ގްރީން ކްލައިމެޓް ފަންޑް (ޖީސީއެފް) ގެ ހިލޭ އެހީގެ ދަށުން މިނިސްޓްރީ އޮފް އެންވަޔަރަންމަންޓުން ހިންގާ މަޝްރޫއުގެ ދަށުން ރާއްޖޭގެ މޫސުމީ ވިއުގައަށް އިތުރުކުރެވޭ ހަ އޮޓޯމެޓިކް ވެދަރ ސްޓޭޝަން، މޯލްޑިވްސް މީޓިއޮރޮލޮޖިކަލް ސާރވިސް އާއި ހަވާލުކޮށްފިއެވެ.

މިނިސްޓްރީ އޮފް އެންވަރަޔަންމަންޓް އާއި ޔޫއެންޑީޕީ ގުޅިގެން ކުރިއަށްގެންދާ، 'ސަޕޯޓިންގ ވަލްނަރަބަލް ކޮމިއުނިޓީސް އިން މޯލްޑިވްސް ޓު ކްލައިމެޓް ޗޭންޖް އިންޑިއުސްޑް ވޯޓަރ ޝޯޓޭޖަސް'، މި މަޝްރޫއުގެ ދަށުން ރާއްޖޭގެ ހަ ސަރަހައްދެއްގައި އޮޓޮމެޓިކް ވެދަރ ސްޓޭޝަން ހަރުކުރުމަށްވަނީ ހަމަޖެހިފައެވެ.

މިއީ ރާއްޖޭގެ މޫސުން ކުރިއަށް ލަފާކުރުމުގައި، މޯލްޑިވްސް މީޓިއޮރޮލޮޖިކަލް ސަރވިސްގެ ވެދަރ ސްޓޭޝަނެއް ގާއިމުކުރެވިފައި ނެތް ސަރަހައްދުތަކުގެ މޫސުން ސީދާ ކަމާއިއެކު ފުރިހަމައަށް ގެނެސްދިނުމުގެ މަޤުޞަދުގައި ކުރިއަށް ގެންދެވޭ މަސައްކަތެކެވެ. މީގެ ސަބަބުން "މޫސުމީ ވިއުގަ" އިތުރަށް ހަރުދަނާ ކުރުމަށް އިތުރުކުރެވިގެންދާނެއެވެ.

މި އޮޓޮމެޓިކް ވެދަރ ސްޓޭޝަންތަށް ސަޕްލައިކުރުމުގެ މަސައްކަތް ހަވާލުކުރެވިފައިވަނީ އިޓަލީގެ ކުންފުންޏެއް ކަމަށްވާ ސީ.އޭ.އީ. އެސް.ޕީ.އޭ އަށް 119,200 ޔޫރޯއަށެވެ. އަދި މި އެންޓެނާތައް ހަރުކުރުމުގެ މަސައްކަތް ހަވާލު ކުރެވިފައިވަނީ މެކްސްޓަރ މޯލްޑިވްސް އަށް 737،760.00 ރުފިޔާއަށެވެ. މި މަސައްކަތުގެ ޖުމްލަ އަގަކީ 2,973,952.00 ރުފިޔާ (ދެ މިލިއަން ނުވަލައްކަ ހަތްދިހަތިންހާސް ނުވަސަތޭކަ ފަންސާސް ދެ ރުފިޔާ) އެވެ.

މި ވެދަރ ސްޓޭޝަންތައް ގާއިމުކުރުމުގެ މައިގަނޑު މަޤްސަދަކީ މޫސުމަށް އަންނަ ބަދަލުތައް ދެނެގަނެ ވާރޭ ނުވެހުމުގެ ސަބަބުން ކުރިމަތިވާ ފެނުގެ ދަތިކަމަށް ހައްލު ހޯދުމުގެ ގޮތުން މޫސުން ލަފާކުރުމެވެ. މިގޮތުން، މެދު ކެނޑުމެއްނެތި މޫސުން ލަފާކުރުމާއި، ރާއްޖޭގައި ގާއިމުކުރެވިފައިހުރި އެއް ސްޓޭޝަނާއި އަނެއް ސްޓޭޝަނާއި ދޭތެރޭގައި ހުރި ދުރުމިނުގެ ސަބަބުން ކުރިމަތިވާ ޑާޓާ ގެޕް ކުޑަ ކުރެވިގެންދާނެއެވެ.

މި ސްޓޭޝަންތައް ހަރުކުރުމުގައި ބަލާފައިވަނީ މޫސުމާބެހޭ އިދާރާގެ ނެޓްވޯކް އިތުރަށް ހަރުދަނާ ކުރުމަށް، އެ ފަރާތުން ބޭނުންވާ އެންމެ އެކަށޭނެ ރަށްތަކުގައެވެ. އެގޮތުން، މި މަސައްކަތުގެ ދަށުން މި ވެދަރ ސްޓޭޝަންތައް ހަރުކުރުމަށް ހަމަޖެހިފައިވަނީ ރ. އަލިފުށި، ރ. ދުވާފަރު، ފ. ބިލެއްދޫ، ށ. ކޮމަންޑޫ، އދ، މަހިބަދޫ އަދި ސ. ހުޅުމީދޫ ގައެވެ.

މި މަސައްކަތުގެ އިތުރުން ޖީސީއެފް މަޝްރޫއުގެ ދަށުން މޯލްޑިވްސް މީޓިއޮރޮލޮޖިކަލް ސާރވިސް އާއި ގުޅިގެން މޫސުން އެޕްލިކޭޝަން އިތުރަށް ތަރައްޤީ ކުރުމުގެ މަސައްކަތް ދަނީ ކުރެވެމުންނެވެ. މި އެޕްލިކޭޝަން ފުރިހަމަވުމުން އެންޓެނާތަކުން ލިބޭ މޫސުމީ މައުލޫމާތު ހަރުދަނާ ކުރެވި، ސީދާކަމާއިއެކު އެސްއެމްއެސްއެއްގެ ޒަރިއްޔާއިން އެ ހިދުމަތް ބޭނުންކުރާ ފަރާތްތަކަށް ފޯރުކޮށްދެވިގެންދާނެއެވެ.

މި މަސައްކަތްތައް ފުރިހަމަވުމުން، ރާއްޖޭގެ މޫސުމާއި އަދި ވާރޭވެހޭނެ މިންވަރު ހަރުދަނާ ގޮތެއްގައި އަންދާޒާކޮށް ބޯފެން ނަގައި ރައްކާކުރުން އިތުރަށް ފަސޭހަވެގެން ދާނެއެވެ.

މީގެއިތުރުން މި މަޝްރޫޢުއަކީ 9 މެއި 2017 އިން ފެށިގެން ފަސް އަހަރު ދުވަހުގެ މުއްދަތައް ފެނުގެ ޚިދުމަތުގެ ދާއިރާ ހަރުދަނާ ކުރުމަށް ގިނަ މަސައްކަތްތަކެއް ހިމެނޭގޮތައް ކުރިއަށްދާ މަޝްރޫއެކެވެ. މި މަޝްރޫޢުގެ ދަށުން ކުރިއަށްގެންދާ މައިގަނޑު މަސައްކަތްތަކުގެ ތެރޭގައި ދިވެހިރާއްޖޭގެ 29 ރަށެއްގެ ޖުމްލަ 19,871 ގެ އާބާދީއަކަށް ސާފު އަދި ރައްކާތެރި ބޯފެން ފޯރުކޮށްދިނުމުގެ އިތުރުން މުޅި ރާއްޖެއަށް އަމާޒުކޮށްގެން ފެނާ ނަރުދަމާގެ ޚިދުމަތުގެ ދާއިރާ ހަރުދަނާ ކުރުމަށް ގިނަ މަސައްކަތްތައް ދަނީ ކުރަމުންނެވެ.

އެގޮތުން، ފެނުގެ ފަށަލަ ދިރާސާކޮށް މޮނިޓަރ ކުރުމާއި، ހޫނުމޫސުމަށް ފެނަށް ޖެހޭ ރަށްރަށަށް ފެންފޯރުކޮށްދޭނެ ޕްލޭން އެކުލަވާލުމާއި، ސެކްޓަރއަށް ބޭނުންވާ މީހުން ބިނާ ކުރުމާއި ހޭލުންތެރިކުރުމުގެ ޕްރޮގްރާމްތައް ހިންގުމާއި، ފެނާއި ނަރުދާމާގެ ޓެރިފް އަދި ފައިނޭންޝަލް މޮޑެލްއެއް އެކުލާވާލުން ފަދަ މަސައްކަތްތައް ހިމެނެއެވެ.