ޔުނައިޓެޑް އަރަބް އެމިރޭޓްސްގައި ކޮވިޑް-19 ފެތުރެމުންދާތީ ސަލާމަތާއި ރައްކާތެރިކަމުގެ ފިޔަަވަޅެއްގެ ގޮތުން އޮންލައިން މެދުވެރިކޮށް ކައިވެނީގެ ކަންކަން ކުރުމުގެ އިންތިޒާމުތައް އެޤައުމުގެ ސަރުކާރުން ހަމަޖައްސައިދީފިއެވެ.

ޔޫއޭއީ ސަރުކާރުގެ މިނިންމުމާއި ގުޅިގެން، އެޤައުމުގެ ޖަސްޓިސް މިނިސްޓްރީން މިހާރުވަނީ ކައިވެންޏަށް ޚާއްޞަ ވެބްސައިޓެއް ލޯންޗުކޮށް، އޭގެ ޒަރީއާއިން ކައިވެންޏާއި ބެހޭ ހުރިހައި މުއާމަލާތެއް ކުރެވޭނެ އިންތިޒާމު ހަނަޖައްސާފައެވެ. އެގޮތުން ކައިވެނި ކުރުމަށް ބޭނުންވާ ދެ މީހުންނާއި، ހެކިވެރިންނާއި ބަލަދުވެރިންގެ ލިޔެކިޔުންތަކާއި، އަދި ކައިވެންޏަށް ބޭނުންވާ އެހެނިހެން ލިޔެކިޔުންތައްވެސް މި ވެބްސައިޓް މެދުވެރިކޮށް އާއިލާއާއި ކޯޓުތަކާއި ދެމެދު ބަދަލުކުރެވޭނެގޮތް ވަނީ ހަމަޖެހިފައެވެ.

ޔޫއޭއީ ސަރުކާރުން ފެށި މި އާ ޚިދުމަތުގެ ތެރެއިން ކައިވެިނ ކުރަން ބޭނުންވާ ދެފަރާތައް ސަރުކާރުގެ ހުއްދަ އޮންނަ ރެޖިސްޓްރަރ އަކުން ބޭނުން ޤާޟީއަކު އިޚުތިޔާރުކުރުމުގެ ފުރުޞަތު އޮވެއެވެ. އަދި ކައިވެނީގެ ހުރިހައި ލިޔެކިޔުމެއް ހަމަވުމުން، އެމީހުން ބޭނުންވާ ތާރީޚަކަށް ކައިވެނީގެ ވަލީމާ ބޭއްވުމުގެ އިޚުތިޔާރު ކުރެވެއެވެ. އަދި އިޚުތިޔާރު ކުރާ ތާރީޚެއްގައި ވާރޗުއަލް ވީޑީއޯ ކޮންފަރެންސްފެ ޒަރީއާއިން ގޭގައި ތިބެގެން ކައިވެނިކޮށްދިނުމުގެ ހަފުލާ ކުރިޔަށްގެންދެވޭނެއެވެ. ގާޟީ ކައިވެނިކުރުމުގެ ކުރިން ކައިވެނީގެ ސެޓިފިކެޓްގައި ސޮއިކުރުވާ އީމެއިލްގެ ޒަރީއާއިން އެދެމަފިރިންނަށް ފޮނުވާގޮތައްވެސް ވަނީ ހަމަޖައްސާފައެވެ. އެހެންކަމުން ކައިވެނީގެ ހަފުލާތެރެއިން އެމީހުންނަށް ކައިވެނީގެ ސެޓިފިކެޓް ލިބޭނެއެވެ.

"ޑިޖިޓަލް ވެޑިންގ ސަރވިސް" ގެ ޚިދުމަތް ޔޫއޭއީން މިފެށީ، އާންމު ޞިއްހަތުގެ ރައްކާތެރިކަމަށާއި، ޤާނޫނީ ޚިދުމަތްތަކައް ލުއިފަސޭހަގޮތެއްގައި އާންމުންނަށް ލިބޭނެ އިންތިޒާމު ހަމަޖައްސައިދިނުމުގެ ގޮތުންނެވެ. މި ޚިދުމަތުގެ ތެރެއިން އެޤައުުމުގެ ކޮންމެ ޞަރަޙައްދެގައި ހުރި މީހަކަށްވެސް ކައިވެނި ކުރުމުގެ ފުރުޞަތު ފަހިވެގެންދާނެއެވެ.

ޔޫއޭއީން މިހާތަނަށް 4,521 މީހަކަށް ކޮވިޑް-19 ޖެހިފައިވެއެވެ. އަދި ފަރުވާދީގެން 852 ރަނަގޅުކުރެވިފައިވާ އިރު 25 މީހުން ވަނީ މަރުވެފައެވެ. މިހާރުވެސް 3,644 މީހަކަށް ދަނީ ފަރުވާ ދެމުންނެވެ.