ސްޓަޓްގާޓަށް ކުޅެމުން އައި ޖަޕާނުގެ ވަޓާރޫ އެންޑޯ 16.2 މިލިއަން ޕައުންޑަށް ލިވަޕޫލްއަށް ސޮއިކޮށްފިއެވެ.

އުމުރުން 30 އަހަރުގެ މިޑްފީލްޑަރު ލިވަޕޫލް އާއެކު ސޮއިކުރީ ހަތަރު އަހަރު ދުވަހުގެ އެއްބަސްވުމެއްގައެވެ. ލިވަޕޫލް އިން އޭނާ ގެނައުމަށް ނިންމީ މޮއިސެސް ކައިސޭޑޯ އާއި ރޯމިއޯ ލަވިއާ ގެނައުމަށް ކުރި މަސައްކަތް ނާކާމިޔާބު ވުމުންނެވެ. މި ދެ ކުޅުންތެރިންވެސް ގުޅިފައިވަނީ ވާދަވެރި ޗެލްސީ އާއެވެ.

އެންޑޯ ބުނީ ޕްރިމިއަރ ލީގުގައި ކުޅުމަކީ އަބަދުވެސް ދެކެމުން އައި ހުވަފެނެއް ކަމަށެވެ. އަދި ދުނިޔޭގެ އެންމެ ބޮޑު އެއް ކުލަބަށް ކުޅުމުގެ ފުރުސަތު ލިބުމުން އުފާވާ ކަމަށް އޭނާ ބުނެފައިވެއެވެ. އޭނާ އިތުރަށް ބުނީ، ޑިފެންސިވްލީ އެނާއަށް ޓީމަށް ވަރަށް ބޮޑަށް އެހީތެރިވެދެވޭނެ ކަމަށެވެ.

މި ފެށުނު ސީޒަނުގައި ލިވަޕޫލްގެ މެދުތެރެއަށް ވަނީ ވަރަށް ބޮޑެތި ބަދަލު ގެނެސެފައެވެ. އެގޮތުން، ޓީމުގެ ކެޕަޓަން ޖޯޑަން ހެންޑަސަން، ފަބީނިއޯ، ކެއިޓާ، މިލްނާ އަދި ޗެމްބަލެއިން ވަނީ ޓީމު ދޫކޮށްލާފައެވެ. އަލަށް ގެނައި މެކަލިސްޓާ އާއި ސޮބޮސްލާއީ އާއެކު ކުޅުނު ފުރަތަމަ މެޗު ވަނީ އެއްވަރު ވެފައެވެ.

ޖަޕާނު ގައުމީ ޓީމުގެ ކެޕްޓަންކަން ކުރަމުން އަންނަ އެންޑޯ ވަނީ އެ ޓީމަށް 50 މެޗު ކުޅެދީފައެވެ. އޭނާ ސްޓަޓްގާޓާ ގުޅުނީ 2019 ވަނަ އަހަރުއެވެ.