ކޮވިޑް-19އާ ގުޅިގެން ތުރުކީގެ އިންޓީރިއާ މިނިސްޓަރު ސުލައިމާން ސޮއިލޫ އިސްތިއުފާ ދެއްވައިފި އެވެ.
ސުލައިމާންގެ އިސްތިޢުފާ ސިޓީގައި ވަނީ ތުރުކީގެ ރައީސް އަދި ރައްޔިތުންގެ ކިބައިން މާފަށް އެދިވަޑައިގެންފަ އެވެ.
ރިޕޯޓުތައް ބުނާ ގޮތުން ސުލައިމާން އިސްތިޢުފާ ދެއްވާފައިވަނީ ކޮވިޑް-19އާ ގުޅިގެން އެ ޤައުމު ލޮކްޑައުން ކުރިތާ ދެވަނައަށްވީ ދުވަހު އެވެ. އެގޮތުން ލޮކްޑައުން ކުރުމަށް ނިންމުމަށްފަހު ބޭރުތެރޭގައި އުޅުމަށް ރައްޔިތުންނަށް ލިބުނީ އެންމެ ދެގަޑިއިރެވެ. އެއާއެކު ފިހާރަތަކާއި ބާޒާރުތައް ތޮއްޖެހިގެން ދިޔައިރު އެތައްބައެއް ފާޑުކިޔުން އިންޓީރިއާ މިނިސްޓްރީގެ މިނިންމުމަށް ޢަމާޒުވެގެން ދިޔައެވެ.
ގޭގެއަށް ބޭނުންވާ ޒަރޫރީ ތަކެތި ގަންނަން އެފަދަ ކުޑަ ވަގުތުކޮޅެއް ލިބުމުން އިޖްތިމާޢީ ގައިދުރުކަން ފަދަ މުހިންމު ކަންކަމަށް އަޅާލުން ކުޑަވުމާ ގުޅިގެން ވެސް ގިނަ ބައެއްގެ ފާޑު ކިޔުން މިނިސްޓްރީއަށް ޢަމާޒުވިއެވެ.
އެކަންކަމާ ގުޅިގެން އާދިއްތަ ދުވަހު ސުލައިމާން އިސްތިޢުފާ ދެއްވާފައިވާއިރު އޭނާ ވަނީ މިނިންމުންތަކުގެ ސަބަބުން ކުރިމަތިވި ނުރަނގަޅު ނަތީޖާތަކުގެ ޒިންމާ ނަންގަވާ ކަމަށް ވިދާޅުވެ މާފަށް އެދިވަޑައިގެންފައެވެ.
