ވައިގެ މަގުން ދިވެހިރާއްޖެއަށް އެތެރެކޮށްފައިވާ މުދަލުގެ ތެރެއިން، ވެރިފަރާތުން ހަވާލުނުވެ ގިނަ ދުވަސް ވުމުގެ ސަބަބުން ނައްތާލުމަށް ކަނޑައެޅުނު މުދާ ތަކުގެ ތެރޭގައި ހިމެނޭ ޕެކޭޖެއްގެ ތެރެއިން މަސްތުވާތަކެތި ފެނިއްޖެއެވެ.

ކަސްޓަމްސް އިން ބުނީ މިތަކެތި ފެނިފައިވަނީ، ނައްތާލުމަށްޓަކައި ކާގޯ ގުދަނުން އެ މުދާތައް ނެރުނު މަރުޙަލާގައި މި މަހުގެ 2 ވަނަ ދުވަހު ބަލާފާސްކުރުމުގެ ތެރޭގައި ކަމަށެވެ. އަދި ކަސްޓަމްސްއިން މި ތަކެތި ތަހުލީލު ކުރިއިރު މަސްތުވާތަކެތީގެ ބާވަތެއްކަމަށްވާ "ކެނެބިސް" އަށް ޕޮޒިޓިވް ވެފައިވާ ކަމަށް ކަސްޓަމްސްއިން ބުނެއެވެ.

ކަސްޓަމްސްއިން ބުނީ މި ތަކެތީގެ ބަރުދަނުގައި ޕެކިންގ އާއެކު 542 ގްރާމު ހުރިއިރު، މިތަކެތީގެ މަގުމަތީ އަގު ގާތްގަޑަކަށް 433,600 (ހަތަރު ލައްކަ ތިރީސް ތިން ހާސް ހަސަތޭކަ) ރުފިޔާއަށް އަރާނެކަމަށް ބެލެވޭ ކަމަށެވެ.

މި މައްސަލަ ތަޙުޤީޤުކުރުމަށްޓަކައި، މަސްތުވާތަކެތި މޯލްޑިވްސް ޕޮލިސް ސަރވިސްއާ ޙަވާލުކޮށްފައިވާ ކަމަށް ކަސްޓަމްސްއިން ބުނެއެވެ.