ލޮކްޑައުންގައި ގޭގައި ގިނަ ވަގުތުތަކެއް ހޭދަކުރާއިރު، ކަސްރަތު ކުރުމަށް ޚާއްސަ ސަމާލުކަމެއް ދިނުމަށް ހެލްތު ޕްރޮޓެކްޝަން އެޖެންސީގެ އެފިޑަމޮލޮޖިސްޓް ޑރ. އިބްރާހީމް އަފްޒަލް އިރުޝާދު ދެއްވައިފި އެވެ.
ހޯމަ ދުވަހުގެރޭ ނޭޝަނަލް އިމަރެޖެންސީ އޮޕަރޭޝަންސް ސެންޓަރ (އެންއީއޯސީ) ގައި ބޭއްވި ނޫސްވެރިންގެ ބައްދަލުވުމުގައި ކަސްރަތު ކުރުމަށް ބާރު އަޅުއްވައި ވާހަކަ ދައްކަވަމުން ޑރ. އަފްޒަލް ވިދާޅުވީ، ލޮކްޑައުންގައި ތިބޭއިރު ބަރުދަން އިތުރުވާކަން ފާހަގަ ކުރެވިފައިވާ ކަމަށެވެ.
އެގޮތުން ގޭގައި ތިބޭއިރު، ކަސްރަތު ކުރުމަށް ޚާއްސަ ސަމާލުކަމެއް ދޭން ޖެހޭ ކަން ފާހަގަ ކުރައްވައި ޑރ. އަފްޒަލް ވިދާޅުވީ، ޚާއްސަކޮށް ގޭގައި ތިބެގެން ކުރެވިދާނެ ކަސްރަތުތައް ހުންނާނެ ކަމަށާއި، މި ދަނޑިވަޅުގައިވެސް ސިއްޙަތަށް ޚާއްސަ ސަމާލުކަމެއް ދޭން ޖެހޭނެ ކަމަށެވެ.
ލޮކްޑައުންގައި ތިބޭއިރު އެކަށީގެންވާ ކަމެއްމީ އަޅުގަނޑުމެންގެ ބަރުދަން އިތުރުވުން، އެހެންވީމާ ހަޤީޤަތުގައި ވަރަށް ރަނގަޅު ފުރުސަތެއް މީ ގޭގައި ތިއްބަވާއިރު ފެމިލީ އެންމެންވެސް ކޮންމެސް ވަރަކަށް ފިޒިކަލް އެކްސަސައިޒް ކުރުން، ގޭގައި ކުރެވޭ ޒާތުގެ ފިޒިކަލް އެކްސަސައިޒް، ކަސްރަތު ކުރަން އެބަ ޖެހޭ އެއީ ވަރަށް މުހިއްމު ކަމެއް،ޑރ އިބްރާހިމް އަފްޒަލް
ޑޮކްޓަރ އިތުރަށް ވިދާޅުވީ، މިއީ ވިއްސާރަ މޫސުމަކަށް ވުމާއެކު މަދިރި އުފެދޭފަދަ ތަންތަން ނައްތާލުމަށް ޚާއްސަ ސަމާލުކަމެއް ދޭން ޖެހޭނެ ކަމަށެވެ. އޭގެ އިތުރުން، ގޭގައި އުޅޭ ހައި-ރިސްކް މީހުންނަށް ޚާއްސަ ސަމާލުކަމެއް ދިނުމާއި، ބޭރުން ގެނެވޭ ތަކެތި ރައްކާތެރިކަމާއެކު ޑިސްއިންފެކްޓް ކުރުމުގެ އިތުރުން، އިޖުތިމާއީ ގައިދުރުކަމާއި ސާފްތާހިރުކަމަށް ޚާއްސަ ސަމާލުކަމެއް ދިނުމަށް ޑޮކްޓަރ ވަނީ އިލްތިމާސް ކުރައްވާފަ އެވެ.
