އަމިއްލަ މަސައްކަތް ކުރާ ފަރާތްތަކުގެ ތެރެއިން އިންކަމް ސަޕޯޓް އެލަވަންސް ލިބޭނީ މިއަހަރުގެ މާރޗް މަހުގެ ކުރިއަށް 6 މަސް ވަންދެން އާމްދަނީ ހޯދަމުންދިޔަ ފަރަތްތަކަށް ކަމަށް ސަރުކާރުން ބުނެފިއެވެ.

ދިވެހި ސަރުކާރުގެ ގެޒެޓުގައި އާންމުކޮށްފައިވާ، އިންކަމް ސަޕޯޓް އެލަވަންސް ދިނުމާއި ގުޅޭ އުސޫލުގައި ވާގޮތުން، މި އެލަވަންސް ދިނުމަށް ހަމަޖެހިފައި ވަނީ 1 މާރޗް 2020ގެ ފަހުން ވަޒީފާއިން ވަކިކޮށް ނުވަތަ ސަސްޕެންޑް ކޮށްފައިވާ ފަރާތްތަކަށާއި، މުސާރަ ނުލިބޭ ގޮތަށް ޗުއްޓީ (ނޯޕޭ ލީވް) އަށް ފޮނުވާފައިވާ ފަރާތްތަކާއި މުސާރައިގެ ގޮތުގައި ލިބޭ އަދަދުން ބައެއް އުނިކޮށްފައިވާ ފަރާތްތަކަށެވެ.

އަމިއްލަ މަސައްކަތްކުރާ ފަރާތްތައް ކަމަށް ބުނެފައި އެވަނީ، މިނިވަން ކޮންޓްރެކްޓަރުންނާއި، ވިޔަފާރި އުސޫލުން މަސައްކަތްކުރާ ފަންނާނުންނާއި، އާމްދަނީއެއް ހޯދުމުގެ ގޮތުން އަގު ލިބޭގޮތަށް މަސައްކަތްކުރާ އެނޫންވެސް ފަރާތްތައް ހިމެނޭގޮތުންނެވެ.

އެގޮތުން މި އުސޫލުގައި އަމިއްލަ މަސައްކަތް ކުރާ ފަރާތްތަކުގެ ތެރެއިން އިންކަމް ސަޕޯޓް އެލަވަންސް ލިބޭނީ 1 މާރޗް 2020 އާ ހަމައަށް މަދުވެގެން 6 މަސްދުވަހުގެ މުއްދަތަށް އަމިއްލަ މަސައްކަތުން އާމްދަނީ ހޯދަމުން އައިސްފައިވާ ފަރާތްތަކަށް ކަމަށް ޝަރުތުގެ ތެރޭގައި ހިމެނެއެވެ. އެހެންކަމުން އެ ފަރާތްތަކަކީ 1 ސެޕްޓެމްބަރު 2019 އިން ފެށިގެން އަމިއްލައަށް މަސައްކަތް ކޮށް އާމްދަނީ ހޯދަމުންއައި މީހަކަށް ވާންޖެހެއެވެ.

މީގެ އިތުރުން ދިވެހި ރައްޔިތަކަށް ވުމާއެކު، ދިވެހިރާއްޖޭގައި ދިރިއުޅޭ ފަރާތެއް ކަމުގައި ވުމާއި، 18 އަހަރާއި 65 އަހަރާއި ދެމެދުގެ ފަރާތަކަށްވުން އަދި ވަޒީފާއެއްގައި ހުރި ފަރާތެއް ކަމުގައި ނުވުން ޝަރުތުތަކުގެ ތެރޭގައި ހިމެނެއެވެ.

އެލަވަންސް ދޭ ގޮތަކީ 1 މާރޗް 2020 ގެ ފަހުން އާމްދަނީ ލިބުން މެދުކެނޑިފައިވާ ފަރާތެއްނަމަ، މަހަކު 5000 ރުފިޔާ ނުވަތަ 1 މާރޗް 2020 ގެ ފަހުން އާމްދަނީގެ ގޮތުގައި ލިބެމުންއައި އަދަދު މަދުވެފައިވާ ފަރާތެއް ނަމަ، އަދި އެ ފަރާތަށް އާމްދަނީގެ ގޮތުގައި ލިބޭ އަދަދަކީ، 5000 ރުފިޔާއަށްވުރެ ދަށް އަދަދެއްނަމަ، 5000 ރުފިޔާއިން އުނިކުރުމުން ޖެހޭ އަދަދެވެ.

މީގެ އިރުރުން އެލަވަންސް ދިނުމުގައި، ހުށަހަޅާފައިވާ ފަރާތަކީ އެހެން އާމްދަނީއެއް ލިބޭ ފަރާތެއް ނަމަ، އެފަދައިން ލިބޭ އިތުރު އާމްދަނީން މަހެއްގެ މައްޗަށް ލިބޭ އަދަދަކީ 5000 ރުފިޔާއަށް ވުރެ ދަށް އަދަދެއް ނަމަ، ފަސްހާސް ރުފިޔާ އިން އެ އަދަދު އުނިކުރުމުން ބާކީ އޮންނަ އަދަދާ އެއްވަރުގެ އަދަދެއް، އެ ފަރާތަކަށް ފޯރުކޮށްދެވޭނެއެވެ.

މީގެ އިތުރުން އެލަވަންސް ދިނުމުގައި، ހުށަހަޅައިފައިވާ ފަރާތަކީ އެހެން އާމްދަނީއެއް ލިބޭ ފަރާތެއް ނަމަ، އެފަދައިން ލިބޭ އިތުރު އާމްދަނީން މަހެއްގެ މައްޗަށް ލިބޭ އަދަދަކީ ފަސްހާސް ނުވަތަ އެއަށްވުރެ މަތީ އަދަދެއް ނަމަ، އެ ފަރާތަކީ، މި އުސޫލުގެ ދަށުން ދެވޭ އެލަވަންސަށް ޝަރުޠު ފުރިހަމަވާ ފަރާތެއް ކަމުގައެއް ނުބެލެވޭނެ ކަމަށް ވަނީ ބުނެފައެވެ.

އެލަވަންސަށް އެދި ހުށަހަޅާ އިރު އަމިއްލަ މަސައްކަތް ކުރާ ފަރާތެއް ނަމަ، އެފަދަ ފަރާތެއްކަން ކަށަވަރުކޮށްދޭނެ ލިޔުމެއް (މަސައްކަތް ކުރުމުގެ ހުއްދައިގެ ކޮޕީ ނުވަތަ މަސައްކަތް ހަ ވާލުކުރާ އެއްބަސްވުމުގެ ކޮޕީ) އަދި އަމިއްލަ މަސައްކަތް ކުރާ ފަރާތެއްނަމަ، ވޭތުވެދިޔަ 6 މަސްދުވަހުގެ ތެރޭގައި ކޮށްފައިވާ މަސައްކަތަށް އަގު ކުރެވިފައިވާ އިންވޮއިސްތަކުގެ ކޮޕީ ހުށަހަޅަން ޖެހެއެވެ.

މި އެލަވަންސް ދެވޭނީ، 3 މަސްދުވަހުގެ މުއްދަތަކަށް، މި އަހަރުގެ އެޕްރީލް މަހާއި، މެއި މަހާއި، ޖޫން މަހަށް ދެވޭ އެލަވަންސެއްގެ ގޮތުގައެވެ. އަދި ކޮންމެ މަހެއްގެ އެލަވަންސް ދެވޭނީ، ވިދިގެން އަންނަ މަހުގެ 15 ވަނަ ދުވަހުގެ ކުރިންނެވެ.