދަތުރުކުރަން 810 ޑޮލަރާއި، ލަގޭޖް އުފުލަން 825 ޑޮލަރު ވަނީ ހަރަދުކޮށްފައެވެ. ޖުމްލަ އެއްގަމު ދަތުރުތަަކަށް އެޑްމިން ފީއާއެކު 13584 އެމެރިކާ ޑޮލަރު ނުވަތަ 209،465.3 ދިވެހި ރުފިޔާ ވަނީ ހަރަދުކޮށްފައެވެ.

މީގެ އިތުރުން ރައީސްގެ އދ ދަތުރުފުޅުތަކަށް ކޮޓަރި ހިފަން އެކަނިވެސް 81،801 އެމެރިކާ ޑޮލަރު ނުވަތަ 1،261،371.4 މިލިއަން ދިވެހި ރުފިޔާ ވަނީ ހަރަދުކޮށްފައެވެ.

މީގެ އިތުރުން ދުބާއީގައި ޓްރާންސިޓްވި އިރު ސިމެއް ގަންނަން 5216.27 ދިވެހި ރުފިޔާއާއި، އިތުރު އެހެން ކަމަކަށް ހަރަދުކޮށްފައިވާ 420 ޑޮލަރަކާއި، އަބޫދާބީގައި ރައީސް އާއި ވަފުދު 6 ގަޑި އިރު ވަރު މަޑުކުރައްވަން އެކަމަޑޭޝަންގެ ގޮތުގައި ހަރަދުކޮށްފައިވާ 11301.92 ދިވެހި ރުފިޔާ ހިމެނެއެވެ.

މީގެ އިތުރުން ސެޕްޓެމްބަރު 21 ވަނަ ދުވަހު ބޭއްވި 25 މީހުން ހިމެނޭ އިވެންޓަކަށް 4053.50 އެމެރިކާ ޑޮލަރު ނުވަތަ 62،504.97 ދިވެހި ރުފިޔާއާއި ހަރަދުކުރީ ކޮންކަމަކަށް ކަމެއް ނޭނގޭ 449.38 އެމެރިކާ ޑޮލަރު ނުވަތަ 6929.44 ދިވެހި ރުފިޔާ ވަނީ ހަރަދުކޮށްފައެވެ.

މީގެ އިތުރުން ނިއުޔޯކުގައި ދަތުރުތައް ކުރުމަށް ވަކި އިންތިޒާމްތަކެއް ހުރިނަމަވެސް އޫބާއަށް 53.63 އެމެރިކާ ޑޮލަރަކާއި، 163.03 އެމެރިކާ ޑޮލަރެއްގެ އިތުރުން ހަރަދުކޮށްފައިވަނީ ކޮންކަމަކަށް ކަމެއް ނޭނގޭ 30.24 ޑޮލަރަކާއި، 810.42 ޑޮލަރަކާއި، 163.91 ޑޮލަރަކާއި، 71.83 ޑޮލަރެއްގެ އިތުރުން 189 ޑޮލަރެއް ހިމެނެއެވެ. މި ހަރަދުތައްކޮށްފައިވަނީ ކޮން ބޭނުމެއްގައި ކީއްކުރަންކަމެއް ތަފްސީލުދީފައިނުވެއެވެ.

މީގެ އިތުރުން ރާއްޖެ އައި އިރު ބަރުދަން ބަރުވެގެން 225 ޑޮލަރެއްވެސް ވަނީ އެކްސެސް ޗާޖްގެ ގޮތުގައި ދައްކާފައެވެ.

ރައީސް އޮފީހުން ދިން ލިޔުންތަކުގައި ބައެއް ސަފްހާތައް ހުރީ އެއްކޮށް ކަޅުކޮށްފައެވެ. އެހެންކަމުން އެ ސަފްހާތަކުގައި ހުރި މައުލޫމާތެއް ސާފެއް ނުވެއެވެ.

މި ދަތުރުފުޅުގައި ރައީސް ޑރ މުޙައްމަދު މުއިއްޒުގެ މީޑިއާ ޓީމުގައި ހިމެނިވަޑައިގަންނަވަނީ ކިތަށް ބޭފުޅުންތޯ އާއި އެބޭފުޅުންނަށް ދައުލަތުން ޚަރަދުވި ފައިސާގެ ތަފްސީލް ހޯދުމަށް ރާއްޖެޓީވީން އެދިފައިވީނަމަވެސް އާރްޓީއައިގެ ޖަވާބުގައި އެ މައުލޫމާތު ހިމަނާފައެއް ނުވެއެވެ.