އިނގިރޭސި ޕްރިމިއާ ލީގުގައި ޗެލްސީ އާއި ލިވަޕޫލްގެ ކުރިމަތިލުން އެއްވަރުވެގެން ނިމިއްޖެ އެވެ.

ޗެލްސީގެ އަމިއްލަ ދަނޑު، ސްޓެމްފޯޑް ބްރިޖުގައި ކުޅުނު މެޗު ނިމުނީ 1-1 އިން އެއްވަރުވެގެންނެވެ. ޗެލްސީގެ ދަނޑުގައި އެންމެ ފުރަތަމަ ލަނޑު ޖަހައި ކުރި ހޯދީ ލިވަޕޫލް އިންނެވެ. މެޗުގެ 18 ވަނަ މިނެޓުގައި އެ ޓީމަށް ލީޑު ނަގައިދިނީ ލުއިސް ޑިއާޒް އެވެ. އެއީ މިސްރުގެ ފޯވާޑް މުޙައްމަދު ޞަލާޙު ތަނަވަސްކޮށްދިން ފުރުސަތެއްގައި އޭނާ ޖެހި ލަނޑެކެވެ. އޭގެ ފަހުން 29 ވަނަ މިނެޓުގައި ސަލާހު ވަނީ ލަނޑެއް ޖަހައި ލިވަޕޫލަށް ލީޑު ފުޅާ ކޮށްދީފަ އެވެ. ނަމަވެސް، ވީއޭއާރު ބެލުމަށްފަހު ރެފްރީ ނިންމީ ސަލާހު އޮފްސައިޑުގައި ހުރި ކަމަށެވެ. ފުރަތަމަ ހާފު ނިމުމުގެ ކުރިން ޗެލްސީން ވަނީ ލަނޑެއް ޖަހައި ނަތީޖާ ހަމަހަމަ ކޮށްފަ އެވެ. ފުރަތަމަ ހާފުގެ 37 ވަނަ މިނެޓުގައި ނަތީޖާ ހަމަހަމަ ކޮށްދިނީ ޑިސާސީ އެވެ. އެއީ ބެން ޗިލްވެލް ބޮލުން ހުރަސްކޮށްދިން ބޯޅައެއް ގޯލަށް ވައްދާލައިގެންނެވެ. އޭގެ ދެ މިނެޓު ފަހުން ޗިލްވެލް ވަނީ ޗެލްސީ އަށް ލަނޑެއް ޖަހައި ކުރި ހޯދައިދީފަ އެވެ. ނަމަވެސް އޮފްސައިޑުގައި އޭނާ ހުރި ކަމަށް ރެފްރީ ނިންމީ ވީއޭއާރު ބެލުމަށް ފަހު އެވެ.

މިއީ ޗެލްސީގެ ކޯޗުކަމާ މިދިޔަ ޖުލައި މަހުގެ ތެރޭގައި ހަވާލުވި އާޖެންޓީނާގެ މައުރީސިއޯ ޕޮޗެޓީނޯގެ އިރުޝާދުގެ ދަށުން އެ ކުލަބު ކުޅުނު ރަސްމީ ފުރަތަމަ މެޗެވެ. ލީގުގައި ދެން ޗެލްސީ އަށް އޮންނާނީ އޯގަސްޓު މަހުގެ 20 ވަނަ ދުވަހު ރަށުން ބޭރުގައި ވެސްޓް ހޭމް ޔުނައިޓެޑާ ދެކޮޅަށް ކުޅޭ މެޗެވެ. ލިވަޕޫލަށް އޮންނާނީ އަމިއްލަ ދަނޑުގައި އޯގަސްޓު މަހުގެ 19 ވަނަ ދުވަހު ބޯންމައުތާ ދެކޮޅަށް ކުޅޭ މެޗެވެ.