ބޭނުންޖެހިފައިވާ 150 އަށް ވުރެ ގިނަ އާއިލާއަށް ބޭންކް އޮފް މޯލްޑިވްސް (ބީއެމްއެލް) އިން އެހީތެރިކަން ފޯރުކޮށްދީފިއެވެ.

ބޭނުންޖެހިފައިވާ އާއިލާތަކަށް ބީއެމްއެލުން އެހީތެރިކަން ފޯރުކޮށްދީފައި ވަނީ އެ ފަަދަ ފަރާތްތަކަށް އަސާސީ ކާބޯތަކެތީގެ ޕެކޭޖު ފޮނުވައިގެން ކަމަށް އެ ބޭންކުން ބުނެއެވެ.

ބީއެމްއެލް އިން ބުނީ އެފަދަ އެހީއެއް ފޯރުކޮށްދީފައި ވަނީ ބައިނަލްއަގްވާމީ ގޮތުން ފާހަގަކުރާ އިންސާނިއްޔަތުކަމުގެ ދުވަހާ ގުޅިގެންކަމަށެވެ. ބީއެމްއެލް އިން އެ މަސައްކަތް ކުރިއަށް ގެންގޮސްފައިވަނީ އެޑްވޮކޭޓިން ރައިޓްސް އޮފް ޗިލްޑްރަން (އާކް) އާއި ގުޅިގެންނެވެ.

ފާއިތުވި ހަފްތާ ބަންދާއި ދިމާކޮށް ފެށި މި ޕްރޮގްރާމުގެ ދަށުން މިހާތަނަށް އައި އިރު 150 އަށް ވުރެ ގިނަ އާއިލާތަކަށް ކާބޯތަކެތީގެ ޕެކޭޖް ފޮނުވާފައިވާ ކަމަށް ބީއެމްއެލް އިން ބުނެއެވެ. އަދި މިޕްރޮގްރާމަކީ މާލެ ސަރަހައްދުގައި ތިބި އެހީތެރިކަން ބޭނުންވާ އާއިލާތަކަށް އަމާޒުކޮށްގެން ކުރިއަށް ގެންދިޔަ ޕްރޮގްރާމެއް ކަމަށް ވެސް އެ ބޭންކުން ބުނެއެވެ.

ބީއެމްއެލް އިން ވަނީ މިދިޔަ އަހަރުގެ ރޯދަ މަހު އާއިލާތަކަށް އެހީވުމަށް އާކްއަށް 100،000 ރުފިޔާ ހަދިޔާކޮށްފައެވެ.