އެއީ ނިމެމުން މި ދާ ނޮވެމްބަރ މަހުގެ 12 ވީ އާދީއްތަ ދުވަހެވެ. އަވަށްޓެރި އިންޑިއާގެ ބޮޑުވަޒީރު ނަރޭންދްރާ މޯދީގެ ސަރުކާރުގެ އެންމެ ބިޔަ މަޝްރޫޢުތަކުގެ ތެރޭގައި ހިމެނޭ ސިލްކްޔާރާ ޑަންޑަލްގާއޯން ޓަނަލް ބިނާ ކުރުމުގެ މަސައްކަތުގައި އުޅުނު 41 މީހަކު އެތަނުގެ އެތެރޭގައި ތާށިވިއެވެ. ނުކުމެވޭނެ އެއްވެސް މަގެއް ނެތް ގޮތަށް، ޓަނަލުން ބައެއް ވެއްޓުމުގެ ނަތީޖާއަކަށް ވީ 2 ހަފުތާ ފާއިތުވެގެން ދިޔައިރުވެސް އެމީހުން ސަލާމަތް ކުރެވޭނެ ގޮތެއް ނުވުމެވެ. އިންޑިއާގެ ކަމާ ބެހޭ ފަރާތްތަކުން ކެނޑިނޭޅި ކުރަމުން ދާ މަސައްކަތްތަކުންވެސް އެދެވޭ ކުރިއެރުމެއް އަދި އޮތީ ނުލިބިފައެވެ.

ދުނިޔޭގެ އެންމެ ބޮޑު ފަރުބަދަބަރީގެ ގޮތުގައި ސިފަ ކުރާ ހިމާލަޔާ ފަރުބަދައިގެ އިންޑިއާއާ ވީ ފަޅީގައި ތަރައްޤީ ކުރަމުންދާ ހައިވޭ ޓަނަލްގެ މަސައްކަތުގައި އުޅުނު 41 މީހުންގެ ތެރޭގައި ހިމެނޭ އެކަކީ މަޖީތުއެވެ. މަޖީތުގެ ބައްޕަ ޗޯދުރީ ބުނީ، ޓަނަލް ހެދުމުގެ މަސައްކަތަށް ދުވަހަކުވެސް ދެން އޭނާގެ ދަރިފުޅު ނުފޮނުވާނެ ކަމަށެވެ.

ތާށިވި މީހުން ސަލާމަތް ކުރުމުގެ މިޝަންގައި ބޭނުން ކުރަމުން ދިޔަ މެޝިނަރީއަށް ލިބުނު ގެއްލުންތަކާއެކު، ވެއްޓިފައި ވާ ޓަނަލްގެ ބައިތައް ނަގައި، މީހުންނެރެވޭ ވަރުގެ މަގެއް ހެދުމުގެ މަސައްކަތް މިހާރު ކުރިއަށް ގެންދަނީ އަތުން ހިފާ ގެންގުޅޭ ޒާތުގެ ތޮރުފާ ޢާލާތްތައް ބޭނުން ކޮށްގެންނެވެ. ޢުމުރުން އެންމެ 22 އަހަރުގެ މަޖީތުއާއެކު 41 މީހަކު ތާށިވެފައި ތިބެން ޖެހޭނީ އަދި ކިހާ ދުވަހެއް ވަންދެން ކަމެއް ބުނާކަށް އެކަކަށްވެސް ނޭނގެއެވެ.

ޓަނަލް ވެއްޓުނު ސަރަޙައްދުގައި އުފެދިފައި އޮތް ގައުކުނޑީގެ 60 މީޓަރުގެ ސަރަޙައްދެއް ތޮރުފަން ގެނައި ބަރު މެޝިން ހަލާކުވީ ނޮވެމްބަރ 24 ވަނަ ދުވަހުއެވެ. އިންޑިއާ ސަރުކާރުގެ އޮފިޝަލުން ވިދާޅުވި ގޮތުގައި ބާކީ އޮތް 10 ވަރަކަށް ނުވަތަ 15 ވަރަކަށް މީޓަރުގެ ސަރަޙައްދު ތޮރުފަން ޖެހޭނީ، އަތުން ހިފާ ގެންގުޅޭ ޢާލާތްތައް ބޭނުން ކޮށްގެންނެވެ.

ޓަނަލުން ބައެއް ވެއްޓެން ދިމާވި ސަބަބެއް، ރަސްމީ ސިފައެއްގައި އަދި ހާމަކޮށްފައި ނުވި ނަމަވެސް، އިބްތިދާއީ ހޯދުންތަކާ ޙަވާލާދީ، މީޑިއާގައި ދައުރުވާ މަޢުލޫމާތަށް ބަލާއިރު، ޙާދިޘާ ހިނގާފައި ވަނީ ބިންގަނޑުކަނޑައިގެން ދިއުމާ ގުޅިގެންނެވެ. ޓަނަލް އަޅަމުން ދިޔަ ސަރަޙައްދަކީ ޤުދުރަތީ ގޮތުން އެފަދަ ޙާދިޘާތައް ޢާންމު ސަރަޙައްދެއް ކަމަށް މަޢުލޫމާތު ލިބެއެވެ. އެއީ ބިންހެލުންތަކާއި، ބިންގަނޑުކަނޑައިގެން ދިއުމުގެ ހާދިޘާތަކުގެ އިތުރުން، ފެންބޮޑުވުމުގެ ހާދިޘާތައްވެސް ޢާންމު ސަރަޙައްދެއް ކަމަށް ޚަބަރު ލިބެއެވެ.

މިހާތަނަށް ލިބިފައި ވާ އިތުރު މަޢުލޫމާތަށް ބަލާއިރު ޓަނަލް އެޅުމުގެ މަސައްކަތް ކުރިއަށް ގެންގޮސްފައި ހުރީ، ރައްކާތެރިކަމުގެ ގޮތުން ފުރިހަމަ ކުރަންޖެހޭ ކަންކަމަށް މާ ބޮޑު ސަމާލުކަމެއް ނުދީއެވެ. ޙާދިޘާއެއް މެދުވެރިވެއްޖެ ހިނދެއްގައި ނުކުންނާނެ އިމަރޖެންސީ އެގްޒިޓެއްވެސް މަސައްކަތް ކުރިއަށް ދިޔަ ސަރަޙައްދުގައި ނެތް ކަމަށް މަޢުލޫމާތު ލިބެއެވެ.

ޓަނަލްގައި ތާށިވެފައި ތިބި 41 މީހުންނަށް ބޭނުން ވާ ކާބޯތަކެއްޗާއި، ބޯ ފެނާއި ބޭސްފަރުވާގެ ސާމާނު ފޮނުވަނީ ވަގުތީ ގޮތުން އަޅާފައިވާ ހޮޅިއެއް މެދުވެރިކޮށްގެންނެވެ.