ވެރިކަން ކުރާ ޕީޕަލްސް ނެޝަނަލް ކޮންގްރެސް (ޕީއެންސީ) އިން ބޭނުންވަނީ ރައްޔިތުންނަށް ބިރުދައްކައި ބޭނުންކަމެއް މުވައްސަސާތައް މެދުވެރިކޮށް ކުރެވޭނެކަން ދައްކަން ކަމަށް އެމްޑީޕީގެ ޗެއަރ ޕާސަން ފައްޔާޒް އިސްމާއިލް ވިދާޅުވެއްޖެއެވެ.
ވައިކަރަދޫ ދާއިރާގެ އެމްޑީޕީ މެމްބަރު ހުސައިން ޒިޔާދުގެ ނަމުގައި ހުށަހެޅި ވަގު ފޯމުގެ ކޮޕީއެއް ހޯދުމަށް ހޯމަ ދުވަހުގެ މެންދުރު އިލެކްޝަންސް ކޮމިޝަނަށް ވަޑައިގެން ބައްދަލުވުމަށްފަހު ރާއްޖެޓީވީއާއި ވާހަކަ ދައްކަވަމުން ފައްޔާޒް ވިދާޅުވީ ކަންބޮޑުވުން އޮތީ އިލެކްޝަންސް ކޮމިޝަންގެ އިންޓެގްރިޓީއާއި އިތުބާރާއިމެދު ސުވާލު އުފެދިފައިވާތީ ކަމަށެވެ. އޭނާ ވިދާޅުވީ މި ވާހަކަތައް ދައްކަނިކޮށް ފެނިގެންދިޔައީ އެމްޑީޕީގެ ގައުމީ މަޖިލީހުގެ މެންބަރުންގެ ޕާޓީ އޮޅުވާލައިގެން ބަދަލުކުރިތަން ކަމަށެވެ. ދެން ފެނުނީ މަޖިލިސް މެންބަރެއްގެ ޕަޓީ ބަދަލުކުރިތަން ކަމަށެވެ. ފައްޔާޒް ވިދާޅުވީ އިލެކްޝަންސް ކޮމިޝަންގެ ތެރެއަށް އެއްވެސް ބަޔަކަށް ނުފޫޒު ނުފޯރުވޭނެކަމުގެ ޔަގީންކަން ރައޔްިތުންނަށާއި، ސިޔާސީ ޕާޓީތަކަށް އިލެކްޝަންސް ކޮމިޝަނުން ދޭންޖެހޭ ކަމަށެވެ. ފައްޔާޒް ވިދާޅުވީ ކުރިމަތީގައި އޮތީ އިންތިހާބުތަކެއް ކަމަށާއި، ފެބްރުއަރީ މަހުގައި ލޯކަލް ކައުންސިލްތަކާއި ޑަބްލިއުޑީސީގެ ބައި އިލެކްޝަންތަކެއް އެބައޮތް ކަމަށާއި، 2026 ގައި ލޯކަލް ކައުންސިލްތަކުގެ އިންތިހާބު އެބައޮތް ކަމަށެވެ. މީގެ 2028 ގައި ރިޔާސީ އިންތިހާބު އަދި 2029 ގައި މަޖިލިސް އިންތިހާބު އެބައޮތް ކަމަށެވެ.
އެހެންކަމުން ޑިމޮކްރަސީގެ ދަތުރުގައި އެންމެ މުހިންމު އެއް މުއައްސަސާއަކީ އިލެކްޝަންސް ކޮމިޝަން ކަމަށާއި، ރައްޔިތުންގެ ބާރު ދެކޭގޮތް ތަންފީޒުކުރާ ފަރާތަކީ އިލެކްޝަންސް ކޮމިޝަން ކަމަށާއި، ނަމަވެސް މިއަދު ފެނިގެން މިދަނީ ރާއްޖޭގެ ސިޔާސީ ޕާޓީއަކުން ގަސްދުގައި އިލެކްޝަންސް ކޮމިޝަންގެ އިންޓެގްރިޓީ ރައްޔިތުންގެ ކުރިމަތީގައި ދުއްވާލާ، ތިމަންނާމެން ބޭނުން ގޮތަކަށް ކަންކަން ކުރެވޭނެ ކަަމަށް ރައްޔިތުންނަށް ދައްކާ ރައްޔިތުން ބިރުވެރިކަމުގެ ތެރެއަށް ވައްޓާލުން ކަމަށް ފައްޔާޒު ވިދާޅުވިއެވެ.
އެހެންނޫންނަމަ އަޅުގަނޑުމެންގެ ގައުމީ މަޖިލީހުގެ މެންބަރުންނާއި، އަޅުގަނޑުމެންގެ ރައްޔިތުންގެ މަޖިލީހުގެ މެންބަރުން ބަދަލުކުރުމުގެ ލަދުހަޔާތްކުޑަކަމެއް ނުކުރާނެ އެއްވެސް ބަޔަކު. އެހެންވީމާ އަޅުގަނޑުމެންނަށް މިއަދު މި ފެންނަނީ ރައީސުލްޖުމްހޫރިއްޔާ މުޅި ގާނޫނުއަސާސީ އެބޭފުޅާގެ އަތްޕުޅުމައްޗަށް ދަމާލައިގެން ހުރިހާ މިނިވަން މުވައްސަސާއެއްގެ މިނިވަންކަން ނަގާލައިގެން މަޖިލިސް ކުޑަކަކުލުގައި ޖައްސުވާފައި ދެން ސުޕްރީމް ކޯޓާ ދިމާލަށް ދާތަން. ވަރަށް ސާފުކޮށް މި ދަންނަވަނީ ކޮންމެ ކަމެއް ކުރަންޖެހުނަސް ކުރާނަން.އެމްޑީޕީގެ ޗެއަރ ޕާސަން ފައްޔާޒް އިސްމާއިލް
ފައްޔާޒް ވިދާޅުވީ އިދިކޮޅު ޕާޓީއެއްގެ ހައިސިއްޔަތުން އަދުލު އިންސާފު ގާއިމްކޮށް ދިވެހިންގެ މިނިވަންކަމަށް ކުރަންޖެހުނު ކޮންމެ ކަމެއް ކުރާނެ ކަމަށެވެ. އުއްމީދުކުރަނީ އިލެކްޝަންސް ކޮމިޝަނާއިއެކު ދެކެވުނު ވާހަކައިގެ ތެރެއިން، އިލެކްޝަންސް ކޮމިޝަނުގައި އޮތް ކިލަނބުކަން ނައްތާލުމަށް ވައުދުވިގޮތަށް އަދި ދިން ޔަގީންކަމާއެކީގައި މަސައްކަތް ކުރައްވާނެކަމަށް ފައްޔާޒް ވިދާޅުވިއެވެ.
ފައްޔާޒް ވިދާޅުވީ އިލެކްޝަންސް ކޮމިޝަނަށް އެމްޑީޕީން އެ ފުރުސަތު ދޭނެކަމަށާއި، އަމަލީ ސިފައެއްގައި އެކަން ނުވާނަމަ ރައްޔިތުންގެ ދިފާއުގައި ކުރަންޖެހޭ ކަންކަން އެމްޑީޕީން ނިންމާނެ ކަމަށެވެ. އަދި މިދިޔަ އަހަރުގެ އޮކްޓޯބަރުން ފެށިގެން އިލެކްޝަންސް ކޮމިޝަނަށް ހުށަހަޅާފައިވާ ފޯމްތައް ޕްރޮސެސްކުރުން މަޑުޖައްސާލަން އެދުނު ނަމަވެސް މިހާތަނަށް ވެސް އެކަން ކޮށްފައި ނުވާ ކަމަށެވެ.
އަޅުގަނޑުމެން މިއަދުވެސް އަނެއްކާވެސް އެދިފައިވާނެ މިދިޔަ އަހަރުގެ އޮކްޓޯބަރުން ފެށިގެން، މިހާރު ވެރިކަން ކުރާ ޕީއެންސީގެ 100،000 ފޯމް ފުރުމުގެ ޕްރޮޖެކްޓާއ ގުޅިގެން މިހިނގާ ވައްކަން ކުރުމުގެ މައްސަލަ އެބޭފުޅުން ތަހުގީގުކޮށް ވަކިގޮތެއް ނިމެންދެން އެ ހުށަހެޅިފައި ހުރި ފޯމްތައް ސަސްޕެންޑްކުރުމަށް. އަދި މީގައި ވަރަށް ބޮޑަށް މިއޮތީ ދައުލަތުގެ ބަޖެޓާއި ގުޅިފައި. އަޅުގަނޑަށް ފެންނަނީ ޕީއެންސީން 2 ކަމެއް ކުރާތަން. އެއްކަމަކީ ސިޔާސީ ޕާޓީތަކަށްދޭ ބަޖެޓުގެ ބޮޑުބައެއް ނުހައްގު ގޮތުގައި އޮޅުވާލައިގެން ހޯދުމަށް ކުރަމުންދާ މަސައްކަތް. ދެވަނަ ކަމަކީ ރައްޔިތުން މާޔޫސްކުރުވައި ތިމަންނަމެން ބޭނުންގޮތެއް ކޮންމެ މުވައްސަސާއެއް މެދުވެރިކޮށް ކުރާނަމޭ. އެގޮތުން އިލެކްޝަންސް ކޮމިޝަންގެ އިންޓެގްރިޓީ އާއި އިތުބާރު ރައްޔިތުން ކުރިމަތީ ގެއްލުވާލުން. މިހާތަނަށްވެސް އެމްޑީޕީގެ މަޖިލިސް މެންބަރަކު އެ ޕާޓީއަށް ވައްދައިގެން ފޯމް ހުށަހެޅި މައްސަލައިގައި އަދިވެސް އެއްޗެއް ނުބުނޭ.އެމްޑީޕީގެ ޗެއަރ ޕާސަން ފައްޔާޒް އިސްމާއިލް
ރައްޔިތުންގެ މަޖިލީހުގެ ވައިކަރަދޫ ދާއިރާގެ މެމްބަރު ހުސައިން ޒިޔާދުގެ ނަން މަތީގައި ވަގު ފޯމެއް ފުރައި ވެރިކަން ކުރާ ޕީޕަލްސް ނޭޝަނަލް ކޮންގްރެސް (ޕީއެންސީ)އަށް ވެއްދި މައްސަލަ ދިވެހިރައްޔިތުންގެ ޑިމޮކްރަޓިކް ޕާޓީ (އެމްޑީޕީ) އިން ވަނީ ކުށްވެރިކޮށްފައެވެ.
ޕީއެންސީއަށް ވަނުމަށް ފޯމު ފުރާފައި ނުވާ އެ ޕާޓީގެ ބައެއް އާންމު މެމްބަރުންނާއި ގައުމީ މަޖިލީހުގެ މެމްބަރުން ވެސް އެމްޑީޕީގެ ދަފްތަރުން އުނިކޮށް ޕީއެންސީގެ ހިމަނާފައިވާތީ އެ މައްސަލަ އިލެކްޝަންސް ކޮމިޝަނުގެ ސަމާލުކަމަށް އެކި ފަހަރު މަތިން ގެނެސްފައިވައިވެއެވެ. ނަމަވެސް މިހާތަނަށް ވެސް އިލެކްޝަންސް ކޮމިޝަނުން މިކަމުގައި އެއްވެސްގޮތަކަށް އަމަލުކޮށްފައި ނުވެއެވެ.
