ޣައްޒާގައި އިޒްރޭލުން ކުރަމުންދާ ނަސްލު ނައްތާލުމުގެ ހަނގުރާމަ ގައި ބޭނުން ކުރުމަށް، އިޒްރޭލަށް ހަތިޔާރު އުފުލާކަމަށް ޝައްކުކުރެވޭ އެމެރިކާގެ ދެ އުޅަނދަށް ބަނދަރުކުރުމުގެ ހުއްދަ ސްޕެއިނުން ދިނުމަށް އިންކާރުކޮށްފިއެވެ.
އޮކްޓޯބަރު 31 ގައި ނިއު ޔޯކުން ފުރި މާސްކް ޑެންވަރ އާއި ނޮވެމްބަރު 4 ގައި ފުރި މާސްކް ސެލެޓަރ "ސްޕެއިނުގައި ބަނދަރު ނުކުރެވޭނެ" ކަމަށް ސްޕެއިނުގެ ފޮރިން މިނިސްޓްރީގެ ތަރުޖަމާނެއް ބުރާސްފަތި ދުވަހު އެލް ޕައިސް ނޫހަށް ހާމަކުރައްވާފައިވެއެވެ.
ސްޕެއިނުގެ ސަރުކާރުން މި ގޮތައް ނިންމި އިރު، އެ ގައުމުގެ ޤާނޫނު ހަދާ މަޖިލީހުގެ މެންބަރު އެންރިކޭ ސަންޓިއާގޯ ވަނީ "މި މަހުގެ 9 އަދި 14 ގައި އެމެރިކާ އިން އިޒްރޭލަށް ދާ މުދާ އުފުލާ ދެ އުޅަނދު އަލްޖެސިރާސް ބަނދަރު ގައި ޓްރާންސިޓް ކޮށް ފާނެ" ކަމަށް ބަލައި، އެކަމާ ގުޅިގެން ފިޔަވަޅު އެޅުމަށް ސްޕެއިންގެ އެޓާރނީ ޖެނެރަލަށް ދަންނަވާފައެވެ.
އޭނާ އިންޒާރު ދެއްވާފައި ވަނީ އެ އުޅަނދުތައް ސްޕެއިނުގައި ބަނދަރު ކުރުމަކީ އެ ޤައުމުގެ ޖިނާއީ އިޖްރާތުގެ ގާނޫނާ ޚިލާފުވުމެއް ކަމަށެވެ.
މޭ މަހު ސްޕެއިނުން ނިންމާފައިވަނީ އިޒްރޭލަށް ހަތިޔާރު އުފުލާ އުޅަނދުތައް އެ ޤައުމުގެ ބަނދަރުތަކުގައި ބަނދަރުކުރުން މަނާކުރުމަށެވެ. އެއީ އެ ޤައުމުން "ހަނގުރާމައަށް އެހީތެރިވާން ބޭނުންނުވާތީ" އެވެ.
ނަމަވެސް، މި ހަފްތާގެ ކުރީކޮޅު ދެ އެންޖީއޯ އެއް ކަމަށްވާ ޕްރޮގްރެސިވް އިންޓަރނޭޝަނަލް އަދި ފަލަސްތީނު ޔޫތު މޫވްމަންޓް (ޕީވައިއެމް) އިން ކުރި ތަޙުޤީޤަކުން ދައްކާގޮތުގައި މި އަހަރުގެ މޭ މަހާއި ސެޕްޓެމްބަރު މަހާ ދެމެދު މެޑިޓަރޭނިއަން ކަނޑުގައިވާ ދެކުނުގެ އަލްޖެސިރާސް ބަނދަރުގައި އިޒްރޭލަށް ހަތިޔާރު އުފުލާ އެމެރިކާގެ މުދާ އުފުލާ އުޅަނދުތައް މަދުވެގެން 25 ފަހަރު މަޑުކޮށްފައިވެއެވެ.
މި ރިޕޯޓާ ގުޅޭގޮތުން ފޮރިން މިނިސްޓްރީގެ ތަރުޖަމާނެއް މީޑިއާއަށް ވިދާޅުވީ، "މި މައުލޫމާތު ދަނީ ޤައުމުގެ ސަރަޙައްދަށް މުދާ ވެއްދުމާއި ކޮންޓްރޯލް ކުރުމަށް ޒިންމާވާ މިނިސްޓްރީތަކާ އެކު ދިރާސާކުރަމުން ކަމަށާއި އެއީ ކަން ހިނގާދިޔަގޮތް ސާފުކުރުމަށް ކަމަށް އޭނާ ވިދާޅުވިއެވެ.
"މައުލޫމާތު ކަށަވަރުވެއްޖެނަމަ، އަޅަން ޖެހޭ ފިޔަވަޅެއް އަޅާނެ. ފޮރިން މިނިސްޓްރީން މި މައްސަލައާ ގުޅޭގޮތުން ސްޕެއިނުން ނިންމާފައިވާ ގޮތާ އެއްގޮތަށް ޢަމަލު ކުރާކަން ޔަޤީން ކުރުމަށް ކޮންޓްރޯލްތައް ހަރުދަނާކުރުމަށް ތަކުރާރުކޮށް މިގެންދަނީ ގޮވާލަމުން." ތަރުޖަމާނު ހާމަކުރެއްވިއެވެ.
މެއި މަހުގެ ފަހުކޮޅު، ނޯވޭ، އަޔަލޭންޑް އަދި ސްލޮވީނިއާ ފަދަ ޤައުމުތަކާއެކު ސްޕެއިން އިން ވަނީ ފަލަސްތީނަކީ ދައުލަތެއްގެ ގޮތުގައި ބަލައިގަނެފައެވެ.
އިންޓަނޭޝަނަލް ކޯޓް އޮފް ޖަސްޓިސް (އައިސީޖޭ) ގައި އިޒްރޭލުގެ މައްޗަށް ނަސްލު ނައްތާލުމުގެ ދަޢުވާ އުފުލުމަށް ތާއީދުކުރި ފުރަތަމަ ވިލާތުގެ ޤައުމަކީ ވެސް ސްޕެއިނެވެ.2023 ވަނަ އަހަރުގެ އޮކްޓޯބަރު 7 ވަނަ ދުވަހު އިޒްރޭލުން ޣައްޒާގައި ހަނގުރާމަ ފެށި ފަހުން، އިޒްރޭލުގެ ހަމަލާތަކުގައި 43،469 ފަލަސްތީނު ރައްޔިތުން ވަނީ ޝަހީދުކޮށްލާފައެވެ. މީގެ ތެރޭގައި ގިނައީ އަންހެނުންނާއި ކުޑަކުދިންނެވެ. އަދި 102،561ށް ވުރެ ގިނަ މީހުން ޒަޚަމްވެފައިވެއެވެ.
ފާއިތުވި ހަފްތާގައި، ސްޕެއިންގެ ސިވިލް ގާޑް ފުލުހުންނަށް ހަތިޔާރު ގަތުމަށް އިޒްރޭލުގެ ކުންފުންޏަކާއެކު ވެފައިވާ އެއްބަސްވުން ސްޕެއިން ވަނީ ބާޠިލުކޮށްފައެވެ. މިއީ އިޒްރޭލަށް ހަތިޔާރު ނުވިއްކުމަށް ސްޕެއިނުން ނިންމާފައިވާ ނިންމުން އިތުރަށް ފުޅާކޮށް، ހަތިޔާރު ގަތުން ވެސް ހުއްޓާލުމަށް ނިންމި ނިންމުމެކެވެ.
