އަވައްޓެރި އިންޑިއާ ރައްޔިތުންގެ ތެރެއިން ރާއްޖޭގައި މިވަގުތު ތާށިވެފައި ތިބި މީހުން ބަލައި އެ ޤައުމުގެ ކަނޑުގެ ސިފައިންގެ ބޯޓެއް އައުމަށް ހަމަޖެހިއްޖެއެވެ.

ރާއްޖޭގައި ހުންނަ އިންޑިއަން ހައިކޮމިޝަނުގެ އޮފީހުން ހޯމަ ދުވަހު ކުރި ޓްވީޓެއްގައި ބުނީ، ރާއްޖޭގައި ތިބި އިންޑިއާ ރައްޔިތުން އަނބުރާ އެ ޤައުމަށް ގެންދިއުމުގެ މަސައްކަތް ފަށާފައިވާ ކަމަށާއި، އެ މަސައްކަތުގެ ދަށުން ފުރަތަމަ ދަތުރު 8 މޭގައި ކުރުމަށް ހަމަޖެހިފައިވާ ކަމަށެވެ. އެގޮތުން 8 މޭގައި އިންޑިއާގެ ކަނޑުގެ ސިފައިންގެ ބޯޓެއް ރާއްޖެ އައުމަށް ތާވަލުކޮށްފައިވާއިރު، ފުރަތަމަ ބުރުގައި 700 މީހުންނަށް ޖާގަ ލިބިގެންދާނެކަމަށް ބުނެފައިވެއެވެ.

އެ ކޮމިޝަނުން ބުނީ، ރާއްޖޭގައި އުޅެމުންދާ އިންޑިއާ ރައްޔިތުންނާ އެކަމުގެ މުއާމަލާތްތައް މިހާރު ކުރެވެމުންދާ ކަމަށާއި، ޚާއްސަކޮށް ޒަރޫރީ ސަބަބުތަކަށްޓަކައި ޤައުމަށް އެނބުރި ދާން ޖެހޭ މީހުންގެ މައުލޫމާތު ހޯދަމުންދާ ކަމަށެވެ.

އެގޮތުން ބޭސްފަރުވާއާއި، ވިހެއުމާއި، ފަތުރުވެރިންގެ ތެރެއިން ތާށިވެފައި ތިބި މީހުންނާއި، ވަޒީފާ ގެއްލިފައިވާ މަސައްކަތު މީހުންގެ މައުލޫމާތު ކޮމިޝަނުން ދަނީ އެއްކުރަމުންނެވެ.

އިންޑިއާ ސަރުކާރުން ދަނީ ކޮވިޑް-19 އާ ގުޅިގެން އެކި ޤައުމުތަކުގައި ތާށިވެފައި ތިބި އެ ޤައުމުގެ ރައްޔިތުން އަނބުރާ ޤައުމަށް ގެންދިއުމުގެ މަސައްކަތް ކުރަމުންނެވެ.