ފަތުރުވެރިކަމުގެ ސިނާއަތް ކުރިއަރައިގެންދާނީ އަންހެނުންގެ ހިއްސާ އިތުރު ކުރެވިގެން ކަމަށް ޓުއަރިޒަމް މިނިސްޓަރ ޑރ. އަބްދުﷲ މައުސޫމް ވިދާޅުވެއްޖެއެވެ.
ބޯޑަރ މައިލްސް އިފްތިތާހު ކުރުމުގެ ރަސްމިއްޔާތުގައި އާދިއްތަ ދުވަހުގެ ރޭ ވާހަކަ ދައްކަވަމުން މިނިސްޓަރ ޑރ. މައުސޫމް ވިދާޅުވީ މި ސިނާއަތް ކުރިއެރުވުމަށް ގިނަ ކަންތައްތަކެއް ކުރަން ޖެހޭ ކަމަށެވެ. މި އަހަރު ދުނިޔޭގެ ފަތުރުވެރިކަމުގެ ސިނާއަތުގެ ޝިއާރަކީ ފަތުރުވެރިކަމާއި ރަށްފުށުގެ ތަރައްޤީކަން ފާހަގަކުރައްވާ މިނިސްޓަރ ޑރ. މައުސޫމް ވިދާޅުވީ މި ޝިއާރަކީ ރައީސުލްޖުމްހޫރިއްޔާ އިބްރާހީމް މުހައްމަދު ސާލިހްގެ ރިޔާސީ ވައުދުފުޅެއްގެ އިތުރުން އެޖެންޑާ 19 ގެ ސިޔާސަތުތަކާއި ލާމެހިފައިވާ ޝިއާރެއް ކަމަށެވެ.
ފަތުރުވެރިކަމުގެ މަންފާ ގިނަ ދިވެހިންނަށް ލިބިގެންދާނީ ގިނަ ދިވެހިން ފަތުރުވެރިކަމުގެ ވެރިންނަށް ވެގެން. ރަށްރަށުގެ ކުދި ހޮޓާތަކާއި ގެސްޓް ހައުސްތައް ފައިދާ ލިބޭނެ ގޮތަކަށް ހިންގައިގަނެގެން. ފަތުރުވެރިކަމުގެ ދާއިރާ ދިވެހިން ބޭނުންވާ ބޮޑު މުސާރަ ލިބޭ ވަޒީފާތައް ލިބިގެން. ފަތުރުވެރިކަމުގެ ސިނާއަތުގައި އަންހެނުންގެ ހިއްސާ އިތުރު ކުރެވިގެން. ދަނޑުވެރިންނާއި މަސްވެރިންނާއި ފަންނުވެރިންނާއި ފަންނާނުންގެ ބައިވެރިވުން އިންޑަސްޓްރީގައި އޮތުމަށް ޖާގަ ދީގެން. އަޅުގަނޑުމެން މަސައްކަތްތައް ބައްޓަން ކުރާނީ އިރާދަކުރެއްވިއްޔާ މިކަންތައްތައް ހާސިލު ކުރުމަށް.ޓުއަރިޒަމް މިނިސްޓަރ ޑރ. އަބްދުﷲ މައުސޫމް
ބޯޑަރުތައް ހުޅުވާލެވުނު މަދު ޤައުމުތަކުގެ ތެރޭގައި ރާއްޖެ ހިމެނޭކަން ފާހަގަކުރައްވާ މިނިސްޓަރ ޑރ. މައުސޫމް ވިދާޅުވީ ރައީސް ސާލިހްގެ މި ނިންމެވުމަކީ ވަރަށް ހިތްވަރުގަދަ ނިންމެވުމެއް ކަމަށެވެ. އަދި ބޯޑަރު ހުޅުވާލި ނަމަވެސް ސަރުކާރުން އެންމެ ބޮޑަށް ބަލަނީ ރައްޔިތުންނާއި މުވައްޒަފުންގެ ސަލާމަތާއި ރައްކާތެރިކަމަށް ކަމަށާއި ރާއްޖެ މިއޮތީ ފަތުރުވެރިކަމުގެ ދާއިރާ އިން ދުވަހަކު ވެސް ނުދެކޭ ހީނަރުކަމެއްގެ ތެރޭގައި ކަމަށް ވިދާޅުވިއެވެ.
ރާއްޖޭގައި މިހާރު ސަފާރީތަކާއި ރިސޯޓުތައް ހުޅުވާލެވިފައިވާ ކަމަށާއި މަސައްކަތް ކުރަމުންދަނީ އޮކްޓޯބަރު މަހުގެ ތެރޭގައި ގެސްޓް ހައުސްތައް ވެސް ހުޅުވާލުމަށް ކަމަށް މިނިސްޓަރ ވިދާޅުވިއެވެ.
މި ޕްރޮގްރާމް ވުޖޫދަށް ގެނައުމަށްޓަކައި އިމިގްރޭޝަނުން އިސްނަގާފައިވާތީ އެކަމަށްޓަކައި މިނިސްޓަރ މައުސޫމް ޝުކުރު އަދާކުރެއްވިއެވެ.
2021 ވަނަ އަހަރާއި ރާއްޖެ ކުރިމަތިލާނީ ފަތުރުވެރިކަމުގެ ސިނާއަތުގެ ބޮޑެތި ކުރިއެރުންތަކާއެކު ކަމަށް މިނިސްޓަރ ވިދާޅުވިއެވެ.
ބޯޑަރ މައިލްސް އަކީ ރާއްޖެ އިޝްތިހާރުކޮށް ރިޕީޓް ފަތުރުވެރިން އިތުރު ކުރުމަށާއި ކޮވިޑުގެ ސަބަބުން ކުރިމަތިވި ގޮންޖެހުންތަކުން އަރައިގަތުމަށް ފެށި ޕްރޮގްރާމެކެވެ.
