ކޮވިޑް-19 ފެތުރުން ކޮންޓްރޯލް ކުރުމަށް އެކި ތަންތަނުގައި ކަރަންޓީންކުރެވޭ މީހުންގެ ފަރާތުން މުޖުތަމަޢަށް ނުރައްކަލެއް ވާނަމަ ރަށްރަށުގެ ޓާސްކްފޯހުން އެކަން ބަލައި އެކަމާ ފިޔަވަޅުއަޅަން ޖެހޭނެކަމަށް ކޮވިޑް-19 ޓާސްކްފޯހުން ބުނެފިއެވެ.
ހޯމަ ދުވަހުގެރޭ ނޭޝަނަލް އިމަރޖެންސީ އޮޕަރޭޝަންސް ސެންޓަރ (އެންއީއޯސީ)ގައި ބޭއްވި ނޫސްވެރިންގެ ބައްދަލުވުމުގައި ވާހަކަދައްކަވަމުން ކޮވިޑް-19 ޓާސްކްފޯހުގެ ތަރުޖަމާނު މަބްރޫކު އަޒީޒް ވިދާޅުވީ، ކަރަންޓީންގައި ހުންނަ މީހުން ރަށުތެރޭގައި އުޅުމާއި، އެކަންކަމާއި ގުޅިގެން އަންނަ ރިޕޯޓުތަކަށް ރަށްރަށުގެ ޓާސްކްފޯސްތަކުން ފިޔަވަޅު އަޅަންޖެހޭ ކަމަށެވެ. އެގޮތުން ޓާސްކްފޯސްތަކުން އެކަންކަން ބަލަހައްޓައި މޮނިޓަރ ކުރެވެން ޖެހޭނެކަން ފާހަގަކުރައްވައި މަބްރޫކު ވިދާޅުވީ، ކަރަންޓީނުގައި ހުންނަ މީހަކީ ޢާންމު މުޖުތަމަޢަށް ހުރި ނުރައްކަލެއްކަމަށް ވާނަމަ އެމީހަކާ ދޭތެރޭގައި ފިޔަވަޅު އެޅެންޖެހޭނެ ކަމަށެވެ.
މަބްރޫކު ވިދާޅުވީ، ގޭގައި ކަރަންޓީން ކުރުމަކީވެސް ކުރަންޖެހޭ ކަމެއް ކަމަށާއި، ވަކި ތަނަކަށް ގެންގޮސް ނުވަތަ ވަކި ކަރަންޓީން ފެސިލިޓީއަކަށް އެންމެން ގެންދިއުމަކީ އެއްވެސް ޤައުމެއްގައި އެކަން ކުރާ ގޮތެއް ނޫން ކަމަށެވެ. އެގޮތުން ގޭގައި ކަރަންޓީން ކުރުމަކީ ކުރަންޖެހޭ ކަމެއްކަން ފާހަގަކުރައްވައި މަބްރޫކު ވިދާޅުވީ، އެކަން މޮނިޓަރ ކުރުމުގައި ސަރުކާރުން އިތުރަށް ބަލަންޖެހޭ ކަންކަންވެސް ހުންނާނެކަމަށެވެ.
އޭގެ އިތުރުން، މާލެއިން އެނބުރި ރަށްރަށަށް ދާ ހުރިހާ ފަރާތަކުންވެސް ކަރަންޓީނުގެ މުއްދަތު ފުރިހަމަކުރަން ޖެހޭނެކަމަށާއި، ބަލީގެ ޢަލާމާތެއް ފެނިއްޖެނަމަ ޓެސްޓް ކުރެވި ޕޮޒިޓިވްވެއްޖެނަމަ އައިސޮލޭޓް ކުރެވޭނެ އިންތިޒާމުތައް ހަމަޖައްސާނެކަން މަބްރޫކު ފާހަގަކުރެއްވިއެވެ.
ކުރިއަށް އޮތްތަނުގައި ކޮވިޑް-19އަށް ޕޮޒިޓިވްވާ މީހުން ގިނަވެ، ކޮންޓެކްޓްތައް ގިނަވާ ކަމަށްވާނަމަ ހޯމް ކަރަންޓީނަށް ދާން ޖެހޭނެކަން އެންއީއޯސީން މީގެ ކުރިންވެސް ފާހަގަކޮށްފައިވެއެވެ. އަދި އެފަދަ ޙާލަތަކަށް ރައްޔިތުން ތައްޔާރުވެ ތިބުމަށް ޑޮކްޓަރުންވެސް ވަނީ އެދިފައެވެ.
