ކޮވިޑް-19 އާއި ގުޅިގެން ށ. ފުނަދޫ އިން އެޅި ރައްކާތެރިކަމުގެ ފިޔަވަޅުތަކަށް ލުއިދޭން އެ ރަށު ކައުންސިލުން ނިންމައިފި އެވެ.

ފުނަދޫ ކައުންސިލުން ބުނީ ވޭތުވެ ދިޔަ ދުވަސްތަކުގެ ތެރޭގައި އެ ރަށުން ކޮވިޑް-19 އަށް ޝައްކުކުރެވޭ މީހަކު ފެނިފައި ނުވާތީއާއި، ބަލި ފެތުރޭ ރަށްރަށުން މިހުން އައުން މަނާކުރެވިފައިވާތީ މެއި 13 ގައި ކައުންސިލުން އަޅާފައިވާ ރައްކާތެރިކަމުގެ ފިޔަވަޅު ތަކުގެ ތެރެއިން ބައެއް ފިޔަވަޅުތައް އުވާލަން ނިންމާފައިވާ ކަމަށެވެ.

ނަމަވެސް ރޭގަނޑު 11:00ން ފެށިގެން ހެނދުނު 06:00 އާއި ދެމެދު ޒަރޫރީ ބޭނުމެއްގައި ފިޔަވައި، ގެއިންބޭރުގައި އުޅުމަކީ މަނާކަމެއް ކަމަށާއި، އެފަދަ ބޭނުމެއްގައި ނުކުމެވޭނީ ފުނަދޫ ޕޮލިސް ސްޓޭޝަންގެ ޚާއްސަ ހުއްދައެއް ހޯދުމަށްފަހުގައި ކަމަށެވެ. އަދި ޒަރޫރީ ބޭނުމެއްގައި ފިޔަވާ އެހެން އެހެން ރަށްރަށަށް ދަތުރު ކުރުމަކީ މަނާކަމެއް ކަމަށާއި، އެފަދަ ބޭނުމެއްގައި ދަތުރު ކުރެވޭނީ ފުނަދޫ ކައުންސިލުގެ ޚާއްސަ ހުއްދައެއް ހޯދުމަށް ފަހުގައި ކަމަށެވެ.

މީގެ އިތުރުން ރައްކާތެރިވުމަށް އަޅާފައިވާ ފިޔަވަޅުތައް އުވާލި ނަމަވެސް މާސްކު އަޅައިގެން ނޫންގޮތަކަށް ގެއިން ބޭރަށް ނުކުމެ ނޫޅުމާއި، ގުރޫޕް ހަދައިގެން ބޭރަށް ނުކުތުމާއި، ފިނިބުރުޖެހުމާއި، އާންމުތަންތަނަށް އެއްވެނޫޅުން އަދި ފިހާރަ ތަކުން ޚިދުމަތް ހޯއްދެވުމުގައި ގައިދުރުކަމަށް ޚާއްސަ ސަމާލުކަމެއް ދިނުމަށް ވަނީ އިލްތިމާސްކޮށްފަ އެވެ.