ރާއްޖެއިން ކޮވިޑް-19އަށް ޕޮޒިޓިވްވި މީހުންގެ ތެރޭގައި ފެނަކަ ކޯޕަރޭޝަންގެ މުވައްޒަފެއްވެސް ހިމެނޭކަމަށް އެ ކުންފުނިން ބުނެފިއެވެ.

ހުކުރު ދުވަހުގެރޭ ރާއްޖެޓީވީގެ ކޮވިޑް-19 ކަވަރޭޖަށް ދެއްވި ޚާއްސަ އިންޓަވިއުއެއްގައި ފެނަކައިގެ މެނޭޖިންގ ޑިރެކްޓަރ އަހުމަދު ސައީދު ވިދާޅުވީ، ފެނަކައިގެ މުވައްޒަފަކުވެސް ކޮވިޑް-19 އަށް ޕޮޒިޓިވްވެފައިވާ ކަމަށާއި، އޭނާ މިހާރު ހުރީ ފަރުކޮޅުފުށި އައިސޮލޭޝަންގައި ކަމަށެވެ. އަދި އޭނާގެ ޙާލުވެސް ރަނގަޅުކަމަށް ސައީދު ވިދާޅުވިއެވެ.

ސައީދު ވިދާޅުވީ، ކޮވިޑް-19 އާ ގުޅިގެން ކުރަމުންދާ މަސައްކަތްތަކުގައި ފެނަކައިގެ ގިނަ މުވައްޒަފުންތަކެއް ފްރަންޓްލައިންގައި މަސައްކަތް ކުރަމުންދާ ކަމަށާއި، ގާތްގަނޑަކަށް 350 މުވައްޒަފުން މިހާރުވެސް ފްރަންޓްލައިންގައި ހަރަކާތްތެރި ވަމުންދާކަމަށެވެ. އެގޮތުން މުވައްޒަފުންގެ ސަލާމަތާއި ރައްކާތެރިކަން ކަށަވަރު ކުރުމަށް ކުންފުނިން ޚާއްސަ އިސްކަމެއްދޭނެ ކަން ފާހަގަކުރައްވައި ސައީދު އިތުރަށް ވިދާޅުވީ، ފެނަކައިގެ އަމާޒަކީވެސް ލޮކްޑައުންއާ ގުޅިގެން ރައްޔިތުންނަށް ދެމުންގެންދާ އެއްވެސް ޚިދުމަތަކަށް ބުރޫ ނާރާނެ ގޮތަށް އިންތިޒާމްތައް ހަމަޖެއްސުންކަމަށެވެ.

ފެނަކައިގެ މުވައްޒަފުންގެ ސަލާމަތާއި ރައްކާތެރިކަމަށް އެ ކުންފުނިން ގިނަ މަސައްކަތްތަކެއް ކުރަމުންދާއިރު، ފެނާއި، ކަރަންޓު ބިލުތަކަށް ރީޑިންގ ނެގުމަށް ގޭގެއަށް ދިޔުމަކީ ރައްޔިތުންނަށާއި އެ ކުންފުނީގެ މުވައްޒަފުންނަށްވެސް އެންމެ ރައްކާތެރި ގޮތްކަމަށް ނުފެންނާތީ މީޓަރ ނަންބަރު ފެންނަގޮތައް ފޮޓޯ އަދި ގޭގެ ނަމާއެކު ވައިބަރ މެދުވެރިކޮށް ފޮނުވާގޮތަށްވެސް ފެނަކައިން ވަނީ ހަމަޖައްސާފައެވެ.

އޭގެ އިތުރުން، މުވައްޒަފުންނަށް ބޭނުންވާ ރައްކާތެރިކަމުގެ އާލަތްތައްވެސް ބޭނުންވާވަރަށް ހުންނާނެކަން ސައީދު ފާހަގަ ކުރައްވާފައިވެއެވެ.