އިނގިރޭސި ޕްރެމިއާ ލީގުގައި ރޭ ލިވަޕޫލް އަތުން 7-0އިން މެންޗެސްޓާ ޔުނައިޓެޑް ބަލިވުމުން އެކުލަބުގެ ލެޖެންޑުންގެ ރުޅިއަތުވެއްޖެ އެވެ.
އެއްވަނާގައިވާ އާސެނަލްއަށްވުރެ 14 ޕޮއިންޓު ފަހަތުން ތިން ވަނާގައި އޮތް ޔުނައިޓެޑްގެ މި ބައްޔަކީ 1931ގެ ފަހުން އެ ޓީމުގެ އެންމެ ބޮޑު ބައްޔެވެ. އަދި މި ބައްޔާއެކު މި ސީޒަނުގެ ޕްރެމިއާ ލީގު ކާމިޔާބު ނުކުރެވޭނެކަން ގާތްގަނޑަކަށްވަނީ ޔަގީންވެފަ އެވެ.
ޔުނައިޓެޑްގެ އެންމެ ކާމިޔާބު ކޯޗު އެލެކްސް ފާގަސަންގެ ދުވަސްވަރު ޓީމުގެ ކެޕްޓަންކަން ކުރި އަޔަލޭންޑްގެ ކުރީގެ ކެޕްޓަން ރޯއި ކީން އަކީ މި ނަތީޖާއާމެދު އެންމެ ބޮޑަށް ނުރުހުންވި އެއް ކުޅުންތެރިޔާ އެވެ.
ލިވަޕޫލްގެ ދަނޑަކީ ޔުނައިޓެޑަށް އެންމެ އުނދަގޫ ތަން. އެކަމަކު މި މެޗުގައި އެއްވެސް ކުޅުންތެރިއަކު އެމީހުންގެ ފެންވަރުގައި ނުކުޅޭ. ހާއްސަކޮށް ސީނިއާ ކުޅުންތެރިން އެމީހުންގެ ލީޑަރޝިޕް ނުދައްކާ. މި މެޗުގައި ޔުނައިޓެޑް ބަލިކޮށްލީ ހަގީގަތުގައި ސީނިއާ ކުޅުންތެރިން. ކުޅުންތެރިންނާ ދިމާލަށް މިހެން ބުނަން ވީމަ ދެރަވެސްވޭ. އެކަމަކު ޔުނައިޓެޑް ކުޅުންތެރިން ތިބިގޮތް ފެނިފައި އަހަރެން ހަމަ ހައިރާންވެއްޖެ. އަހަރެން (ކުޅުނުއިރު) ދުވަހަކު ވެސް މި ގޮތަށް ބައްޔެއްނުވޭ. އެކަމަށް ޝުކުރުވެރިވަންކުރީގެ ކެޕްޓަން ރޯއި ކީން
އޭނާ ބުނީ މެޗުގައި ލިވަޕޫލުން ދެއްކީ ވަރަށް މޮޅު ކުޅުމެއް ކަމަށެވެ. އަދި ޔުނައިޓެޑްގެ އެންމެ ވާދަވެރި ޓީމު ދަނޑުމަތީގައި މޮޅުވާން ބޭނުންވެގެން އުޅުނު ކަމަށާއި މުޅި މެޗަށް ބަލާއިރު ޔުނައިޓެޑްގެ ކުޅުންތެރިން ތިބީ މާބޮޑަށް މަޑުމަޑުން ކަމަށެވެ.
ޔުނައިޓެޑްގެ ކުރީގެ ކެޕްޓަން ގެރީ ނެވިލް ވެސް ބުނީ މި މެޗުގައި އޭނާގެ ކުރީގެ ޓީމު ކުޅުނީ ހީކުރިވަރަށްވުރެ ދަށް ކުޅުމެއް ކަމަށެވެ.
ވަރަށް ރަނގަޅަށް މި ފަހުން ނަތީޖާ ނެރެމުން އައިސް މިރޭ ފެނުނީ ވަރަށް ފަރުވާކުޑަކުޅުމެއް. އެއްވެސް މީހަކު ޒިންމާ ނަގާކަށް ބޭނުމެއްނުވޭ. ކަމެއްވީމަ އެންމެ ފިލާތިބޭތަން ފެނުނު. ޔުނައިޓެޑް 1-0އިން ބަލިވެދާނެ. އެކަމަކު ޔުނައިޓެޑްގެ އެއްވެސް ކުޅުންތެރިއަކު ޓީމު 7-0އިން ބަލިވާން ދޫކޮށްލައިގެންނުވާނެ. އުއްމީދު ކުރަނީ މި ނަތީޖާ ތަކުރާރު ނުވާނެ ކަމަށްކުރީގެ ކެޕްޓަން ގެރީ ނެވިލް
އޭނާ ބުނީ ކޯޗު އެރިކް ޓެންހަގް ވަރަށް އަވަހަށް މި ނަތީޖާއާ މެދު ފިޔަވަޅު އަޅަންޖެހޭ ކަމަށެވެ.
ލިވަޕޫލްގެ ކުރީގެ ޑިފެންޑަރު ގްރޭމް ސޫނެސް ބުނީ ޔުނައިޓެޑް ކޮޅަށްވަން ފުރަތަމަ ގޯލުގެ ޒިންމާ ޑިފެންޑަރު ރަފޭލް ވަރާނޭ ނަގަންޖެހޭ ކަމަށެވެ. އަދި ޔުނައިޓެޑާއި ލިވަޕޫލަށް ވެސް ކުޅުނު މައިކަލް އޮވެން ބުނީ ފުރަތަމަ ގޯލަކީ ޔުނައިޓެޑްގެ ކުޅުންތެރިން ވާހަކަ ނުދައްކައި ތިބުމުގެ ނަތީޖާ ކަމަށެވެ.
ކީޕަރަށް އެބޯޅަ ނުފެންނާނެ. ޑިފެންޑަރުން ވެސް ކީޕަރާ ކޮމިއުނިކޭޓް ނުކުރޭ. އެއީ ވަރަށް ބޮޑު ގޯހެއް. ވަރަށް ސްލޯކޮށް ފަހަތް ފެނިގެންދިޔައީޔުނައިޓެޑާއި ލިވަޕޫލަށް ވެސް ކުޅުނު މައިކަލް އޮވެން
