މޫނުބުރުގާ އެޅުން މަނާކުރުމަށް ސްރީލަންކާގެ ކެބިނެޓަށް ހުށަހަޅާފައިވާ ހުށަހެޅުން ފާސްކޮށްފިއެވެ.
ގައުމީ ސަލާމަތަށް ހުރި ނުރައްކަލެއް ކަމަށް ބުނެ އާންމު ތަންތަނުގައި މޫނުބުރުގާ އެޅުން މަނާކުރުމަށް ޕަބްލިކް ސެކިއުރިޓީ މިނިސްޓަރު ސަރަތު ވީރަސޭކަރަ ހުށަހެޅުއްވި ހުށަހެޅުން ކެބިނެޓުން ފާސްކޮށްފައިވަނީ އަންގާރަ ދުވަހުއެވެ. އޭނާގެ ހުށަހެޅުއްވުމުގައި ބުރުގާއަކީ، މުޅި ގަޔާއި މޫނު ނިވާވާހެން މުސްލިމު ބައެއް އަންހެނުން ލައިއުޅޭ އަންނައުނެއް ކަމަށް ވިދާޅުވެފައިވެއެވެ. އަދި އެއީ ދީނުގައި ހައްދުފަހަނައެޅުމުގެ ސިފައެއްކަން ފާހަގަކުރައްވާ، މޫނުބުރުގާއެޅުން މަނާކޮށްފިނަމަ ގައުމުގެ ސަލާމަތީ ކަންކަން އިތުރަށް ވަރުގަދަވެގެން ދާނެކަމަށް ވިދާޅުވެފައިވެއެވެ.
ލަންކާގެ ބައެއް ފައްޅިތަކަށާއި ހޮޓާތަކަށް 2019 ވަނަ އަހަރު އަމިއްލައަށް މަރުވެގެން ބަޔަކު ދިން ހަމަލާތަކަށްފަހު، ބުރުގާއެޅުން ވަގުތީގޮތުން މަނާކުރެވުނެވެ. މި ހަމަލާތަކުގައި 260 މީހުން މަރުވިއިރު، އޭގެ ޒިންމާ ނަގާފައިވަނީ އައިސިސްއާ ގުޅުންހުރި އެގައުމުގެ ދެ ޖަމާއަތަކުންނެވެ.
މޫނުބުރުގާ އެޅުން މަނާކުރުމަށް ހުށަހަޅާފައިވާ ހުށަހެޅުން ކެބިނެޓުން ފާސްކޮށްފައި މިވަނީ ގިނަ ބައެއްގެ ފާޑުކިޔުންތައް އަމާޒުވެފައި ވަނިކޮށެވެ. އެގައުމުގައި ހުންނަވާ ޕާކިސްތާނުގެ ހައިކޮމިޝަނަރު ސާދު ޚަތަކް ވަނީ ބުރުގާ މަނާކުރުމަކީ މުސްލިމުންގެ އިހްސާސްތަކަށް ދެވޭ ދެރައެއްކަމަށް ވިދާޅުވެ ޓްވީޓްކުރައްވާފައެވެ.
ދީނީ މިނިވަންކަމާ ގަބޫލު ކުރުންތަކަށް ވަކާލާތު ކުރައްވާ އދ ގެ ސްޕެޝަލް ރެޕެޓުއަރ އަދި ރާއްޖޭގެ ކުރީގެ ޚާރިޖީ ވަޒީރު ޑރ. އަހްމަދު ޝަހީދު ވެސް މިކަމަށް ފާޑުވިދާޅުވެފައިވެއެވެ. ޑރ.ޝަހީދު ވިދާޅުވީ މި ހުށަހެޅުމަކީ ދީނީ މިނިވަންކަން ހިމާޔަތް ކުރުމަށް ހެދިފައިހުރި ބައިނަލްއަގުވާމީ ގާނޫނުތަކާއި ފުށުއަރާ ހުށަހެޅުމެއް ކަމަށެވެ.
މި ހުށަހެޅުން ދެން ފޮނުވާނީ އެގައުމުގެ އެޓާނީ ޖެނެރަލްގެ ޑިޕާޓްމެންޓަށެވެ. އެއަށްފަހު ހުށަހެޅުން ގާނޫނަކަށް ބަދަލުވެގެންދާނީ މަޖިލީހުން ފާސްކުރުމުންނެވެ. އެގައުމުގެ ގާނޫނު ހަދާ މަޖިލީހަކީ ސަރުކާރުގެ މެޖޯރިޓީ ލިބިފައިވާ ތަނަކަށް ވުމުން، މި ހުށަހެޅުން ފާސްކުރުމަށް ދަތިތަކެއް ހުންނާނެ ކަމަށް ނުބެލެވެއެވެ.
ސްރީލަންކާއަކީ 22 މިލިއަން މީހުންގެ އާބާދީއެއް އޮންނަ ގައުމެކެވެ. އޭގެތެރެއިން ނުވަ އިންސައްތައަކީ މުސްލިމުންނެވެ. އަދި 70 އިންސައްތަ ބުދިސްޓް ދީނަށް ނިސްބަތްވާއިރު، 15 އިންސައްތައަކީ ހިންދޫންނެވެ.
