ރާއްޖޭގައި ފުރަތަމަ ފަހަރަށް ބާއްވާ ގައުމީ ބިލިއާޑް މުބާރާތުގެ ކުޅުން ބުދަ ދުވަހުގެރޭ ފަށައިފިއެވެ.

މޯލްޑިވްސް ޕޫލް ބިލިއާޑް އެސޯސިއޭޝަން (އެމްޕީބީއޭ) އިން އިންތިޒާމުކުރާ މި މުބާރާތަކީ ރާއްޖޭގައި ބާއްވާ އެންމެ އަގުބޮޑު ބިލިއާޑް މުބާރާތެވެ. "ލިޓަސް ގައުމީ ބިލިއާޑް ޗެމްޕިއަންޝިޕް 2021" ގެ ނަމުގައި ކުރިއަށްދާ މި މުބާރާތުގައި ޖުމްލަ ހަ އިވެންޓެއް ކުރިއަށްދެއެވެ. އެއީ ޓީމު އިވެންޓާއި، ފިރިހެން ފުރަތަމަ ޑިވިޝަނާއި، ފިރިހެން ދެވަނަ ޑިވިޝަނާއި، އަންހެން ޑިވިޝަނާއި، ޑަބަލްސްގެ އިތުރުން މިކްސް ޑަަބަލްސްއެވެ.

މި މުބާރާތުގެ ކުޅުން ބުދަ ދުވަހުގެރޭ ފެށިއިރު، މުބާރާތް ހުޅުވުމުގެ ރަސްމިއްޔާތު ޝަރަފުވެރިކޮށްދެއްވީ މޯލްޑިވްސް އޮލިމްޕިކް ކޮމިޓީ (އެމްއޯސީ) ގެ ރައީސް މުޙައްމަދު އަބްދުލް ސައްތާރު (ޗަމްޕީ) އެވެ. މި ރަސްމިއްޔާތުގައި ވާހަކަދައްކަވަމުން ޗަމްޕީ ވިދާޅުވީ ނޮން އޮލިމްޕިކް ކުޅިވަރުތަކަށްވެސް ގައުމުތަކުގެ އޮލިމްޕިކް ކޮމިޓީތައް މެދުވެރިކޮށް އެހީތެރިކަން ފޯރުކޮށް ދިނުމަށް ބާރުއަޅާއި އިންޓަނޭޝަނަލް ކުޅިވަރު އޮގަނއިޒޭޝަންތަކުގައި ވަކާލަތު ކުރަމުންދާ ކަމަށެވެ. އެހެންކަމުން ބިލިއާޑް އެސޯސިއޭޝަނަށްވެސް އެ އެހީތެރިކަން ލިބިގެންދާނެ ކަމަށް ވަނީ ވިދާޅުވެފައެވެ. 

މި މަހުގެ 15 ވަނަ ދުވަހުގެ ނިޔަލަށް ގައުމީ ބިލިއާޑް ސެންޓަރުގައި މި މުބާރާތް ކުރިއަށްދާއިރު، ފިރިހެން ފުރަތަމަ ޑިވިޝަނާއި ދެވަނަ ޑިވިޝަނުގެ އިތުރުން އަންހެން ޑިވިޝަން ކުރިއަށްދަނީ ގައުމީ ރޭންކިންގެ އެންމެ ކުރީގައި އޮތް 32 ކުޅުންތެރިން ހިމެނޭ ގޮތަށް 9 ބޯލްސް، ޑަބަލް އެލިމިނޭޝަން އުސޫލުންނެވެ.

މި މުބާރާތުގެ ޑަބަލްސް އިވެންޓް ކުރިއަށްދަނީ އަންހެން އަދި ފިރިހެން ޑަބަލްސް ޕެއާތައް އެއްކޮށް 10 ބޯލްސް، ޑަބަލް އެލިމިނޭޝަން އުސޫލުންނެވެ. އަދި މިކްސްޑް ޑަބަލްސް އިވެންޓް ކުރިއަށްގެންދަނީ މުބާރާތުގައި ބައިވެރިވި ހުރިހާ މިކްސް ޑަބަލްސް ޕެއާތައް އެއްކޮށް 8 ބޯލްސް، ޑަބަލް އެލިމިނޭޝަން އުސޫލުންނެވެ.

މީގެ އިތުރުން މި މުބާރާތުގެ އެންމެ ފޯރިގަދަ އިވެންޓް ކަމަށްވާ ޓީމު އިވެންޓުގައި ވާދަކުރުމުގެ ފުރުސަތުދީފައި ވަނީ ކޮމިޝަނާ އޮފް ސްޕޯޓްސްގައި ރަޖިސްޓްރީ ކޮށްގެން ހިންގާ ޓީމުތަކަށެވެ. އަދި ކޮންމެ ޓީމެއްގައިވެސް ބިދޭސީ ކުޅުންތެރިޔަކު ޖެހުމުގެ ހުއްދަ އެމްޕީބީއޭއިން ވަނީ ދީފައެވެ.

ރާއްޖޭގައި ބާއްވާ އެންމެ އަގުބޮޑު ބިލިއާޑް މުބާރާތުގެ ގޮތުގައި މި މުބާރާތް ފާހަގަކޮށްލެވޭއިރު، ޖުމްލަ ހަ ކެޓަގެރީއަކުން އެތުލީޓުން ވާދަކުރާ މުމި ބާރާތުގެ އިނާމުގެ ގޮތުގައި ކަނޑައަޅާފައިވާ އަދަދު 150،000 (އެއް ލައްކަ ފަންސާސް ހާސް) އަށްވުރެ މައްޗަށް އަރައެވެ.