ރާއްޖެ އަންނަ ފަތުރުވެރިންގެ އަތުން 100 ޑޮލަރު ނެގުމަކީ ސަރުކާރުގެ ސިޔާސަތެއް ނޫން ކަމަށް ނެޝަނަލް އެމަރޖެންސީ އޮޕަރޭޝަން ސެންޓަރ (އެންއީއޯސީ) ގެ ތަރުޖަމާނު މަބްރޫކް އަޒީޒު ވިދާޅުވެއްޖެއެވެ.

ނިއު ނޯރމަލްގައި ރާއްޖެ އަންނަ ކޮންމެ ފަތުރުވެރިއަކު ވެސް 100 ޑޮލަރު ވިސާ ފީއެއްގެ ގޮތުގައި ދައްކަން ޖެހޭނެ ކަމަށް "ސޭފް ޓުއަރިޒަމް ގައިޑް ލައިން" ޑްރާފްޓްގައި ބުނެފައިވާތީ، އެކަމާއި ގުޅިގެން މަބްރޫކް ވިދާޅުވީ ރާއްޖެ އަންނަ ފަތުރުވެރިންގެ އަތުން ބޮލަކަށް 100 ޑޮލަރު ނަގަން ނިންމަފައިވާ ކަމަށް ދެކެވޭ ވާހަކަތަކަކީ ޓުއަރިޒަމް މިނިސްޓްރީގެ ފަރާތުން ޓުއަރިޒަމް އިންޑަސްޓްރީގެ ސްޓޭކް ހޯލްޑަރުންނާއި މަޝްވަރާ ކުރުމަށް ހުށަހެޅިފައިވާ ލިޔުމަކާއި ގުޅިގެން ދެކެވިފައިވާ ވާހަކަތަކެއް ކަމަސެވެ. އަދި މިއީ ސަރުކާރުގެ ސިޔާސަތެއް ނޫން ކަމަށް މަބްރޫކް ވިދާޅުވިއެވެ.

މީގެ އިތުރުން މަޝްވަރާ ކުރުމަށްޓަކައި ފަތުރުވެރިކަމުގެ ދާއިރާގެ ސްޓޭކް ހޯލްޑަރުންނަށް ވަނީ އެބޭފުޅުންގެ ހިޔާލު ހޯދުމަށް ޓުއަރިޒަމް މިނިސްޓްރީގެ ފަރާތުން ލިޔުމެއް ފޮނުވާފައި ކަމަށް މަބްރޫކް ވިދާޅުވިއެވެ.

މަބްރޫކް ވިދާޅުވީ އެގްޒިޓް ސްޓްރެޓެޖީއެއް ރޭވެމުންދާ އިރު، އަދި ރާއްޖެ ނިއު ނޯމަލްއަކަށްދާ އިރު، ކުރަމުންދާ މަސައްކަތުގެ ތެރެއިން އެކި އިންޑަސްޓްރީތަކުން އެ އިންޑަސްޓްރީތަކުގެ ހޯލްޑަރުންނާއި ވާހަކަ ދެއްކުމަށް އަދި ހިޔާލު ހޯދުމަށް ފޮނުވަމުންދާނެ ކަމަށެވެ. އަދި ސިޔާސަތުތައް ރޭވެމުންދާނީ އެ ހިޔާލުތަކަށް ބިނާކޮށް ކަމަށް މަބްރޫކް ވިދާޅުވިއެވެ.