ޓޫރިޒަމް މިނިސްޓްރީގެ ސީނިއާ އެގްޒެކެޓިވްގެ މަގާމުގައި ހުންނެވި އަލީ ހާޝިމް (ސްމިތު) އާ ގުޅޭ ފުރައްސާރައިގެ މައްސަލަ ޕްރޮސެކިއުޓަރ ޖެނެރަލް (ޕީޖީ) އޮފީހަށް ފޮނުވުމުގެ މަސައްކަތް ކުރަމުންދާ ކަމަށް ފުލުހުން ބުނެފިއެވެ.
އަންހެނަކާ ދިމާއަށް "ރޭޕް ކުރީމަ ކަޑަވަނީ" ތޯ ވިދާޅުވެ ސުމިތު ކުރެއްވި ޓްވީޓަކާ ގުޅިގެން، ފުރައްސާރައިގެ މައްސަލައެއް އޭނާއާ ދެކޮޅަށް ހުށައެޅުނެވެ. އެކަމާ ގުޅޭގޮތުން ފުލުހުން ބުނީ، އެ މައްސަލައިގެ ތަހުޤީޤު ނިންމައި، ޕީޖީ އޮފީހަށް ފޮނުވުމަށް ކުރަން ޖެހޭ މަސައްކަތްތައް މިހާރު ކުރިއަށްދާ ކަމަށެވެ.
އެ ޓުވީޓާއި ގުޅޭގޮތުން ސުމިތު މީގެކުރިން ވިދާޅުވެފައިވަނީ، އެއީ އޭނާއަށް އޮޅިގެން ކުރެއްވުނު ޓްވީޓެއް ކަމަށެވެ. އެގޮތުން އަވަސް އަރުވާލައިގެން ޓްވީޓު ފޮނުވަން އުޅުމުގެ ތެރޭގައި މާނަ އޮޅޭ ގޮތަށް ލިޔެވުނީ ކަމަށް ވިދާޅުވެ އޭނާ ވަނީ މާފަށް އެދިވަޑައިގެންފައެވެ.
ސްމިތްގެ މި ޓުވީޓާއި ގުޅިގެން ނުރުހުން ފާޅުކޮށް، މިއީ ސަރުކަރާށް ލަދެއް ކަމަށް މީހަކު ކުރި ޓުވީޓަކަށް ކޮމެންޓް ކުރައްވަމުން ރައީސް އޮފީހުގެ ތަރުޖަމާނު އިބްރާހިމް ހޫދު ވަނީ އެ މީހާގެ ވާހަކަ އަށް ތާއީދު ކުރައްވާފައެވެ. އަދި ކަމާބެހޭ ފަރާތްތަކުން އެ މައްސަލަ ބަލަމުންދާ ކަމަށް ގަބޫލު ކުރައްވާ ކަމަށް އޭރު ވިދާޅުވިއެވެ.
އެ ޓުވީޓާ ގުޅިގެން ސްމިތާ ދެކޮޅަށް ފުރައްސާރައިގެ މައްސަލައެއް ފުލުހުންނަށް ހުށަހަޅާފައިވަނީ ޖުލައި 12 ވަނަ ދުވަހުއެވެ.
