ވެކްސިން ފުރިހަމަކޮށްފައިވާ، އެހެން ގައުމުތަކުގެ މީހުންނަށް އުމްރާވުމުގެ ފުރުސަތު ހުޅުވާލަން ސައުދީ ސަރުކާރުން ނިންމައިފިއެވެ.
ސައުދީ އަރަބިއާއިން އެހެން ގައުމުތަކުގެ އުމްރާވެރިންނަށް އުމްރާވުމުގެ ފުރުސަތު ހުޅުވާލަން ނިންމާފައިވަނީ ކޮވިޑް-19 އާ ގުޅިގެން އަހަރަކަށްވުރެ ގިނަ ދުވަސް ވަންދެން މި ފުރުސަތު ބަންދުކޮށްފައި އޮތުމަށްފަހުއެވެ. މި މުއްދަތުގައި އުމްރާވުމުގެ ފުރުސަތު ހުޅުވާލާފައި އޮތީ ހަމައެކަނި އެ ގައުމުގައި ދިރިއުޅޭ މީހުންނަށެވެ.
އެހެން ގައުމުތަކުގެ އުމްރާވެރިންނަށް އުމްރާވުމުގެ ފުރުސަތު ދިނުމަށް މި މަހުގެ 9 ވަނަ ދުވަހުން ފެށިގެން އުމްރާވުމަށް އެދި ހުށަހަޅާފައިވާ ފޯމުތައް ބަލައިގަތުމަށް ސައުދީ ސަރުކާރުން ވަނީ ނިންމާފައެވެ. އަދި އުމްރާވެރިން އުމްރާވުމަށް އެދި ހުށަހަޅާ ފޯމާއެކު ވެކްސިން ފުރިހަމަކުރި ކަމުގެ ލިޔުން ހުށަހަޅަން ޖެހޭނެ ކަމަށް ސައުދީ ސަރުކާރުން އަންގާފައިވާކަމަށް ބޭރުގެ މީޑިއާތަކުގައި ވަނީ ރިޕޯޓުކޮށްފައެވެ.
ސައުދީން ގަބޫލުކުރާގޮތުގައި ހައްޖުވުމާއި އުމްރާވުމަށް ހުޅުވާލުމުން މަހެއްގެ މައްޗަށް 60،000 އަށްވުރެ ގިނަ މީހުން އަޅުކަންކުރުމަށް ދާނެއެވެ. އުމްރާވުމުގައި ކޮވިޑް-19 އިން ރައްކާތެރިވުމަށް އަޅަންޖެހޭ ފިޔަވަޅުތައް އެޅުމަށް ސައުދީ ސަރުކާރުން ވަނީ އަންގާފައެވެ.
ސައުދީ އަރަބިއާއަށް އެތެރެވުން މަނާ ގައުމުތަކުގެ ގޮތުގައި ކަނޑައަޅާފައިވާ ގައުމުތަކުން އަންނަ އުމްރާވެރިން އެ ގައުމަށް އެތެރެވާގޮތަށް ކަރަންޓީންގެ މުއްދަތެއް ފުރިހަމަކުރަންޖެހޭނެ ކަމަށް އެ ގައުމުގެ ސަރުކާރުން ވަނީ ބުނެފައެވެ.
ކޮވިޑް-19ގެ ހާލަތާ ގުޅިގެން ހައްޖުވުމާއި އުމްރާވުން މެދުކަނޑާލުމަށްފަހު ސައުދީގައި ދިރިއުޅޭ މީހުންނަށް މި ހުރުމަތްތެރިވެގެންވާ ބިން ހުޅުވާލީ މިދިޔަ އަހަރުގެ އޮކްޓޯބަރު މަހުއެވެ. އެއީ ވެސް ކޮވިޑް-19ގެ ހާލަތުގައެވެ. މި ހާލަތުގައި އުމްރާވުމާއި، ހައްޖުވުމަށް ހުޅުވާލިއިރު، ހައްޖުވެރިންނާއި އުމްރާވެރިން ވަކި ގޮތަކަށް އަމަލުކުރަން ސައުދީ ސަރުކާރުން އަންގާފައިވެއެވެ.
