ކައުބަތުﷲ ގެފުޅުގެ އުރަކޮޅު މިއަހަރުގެ ޙައްޖު ދުވަހުގައި ބަދަލު ނުކުރާގޮތަށް ސަޢުދީ އަރަބިއްޔާއިން ނިންމައިފިއެވެ.

ގެފުޅުގެ އުރަކޮޅު ނުވަތަ ކިސްވާ ބަދަލުކުރަނީ ކޮންމެ އަހަރެއްގެވެސް ހައްޖު މަހުގެ 9 ވަނަ ދުވަހުއެވެ. މިފަހަރު ގެފުޅުގެ އުރަކޮޅު ބަދަލުކުރުމަށް ނިންމާފައިވަނީ ހައްޖު މަހާއި ޖެހިގެން އަންނަ މުހައްރަމް މަހުގެ 1 ވަނަ ދުވަހުއެވެ. ނަމަވެސް މިއަހަރު ގެފުޅުގެ އުރަކޮޅު ބަދަލުކުރާ ދުވަސް ފަސްކުރި ސަބަބެއް ސައުދީގެ ކަމާއިބެހޭ ފަރާތްތަކުން ހާމައެއް ނުކުރެއެވެ.

ކޮންމެ އަހަރެއްގެ ހައްޖާއި ދިމާކޮށް ގެފުޅުގެ އުރަކޮޅު ކިސްވާއަށް ވެސް ބައެއް ބަދަލުތައް ގެނެއެވެ. މިގޮތުން ކިސްވާ ތިރިން ފެށިގެން ވަކިވަރަކަށް ވުރެ މައްޗަށް ހިއްލައެވެ. އަދި ކިސްވާގެ ތިރީ ކައިރީގައި ޙައްޖުވެރިންގެ އިހްރާމް ސިފަވާގޮތަށް ހުދު ފޮތި ގަނޑެއް ހަރުކުރެއެވެ. ގެފުޅުގެ އުރަކޮޅު ތައްޔާރު ކުރުމަށް 670 ކިލޯގެ މޮޅު ފަށުވި އާއި 120 ކިލޯގެ ރަން ބަރަންޏާއި، 100 ކިލޯގެ ރިހި ބަރަނި ބޭނުން ކުރެއެވެ.

އުރަކޮޅު ބަދަލުކުރުމަށްފަހު ހައްޖުގެ އަޅުކަން ނިމެންދެން އުރަކޮޅު ވަކިހިސާބަކަށް ބަހައްޓައެވެ. މީގެ ބޭނުމަކީ ހައްޖުވެރިން ތަވާފުގެ އަޅުކަން އަދާކުރާއިރު، އުރަކޮޅަށް ލިބިދާނެ ގެއްލުމަކުން ސަލާމަތްކުރުމެވެ.

މިއަހަރު ހައްޖުގެ އަޅުކަމަށްދިޔަ 1 މިލިއަން ހައްޖާޖީންނަށް ސައުދީން ވަނީ މަރުހަބާ ކިޔާފައެވެ. މިއީ ކޮވިޑް-19ގެ ހާލަތަށްފަހު މިހާ ގިނަ އަދަދެއްގެ ހައްޖުވެރިން ހައްޖުގެ އަޅުކަމުގައި ބައިވެރިކުރާ ފުރަތަމަ ފަހަރެވެ. ސައުދީން ވަނީ ހައްޖާޖީންނަށް މަރުހަބާ ކިޔުމަށް ބެނާތައް ދަމާފައެވެ.

މިއަހަރުގެ ހައްޖުގެ އަޅުކަމުގައި 1 މިލިއަން ހައްޖާޖީން ބައިވެރިވާއިރު، މީގެ ތެރެއިން 850،000 ހައްޖާޖީންނަކީ ދުނިޔޭގެ އެކި ކަންކޮޅުތަކުން ހައްޖުގެ އަޅުކަމުގައި ބައިވެރިވާ މީހުންނެވެ. ސައުދީ ސަތުކާރުން ބުނިގޮތުގައި އާދިއްތަ ދުވަހުގެ ނިޔަލަށް އެކި ގައުމުތަކުން 650،000 ހައްޖާޖީން ވަނީ ސައުދީއަށް ގޮސްފައެވެ.

2019 ވަނަ އަހަރު 2.5 މިލިއަން މީހުން ވަނީ ހައްޖުގެ އަޅުކަމުގައި ބައިވެރިވެފައެވެ. އެއަށްފަހު 2021 ވަނަ އަހަރު ކޮވިޑް-19 ގެ ހާލަތާއި ގުޅިގެން ހައްޖުގެ އަޅުކަމުގައި ބައިވެރިކޮށްފައިވަނީ ކޮވިޑް ވެކްސިން ފުރިހަމަކޮށްފައިވާ ސައުދީގައި ދިރިއުޅޭ މީހުން އެކަންޏެވެ.

މިއަހަރުގެ ހައްޖުގެ އަޅުކަމުގެ ތެރެއިންވެސް ކޮވިޑުން ރައްކާތެރިވުމަށް ފިޔަވަޅުތަކެއް އެޅިގެންދާނެއެވެ.