ރަށްރަށުން މާލެ އައިސް ތިބި މީހުންގެ ތެރެއިން ޞިއްޙީ ބޭނުމަށް މާލެ އައިސް އެނބުރި ރަށަށް ދާން ބޭނުންވާ 1400ށް ވުރެ ގިނަ މީހުން އެބަތިބިކަމަށް ލޯކަލް ގަވަރމަންޓް އޮތޯރިތީ (އެލްޖީއޭ)އިން ބުނެފިއެވެ.

އަންގާރަ ދުވަހު ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި ވާހަކަ ދައްކަވަމުން އެލްޖީއޭގެ ޑިރެކްޓަރ ޖެނެރަލް އާދަމް ޝަރީފް ވިދާޅުވީ، ޞިއްޙީ ބޭނުމަށް މާލެ އައި 1400ށް ވުރެ ގިނަ މީހުންނާއި ރިސޯޓުތަކުން އައިސް މާލޭގައި ތާށިވި 363 މީހެއްގެ މަޢުލޫމާތު ލިބިފައިވާ ކަމަށެވެ. އެގޮތުން ޞިއްޙީ ބޭނުމަށް މާލެ އައިސް ރަށަށް ނުދެވިފައި ތިބި 1444 މީހުން ނަން ނޯޓު ކޮށްފައިވާކަމަށް އޭނާ ވިދާޅުވިއެވެ.

އާދަމް ޝަރީފް ވިދާޅުވީ، ނަން ނޯޓުކޮށްފައިވާ މީހުންގެ މަޢުލޫމާތު ވެރިފައިކޮށް ޔަޤީން ކުރުމުގެ މަސައްކަތް މިހާރު ކުރަމުންދާ ކަމަށާއި، ރަށްރަށަށް ފޮނުވުމުގައި ޢަމަލު ކުރަމުންދަނީ އެކަމަށްޓަކައި އެކުލަވާލި މިންގަނޑުގެ ތެރެއިން ކަމަށެވެ.

އޭގެ އިތުރުން، މާލޭގައި ތާށިވެފައި ތިބި މީހުންނާއި ގުޅޭގޮތުން އެކިއެކި އެޖެންސީތަކުން ލިބިފައިވާ ލިސްޓު އެއްކުރުމުގެ މަސައްކަތް އެލްޖީއޭއިން ކުރަމުންދާއިރު، މިހާތަނަށް 5000ށް ވުރެ ގިނަ ޝަކުވާ ލިބިފައިވާ ކަން އޭނާ ފާހަގަކުރެއްވިއެވެ. އޭގެ ތެރޭގައި މާލޭގައި ދިރިއުޅޭ މީހުންނާއި، ވަޒީފާ ގެއްލިފައި ތިބި މީހުންވެސް ހިމެނޭކަމަށް ޝަރީފް ވިދާޅުވި އެވެ.

އެލްޖީއޭއިން އެހެން ބުނެފައިވާއިރު، ކަރަންޓީން ފެސިލިޓީތަކުގެ ގޮތުގައި ރަށްރަށުގައި ޤާއިމު ކުރެވިފައިވާ ފެސިލިޓީތައް ބޭނުންކުރުން ވަގުތީ ގޮތުން މެދުކަނޑާލާފައިވާ ކަމަށާއި، އިތުރު ގޮތެއް ނިންމަންދެން ކުރިއަށް އޮތް ދުވަސްތަކުގައި ބޭނުންކުރާނީ ހަމައެކަނި "ޓްރާންސިޓް" ކަރަންޓީން ފެސިލިޓީތައް ކަމަށް ޓޫރިޒަމް މިނިސްޓަރ އަލީ ވަޙީދު ވެސް ވިދާޅުވެފައި ވެއެވެ.

އަދި މިހާރު ޓްރާންސިޓް ކަރަންޓީން ފެސިލިޓީތަކަށް ނަގާފައި ހުރި ރިސޯޓުތަކުގެ ޖާގަ ހުރި ވަރަކުން އެތަންތަނަށް ގެންގޮސް 14 ދުވަހުގެ ކަރަންޓީން މުއްދަތު ފުރިހަމަ ކުރުމަށްފަހު، ޓެސްޓު ހެދުމަށްފަހު މެނުވީ ރަށަށް ނުދެވޭނެކަން ސަރުކާރުން މީގެ ކުރިން ހާމަކޮށްފައިވެއެވެ.