ހުޅުމާލެ ދެވެނަ ފިޔަވަހީގައި ތިން ސްކޫލް އިމާރާތްކުރާނެ ފަރާތްތަކެއް ހޯދުމުގެ މަސައްކަތް ފިނޭންސް މިނިސްޓްރީން ފަށައިފިއެވެ.
ކޮންޓްރެކްޓަރ ފައިނޭންސްގެ ދަށުން ޑިޒައިން އެންޑް ބިލްޑް އުސޫލުން ހުޅުމާލެ ފޭސް 2 ގައި ސްކޫލްތައް އިމާރާތް ކުރުމުގެ މަސައްކަތަށް ޝަރުތުހަމަވާ ފަރާތެއް ހޯދުމުގެ ކަންތައް ކުރިޔަށް ގެންދެވޭނީ އިންޓަރނޭޝަނަލް ކޮމްޕެޓިޓިވް ބިޑިންގ (އައިސީބީ) އުސޫލުގެ މަތިންނެވެ. މި ކަމަށް ކުރިމަތިލާ ފަރާތްތަކުގައި ހުންނަންޖެހޭ ޝަރުޠުތަކާއި އިވެލުއޭޓްކުރެވޭ ކްރައިޓީރިއާގެ މައުލޫމާތު ބީލަން ފޮތުގައި ހިމަނާފައި ވެއެވެ.
ފިނޭންސް މިނިސްޓްރީން ބުނީ މި މަސައްކަތްތަކާއި ބެހޭ އެންމެހައި ލިޔެކިޔުންތައް 20 ސެޕްޓެމްބަރުން ފެށިގެން ސޮފްޓްކޮޕީ ފޯރމެޓުގައި އެ މިނިސްޓްރީގެ ވެބްސައިޓުން ޑައުންލޯޑް ކުރެވެން ހުންނާނެ ކަމަށެވެ. އަދި މި ބީލަމާއި ގުޅިގެން ދޫކުރެވޭ އެންމެފަހުގެ މަޢުލޫމާތުތަށް ވެބްސައިޓް މެދުވެރިކޮށް ހޯދުމަކީ ބީލަމަށް ކުރިމަތިލާ ފަރާތުގެ ޒިންމާއެއް ކަމަށެވެ.
ހުޅުމާލޭ ދެވަނަ ފިޔަވަހީގައި ގިނަ ސްކޫލްތަކެއް އަޅަން އެޑިއުކޭޝަން މިނިސްޓްރީން ވަނީ ނިންމާފައެވެ. ސްކޫލްތައް އެޅުމަށް ނިންމާފައިވަނީ، އެ ސަރަހައްދަށް ހިޖުރަކުރާ ފަރާތްތަކަށް ބޭނުންވާ ހިދުމަތްތައް ފޯރުކޮށްދިނުމަށާއި މާލޭގެ ސްކޫލްތައް އެއް ދަންފަޅިއަށް ބަދަލުކުރުމަށް މަގުފަހި ކުރުމަށެވެ.
މާލެ ސަރަހައްދުގެ ސްކޫލްތައް އެއް ދަންފަޅިއަށް ބަދަލުކުރުމަށް، މި ސަރަހައްދުގައި 100 ދަރިވަރުންގެ ޖާގައިގެ 10 ސްކޫލެއް އަޅަންޖެހޭ ކަމަށް އެޑިއުކޭޝަން މިނިސްޓްރީގެ އޮޑިޓަކުން ވަނީ ދައްކާފައެވެ. މި ސްކޫލްތައް ހުޅުމާލޭގައި އެޅުމަށް ނިންމާފައިވާއިރު، 2022 ވަނަ އަހަރުގެ ކުރިން އެ މަސައްކަތް ނިންމާލުމަށް އެޑިއުކޭޝަން މިނިސްޓްރީން ވަނީ އަމާޒު ހިފާފައެވެ.
މިހާތަނަށް ހުޅުމާލެ ދެވަނި ފިޔަވަހީގައި އެއްވެސް ސްކޫލެއް އަޅާފައެއް ނުވެއެވެ. ނަމަވެސް، މިހާރު އިމާރާތްކޮށް ނިމިފައިވާ ހިޔާ މަޝްރޫއުގެ ފްލެޓްތަކުގައި މީހުން ދިރިއުޅެން ފަށަންވާއިރަށް ދެ ސްކޫލެއް އިމާރާތްކުރުމުގެ މަސައްކަތް ކުރަމުން އަންނަކަމަށް ހައުސިންގ ޑިވެލޮޕްމަންޓް ކޯޕަރޭޝަނު (އެޗްޑީސީ) އިން ވަނީ އިއުލާންކޮށްފައެވެ.
މިތަނުން އެއް ސްކޫލް ޑިޒައިންކޮށް ނިމިފައިވާއިރު މިހާރު އޮތީ ޓެންޑަރ މަރުހަލާގައެވެ. އަދި ދެވަނަ ސްކޫލް އިންޓަރނޭޝަނަލް ސްކޫލެއްގެ ގޮތުގައި ތަރައްގީކުރުމަށް ބޭރުގެ ފަރާތަކާ މަޝްވަރާކުރެވެމުން ދާކަމަށް ވެސް އެޗްޑީސީން ވަނީ މައުލޫމާތު ދީފައެވެ.
