ކޮވިޑު އަލާމީވަބާއާ ގުޅިގެން ބަންދުކުރި ރާއްޖޭގެ ބޯޑަރު އަލުން ހުޅުވާލި ފުރަތަމަ ފަހަރަށް ފަހުން ރާއްޖެއަށް ދަތުރުކުރި ފަސިންޖަރުންގެ އަދަދު 3000 ން މައްޗަށް އަރައިފިއެވެ.

އެކަމާ ގުޅޭގޮތުން ރާއްޖެޓީވީގެ "ފަށާއިރު" ޕްރޮގްރާމަށް ދެއްވި އިންޓަރވިއުއެއްގައި އެއަރޕޯޓުގެ ޓަރމިނަލް އޮޕަރޭޝަންސް ޖެނެރަލް މެނޭޖަރ އިބްރާޙިމް ޙަސަން ވިދާޅުވީ، ނިމިދިޔަ ޑިސެމްބަރު މަހުގެ 5 ވަނަ ދުވަހަކީ ރާއްޖެ އައި ފަސިންޖަރުންގެ އަދަދާއި، ރާއްޖެއިން ފުރި ފަސިންޖަރުންގެ އަދަދުވެސް ރެކޯޑަކަށް އެރި ދުވަހެއްކަމަށެވެ.

އެގޮތުން އިންޓަރނޭޝަނަލް ފްލައިޓްތަކުން ހޮނިހިރު ދުވަހު 3053 ފަސިންޖަރުން ރާއްޖެ އައިސްފައިވާ ކަމަށާއި، 2504 ފަސިންޖަރުން ރާއްޖެއިން ފުރާފައިވާކަން އިބްރާހިމް ހަސަން ހާމަކުރެއްވިއެވެ. މިއީ ކޮވިޑުގެ ޙާލަތުގެ ކުރިން ރާއްޖެއަށް އެންމެ ގިނައިން ފަތުރުވެރިން އަންނަ ޗައިނާގެ ފަތުރުވެރިންނަށް ދަތުރުނުކުރެވޭ ޙާލަތުގައިވެސް އެކަށީގެންވާ ރަނގަޅު އަދަދުތަކެއްކަން އޭނާ ފާހަގަކުރެއްވިއެވެ.

އޭގެ އިތުރުން، ހޮނިހިރު ދުވަހު އިންޓަރނޭޝަނަލް 20 ފްލައިޓެއް އޮޕަރޭޓް ކޮށްފައިވާކަން ފާހަގަ ކުރައްވައި އިބްރާޙިމް ވިދާޅުވީ، މިއީ ބޯޑަރު ހުޅުވާލި ފަހުން އެންމެ ގިނަ ފްލައިޓް އޮޕަރޭޓް ކުރި ދުވަސްކަމަށެވެ. މީގެ ކުރިން އެންމެ ގިނަ ފްލައިޓް އޮޕަރޭޓް ކޮށްފައިވަނީ މިދިޔަ ނޮވެމްބަރު މަހުގެ 29 ވަނަ ދުވަހުއެވެ.

ކޮވިޑުގެ ޙާލަތުގެ ކުރިން އާންމު ގޮތެއްގައި ރާއްޖެއަށް 4000 އާއި 5000 އާ ދެމެދުގެ އަދަދެއްގެ ފަސިންޖަރުން އަންނަ ކަމަށް އެއަރޕޯޓުން މައުލޫމާތުދެއެވެ. މީގެ ތެރޭގައި ގިނައީ ފަތުރުވެރިންގެ ގޮތުގައި ރާއްޖެއަށް ޗުއްޓީ ހޭދަކުރަން އަންނަ ފަރާތްތައްކަން ފާހަގަކޮށްލެވެއެވެ.

މި އަހަރު ރާއްޖެއަށް ޒިޔާރަތް ކުރާނެ ކަމަށް ބެލެވެނީ 500،000 ފަތުރުވެރިންކަމަށް، އެ ދާއިރާގައި ހަރަކާތްތެރިވާ ފަރާތްތަކުން ބުނަމުންދާއިރު، ކުރިއަށް އޮތީ ފަތުރުވެރި ކަމުގެ ސިނާއަތުގެ ސީޒަން ދުވަސްތައް ކަމަށްވާތީ، މިހާރު ރާއްޖެއަށް ޒިޔާރަތްކުރާ ފަތުރުވެރިންގެ އަދަދު ދެގުނަ ވެގެންދާނެކަމަށް ލަފާކުރެވެއެވެ.

ނިމިދިޔަ 2019 ވަނަ އަހަރު ރާއްޖެއަށް 1.7 މިލިއަން ފަތުރުވެރިން ޒިޔާރާތް ކޮށްފައިވާއިރު، އެއީ މިހާތަނަށް ރާއްޖެއަށް އެންމެ ގިނަ ފަތުރުވެރިން ޒިޔާރާތްކުރި އަހަރެވެ. ކޮވިޑުގެ ހާލަތު ދިމާވުމުގެ ކުރިން މި އަހަރު ރާއްޖެއަށް 2 މިލިއަން ފަތުރުވެރިން އަންނާނެ ކަމަށް އަންދާޒާކުރިއެވެ.