ޕެންޝަން ފައިސާ އޭގެ ޙައްޤުވެރިންނަށް ލިބޭނެ ކަމުގެ ފުރިހަމަ ޔަޤީންކަންދޭ ކަމަށް މޯލްޑިވްސް ޕެންޝަން އެޑްމިނިސްޓްރޭޝަން އޮފީހުން ބުނެފި އެވެ.
އާދިއްތަ ދުވަހުގެރޭ ރާއްޖެޓީވީގެ ކޮވިޑް-19 ކަވަރޭޖަށް ދެއްވި ޚާއްޞަ އިންޓަވިއުއެއްގައި ޕެންޝަން އޮފީހުގެ އެކްޓިންގ ޗީފް އެގްޒެކެޓިވް އޮފިސަރ، އަދި ޗީފް އޮޕަރޭޓިންގ އޮފިސަރ ސުޖާތާ ހަލީމް ވިދާޅުވީ، ޕެންޝަން ފައިސާ އޭގެ ޙައްޤުވެރިންނަށް މަހުން މަހަށް ލިބިގެންދާނެ ކަމުގެ 100 އިންސައްތަ ޔަޤީންކަން ދެއްވާ ކަމަށެވެ. އަދި އެކަމުގައި އެއްވެސް މައްސަލައެއް ދިމާ ނުވާނެ ކަމުގެ ފުރިހަމަ ޔަޤީންކަން ދެއްވާކަމަށް އޭނާ ވިދާޅުވި އެވެ.
އޭގެ އިތުރުން، މިހާރުވެސް މަސައްކަތް ކުރަމުންދަނީ ޕެންޝަން ފައިސާ ރައްކާތެރިކަމާއެކު ބެލެހެއްޓުމަށްކަން ފާހަގަ ކުރައްވައި ސުޖާތާ ވިދާޅުވީ، ޕެންޝަން އޮފީހުގެ ހުރިހާ މުވައްޒަފުން ވެސް މިވަގުތު ގޭގައި ތިބެގެން މަސައްކަތް ކުރަމުންދާ ކަމަށެވެ.
ސުޖާތާ ވިދާޅުވީ، ޕެންޝަން ފަންޑަށް ޖަމާ ކުރާ ފައިސާ ހުންނާނީ އިންވެސްޓް ކުރެވިފައި ކަމަށާއި، ޕްރައިވެޓް ސެކްޓަރަށް އެކަނި ބަލާލި ނަމަވެސް 1 ބިލިއަނަށްވުރެ ގިނަ ރުފިޔާ އިންވެސްޓް ކުރެވިފައިވާ ކަމަށެވެ. އަދި ބޭންކް ތަކުގައިވެސް އިންވެސްޓްމަންޓްތައް ހަދާފައިވާކަން އޭނާ ފާހަގަ ކުރެއްވި އެވެ.
ކޮވިޑް-19 އާ ގުޅިގެން ރާއްޖެއަށް ދިމާވެފައިވާ ޙާލަތުގައި ޕެންޝަން ފަންޑުގައި ހުރި ފައިސާ ނެގުމަށް އާންމުންގެ ބައެއް ފަރާތްތަކުން ގޮވާލަމުން ދާއިރު، އެކަމާ ގުޅޭގޮތުން ސުޖާތާ ވިދާޅުވީ، އެފަދަ ނިންމުމެއް ނިންމުމުގެ ކުރިން ދުރު މުސްތަޤްބަލަށް ވިސްނަން ޖެހޭނެ ކަމަށާއި، އެކަމުގެ ސަބަބުން ދައުލަތުގެ މާލީ ނިޒާމަށް އަންނާނެ ލޮޅުމާމެދު ވެސް ވިސްނަންޖެހޭނެ ކަމަށެވެ.
މި ފައިސާ އަޅުގަނޑުމެން ލިކުއިޑޭޓް ކުރާކަމަށް ވަންޏާ ނުއަގުގައި މިޖެހެނީ ފައިސާ ލިކުއިޑޭތް ކުރަން، އެހެންވެއްޖެ ނަމަ އޭގެ ގެއްލުންވެސް މިވަނީ އަޅުގަނޑުމެންގެ ބެނެފިޝަރީސްއަށް، އަނެއްކާ މިއީ ބޭންކްތަކުން ލޯނުތައްދީ މިކަންކަން ކުރަމުންދާ ވަގުތެއް، މިކަހަލަ ދަނޑިވަޅެއްގައި މުޅި ފައިނޭންޝަލް ސިސްޓަމަށްވެސް ލޮޅުންތަކެއް އެރުމުގެ ފުރުސަތު އޮންނާނެ ކުރިއަށް ވިސްނާ ނުލާ އެކަހަލަ ކަމެއް ކޮށްފިކަމަށްވަންޏާޕެންޝަން އޮފީހުގެ އެކްޓިންގ ޗީފް އެގްޒެކެޓިވް އޮފިސަރ ސުޖާތާ ހަލީމް
ސުޖާދާ ވިދާޅުވީ، ހުރިހާ ޤައުމަކަށް ބަލާލި ނަމަވެސް ޕެންޝަން ފަންޑަކީ ދިގު މުއްދަތަކަށް އިންވެސްޓް ކުރެވިގެން ފައިސާ ދޫކުރެވޭ ނިޒާމެއް ކަމަށެވެ. އަދި ދިވެހިރާއްޖޭގައި ޕެންޝަން ފަންޑެއް އެކުލަވާލެވިގެން އައީ މީގެ 11 އަހަރު ކުރިންކަން ފާހަގަ ކުރައްވައި ސުޖާތާ ވިދާޅުވީ، ޕެންޝަން ފައިސާގެ ގޮތުގައި ލިބޭ މިންވަރެއް ބިނާވެގެން ދަނީ އެމީހަކު ޖަމާކުރާ ފައިސާ އާއި މުއްދަތުގެ މައްޗަށް ކަމަށެވެ.
ކޮވިޑް-19ގެ މި ދަނޑިވަޅުގައި ޕެންޝަން ފަންޑުގައި ހުރި ފައިސާތައް ދިނުމަށް ބައެއް މީހުން ގޮވާލަމުން ދާއިރު، އެކަމާ ގުޅިގެން ނޭޝަނަލް އިމަރޖެންސީ އޮޕަރޭޝަން ސެންޓަރުގައި ބޭއްވި ނޫސްވެރިންގެ ބައްދަލުވުމެއްގައި އިކޮނޮމިކް މިނިސްޓް ފައްޔާޒު ވަނީ ޕެންޝަން ފަންޑުގައި އަތްލާ ހިސާބަށް ދިޔަ ކަމަކަށް ގަބޫލު ނުކުރައްވާ ކަމަށް ވިދާޅުވެފަ އެވެ.
