ސަރުކާރުގެ ވަޒީފާއިން އަލަށް ރިޓަޔަރވާ މުވައްޒަފުންނަށް މަހުން މަހަށް ދޭން ކަނޑައަޅާފައި އޮންނަ އެލަވަންސްތައް އަންނަ އަހަރުގެ ޖެނުއަރީން ފެށިގެން ނުދޭން ނިންމާ އެކަން އޮފީސްތަކަށް އަންގައިފިއެވެ. މި ގޮތައް ނިންމީ ސަރުކާރުގެ ޚަރަދު ކުޑަކުރުމަށް އަޅަން ނިންމާފައިވާ ފިޔަވަޅެއްގެ ގޮތުން ކަމަށް ފިނޭންސް މިނިސްޓްރީން ވަނީ ބުނެފައެވެ.

މަހުންމަހަށް ދެމުން އައި ރިޓަޔަމަންޓް ޕެންޝަން ނުދޭން ސަރުކާރުން ނިންމި އިރު އުމުރުން ދުވަސްވީ މީހުންގެ އެލަވަންސް ދިނުމުގެ އުސޫލުވެސް ހަނިކުރަން ސަރުކާރުން ވަނީ ނިންމާފައެވެ.

ފިނޭންސް މިނިސްޓްރީން މިގޮތައް ނިންމިއިރު ދައުލަތުގެ މައިގަނޑު 13 އިދާރާ އަކުން ރިޓަޔަމަންޓް ޕެންޝަން ސްކީމް އަންނަނީ ހިންގަމުންނެވެ. މީގެ ތެރޭގައި، ސިވިލް ސާވިސް ކޮމިޝަން އާއި، ޖުޑިޝަލް ސާވިސް ކޮމިޝަން އާއި ޑިޕާޓްމެންޓް އޮފް ޖުޑިޝަލް އެޑްމިނިސްޓްރޭޝަން އާއި ރައްޔިތުންގެ މަޖިލީހުގެ އިދާރާ އާއި، މޯލްޑިވްސް ޕޮލިސް ސާވިސް އާއި ސިފައިންނާއި ކަސްޓަމްސް އާއި ރައީސް އޮފީސް އާއި ޕްރޮސެކިއުޓަރ ޖެނެރަލް އޮފީހުގެ އިތުރުން އެންޓިކަރަޕްޝަން ކޮމިޝަން، ގައުމީ ޔުނިވަރސިޓީ، އިލެކްޝަންސް ކޮމިޝަން، އަދި އޮޑިޓަރ ޖެނެރަލް އޮފީސް ހިމެނެއެވެ.

ފިނޭންސް މިނިސްޓަރު މޫސާ ޒަމީރު ސޮއިކުރައްވައި އިދާރާތަކަށް ފޮނުވާފައިވާ ސިޓީއެއްގައި ބަޔާންކޮށްފައިވާ ގޮތުގައި ރިޓަޔަމަންޓް ޕެންޝަން 2023 ވަނަ އަހަރުގެ ޑިސެމްބަރުގެ ފަހުން ނުލިބޭނެ އެވެ.

މި އައު އުސޫލާ އެއްގޮތަށް ރިޓަޔަމަންޓް ގަވާއިދު އިސްލާހުކުރުމަށް ކަމާބެހޭ އޮފީސްތަކަށް ޒަމީރު ފޮނުއްވި ސިޓީގައި އަންގާފައިވާކަން ފާހަގަކުރެވެއެވެ.

މިގޮތައް ސަރުކާރުން ނިންމި އިރު، 2023 ވަނަ އަހަރު ރިޓަޔަމަންޓް އެލަވަންސަށް ހޭދަކުރި 339 މިލިއަން ރުފިޔާއަށް ވުރެ ބޮޑު އަދަދެއް، 386 މިލިއަން ރުފިޔާ، 2024 ވަނަ އަހަރަށް ބަޖެޓުގައި ވަނީ ހިމަނާ ފާސްކޮށްފައެވެ.

ސަރުކާރުގެ ޚަރަދުތައް ބޮޑުވެފައިވަނީ މުސާރަ އާއި އިނާޔަތްތަކަށް ކުރަން ޖެހޭ ހޭދަ އިތުރުވެގެން ކަމަށް ބުނެ ގިނަ ފަރާތްތަކުގެ ފާޑުކިޔުން ސަރުކާރަށް އަމާޒު ވެފައިވާއިރު، އާދައިގެ ފަރުދުންނަށް ލިބޭ އިނާޔަތްތައް ކުޑަކުރުން ފިޔަވާ ސަރުކާރުގެ ޚަރަދު ކުޑަކުރަން އިތުރު ފިޔަވަޅެއް އަޅާފައި ނުވާކަން ފާހަގަ ކުރެވެއެވެ. ސިޔާސީ މަގާމުތަކުގައި ތިބި މީހުންގެ އަދަދު ސަރުކާރުން ހާމަ ކުރުމަށް ފަސް ޖެހިފައިވާއިރު، ސަރުކާރުން ގެންދަނީ ގިނަ އަދަދެއްގެ މުވައްޒަފުން ކުންފުނިތަކަށް އިތުރުކުރަމުންނެވެ.