‏ކޮވިޑް-19 އާއި ގުޅިގެން ދެވޭ ފްރަންޓްލައިން އެލަވަންސް ސިފައިންނާއި ފުލުހުންނަށްވެސް ޖަމާކުރަން ފަށައިފިއެވެ.

އެކަމާ ގުޅޭގޮތުން "ރާއްޖެއެމްވީ"އަށް މައުލޫމާތު ދެއްވަމުން ފިނޭންސް މިނިސްްޓްރީގެ މީޑިއާ އޮފިޝަލު ވަނީ އެ ފަރާތްތަކަށް ފްރަންޓްލައިން އެލަވަންސް ޖަމާ ކުރަން ފަށާފައިވާކަން ކަށަވަރު ކޮށްދެއްވާފައެވެ.

ފްރަންޓްލައިން ވޯކަރުންނަށް ހާއްސަ އެލެވަންސެއް ދިނުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ނިންމެވިކަން އިއުލާން ކުރެއްވީ މިދިޔަ މެއި މަހުގެ 7 ގައެވެ. އެގޮތުން ކޮވިޑާ ދެކޮޅަށް ކުރީ ސަފުގައި މަސައްކަތްކުރާ ފަރާތްތަައް ތިން ގިންތިއަކަށް ބަހާލައިގެން ފްރަންޓްލައިން އެލަވަންސެއް ދިނުމަށް ނިންމާފައިވާކަން ސަރުކާރުން ހާމަކޮށްފައިވެއެވެ.

ކޮވިޑް-19 އާއި ގުޅިގެން ކުރީ ސަފުގައި މަސައްކަތްކުރާ ފަރާތްތަކަށް މިހާތަނަށް 33.2 މިލިއަން ރުފިޔާ ދޫކޮށްފައިވާ ކަމަށް ނިމިދިޔަ ހަފްތާގައި ފިނޭންސް މިނިސްޓްރީން އާންމުކުރި ތަފާސް ހިސާބުތަކުން ދައްކައެވެ. އެގޮތުން ތިން ކެޓަގަރީ އަކަށް ބަހާލައިގެންދޭ މި އެލަވަންސް ދެނީ ހައި ރިސްކު ކެޓަގަރީ، މީޑިއަމް ރިސްކު ކެޓަގަރީ، އަދި ލޯ ރިސްކު ކެޓަގަރީ އަށް ބަހާލައިގެންނެވެ.