ބަޔާން މިއުނިކްގެ ނެދަލެންޑްސްގެ މިޑްފީލްޑަރު، ރަޔާން ގްރަވެންބާކް, 34 މިލިއަން ޕައުންޑަށް ލިވަޕޫލަށް ސޮއިކޮށްފިއެވެ.

އުމުރުން 21 އަހަރުގެ ނެދަލޭންޑްސް ކުޅުންތެރިޔާ ލިވަޕޫލް އާއެކު ސޮއިކުރީ ފަސް އަހަރު ދުވަހުގެ އެއްބަސްވުމެއްގައެވެ. އޭނާ މިދިޔަ އަހަރު އަޔަކްސް އިން ބަޔާން އަށް ބަދަލުވީ 15.8 މިލިއަން ޕައުންޑަށެވެ.

ގްރަވެންބާކް ބުނީ ލިވަޕޫލް އަކީ ދުނިޔޭގެ އެންމެ ބޮޑު އެއް ކުލަބު ކަމާ، އެ ޓީމަށް ކުޅުމުގެ ފުރުސަތު ލިބުމުން ވަރަށް އުފާވާ ކަމަށެވެ. އަދި ޓީމަށް ކާމިޔާބު ހޯދައިދިނުމަށް ކުރެވެން ހުރި ހުރިހާ ކަމެއް ކުރާނެ ކަމަށް އޭނާ ބުންޏެވެ.

ގްރަވެންބާކް އަކީ މީގެކުރިންވެސް ލިވަޕޫލުން ގެންދަން މަސައްކަތްކުރި ކުޅުންތެރިއެކެވެ. ލިވަޕޫލްގައި އޭނާ ބޭނުންކުރާނީ 38 ނަންބަރު ޖާޒީ އެވެ. މި ހޫނުމޫސުމުގައި މެކް އަލިސްޓާ އާއި ސޮބޮސްލައިގެ އިތުރުން އެންޑޯ ވެސް ވަނީ ލިވަޕޫލް އަށް ސޮއިކޮށްފައެވެ.

އަޔެކްސްގެ އެކަޑެމީއިން ތަމްރީނު ފުރިހަމަކޮށް، ގްރަވެންބާކް އޭނާގެ ސީނިއާ ކެރިއަރު ފެށީ 2018 ވަނަ އަހަރުއެވެ. އަޔެކްސް އަށް އޭނާ ވަނީ ޖުމްލަ 103 މެޗު ކުޅެދީ 12 ލަނޑު ޖަހައިފައެވެ.

މިދިޔަ ސީޒަނުގައި ބަޔާން އާއެކު ގްރަވެންބާކް ފަށާފައިވަނީ އެންމެ ތިން މެޗެވެ. މި ސީޒަނުގައި އޯގްސްބާގް ކައިރިން 3-1 ން މޮޅުވި މެޗުގައި އޭނާ ވަނީ ބަދަލު ކުޅުންތެރިއެއްގެ ގޮތުގައި ކުޅެން ނިކުމެފައެވެ.