2025 ވަނަ އަހަރުގެ ބަޖެޓް އުންމީދީ ވަނީ ހަމައެކަނި ރައީސާއި ސިޔާސީ މަޤާމުތަކުގައި ތިބި މީހުންނަށް ކަމަށް ރައްޔިތުންގެ މަޖިލީހުގެ ދިއްދޫ ދާއިރާގެ ކުރީގެ މެމްބަރު އަބްދުﷲ ވަހީދު ވިދާޅުވެއްޖެއެެވެ.
އޭނާ އެފަދައިން ވިދާޅުވީ ރާއްޖެ ޓީވީގެ ފަލަސުރުހީ ޕްރޮގްރާމްގައި ވާހަކަދައްކަވަމުންނެވެ. އޭނާ އެހެން ވިދާޅުވީ 2025 ވަނަ އަހަރުގެ ބަޖެޓަކީ އުންމީދީ ބަޖެޓެއް ކަމަށް ސަރުކާރުން ބުނާތީ އެކަމަށް ރައްދު ދެއްވައެވެ.
ކުރީގެ މެމްބަރު އަބްދުﷲ ވަހީދު ވިދާޅުވީ ރައީސް މުއިއްޒުގެ ސަރުކާރުން މަސައްކަތް ކުރަނީ ކަންކަމުގެ ހަގީގަތް ރައްޔިތުންނަށް ނޭނގޭނެ ކަމަށް ޤަބޫލުކުރައްވައިގެން ކަމަށެވެ. ސަރުކާރުގެ އަމަލުތަކާއި މެދު ވަރަށް ކަންބޮޑުވާ ކަމަށް އޭނާ ވަނީ ވިދާޅުވެފައެވެ. ވައުދުވެފައިވާ ގޮތަށް އެއްވެސް ކަމެއް ނުކުރައްވާ ކަމަށާއި ސަރުކާރުން ކަމެއް ނުކުރާނެ ކަމަށް ވިދާޅުވެއްޖެ ނަމަ އެކަމެއް އެގޮތަކަށް ކުރައްވަމުންދާ ކަމަށް އޭނާ ވަނީ ވިދާޅުވެފައެވެ. އެއް އަހަރު ނިމިގެންދާއިރު މި ބަޖެޓްގައި ހިމަނާފައިވާ މަޝްރޫޫޢުތައް ހިންގާނެ ކަމުގެ އެއްވެސް އުންމީދެއް ނެތް ކަމަށް ވެސް އޭނާ ވިދާޅުވިއެވެ. އަދި ކުރިއަށް އޮތް ބަޖެޓަކީ ވެސް ނާއުންމީދީ ބަޖެޓެއް ކަމަށް އޭނާ ވިދާޅުވިއެވެ. ރައީސް މުއިއްޒު އަމަލުކުރައްވަނީ ތިމަންނާ ނޫނީ ހަމަޖެހޭ އިތުރު އެއްވެސް މީހެއް ނެތޭ ބުނާ ބީދައިން ކަމަށް އޭނާ ވިދާޅުވިއެވެ.
ސަރުކާރުން ބުނަނީ 2025 އަކީ އުންމީދީ ބަޖެޓެކޭ. އެ ބޭފުޅުން ވިދާޅުވަނީ އުންމީދީ ބަޖެޓެކޭ. ކޮންރަށަކަށް ކޮންކަމެއްތޯ ކުރެވެނީ މި ބަޖެޓުން؟ ބަޖެޓުގައި ކޮންކަމެއްތޯ ހިމެނީ. ކޮބާތޯ އުންމީދަކީ؟ ކައުންސިލްގެ ބަޖެޓުން ރައްޔިތުންނަށް ކުރަން ހުރި ކަންކަން ވެސް ކުރެވެން ނެތް. ބްލޮކް ގްރާންޓުވެސް ކުޑަކޮށްފި. ކައުންސިލްގެ ބަޖެޓް ކަނޑާލާ މުސާރަވެސް ނުދެވޭ ވަރަށް ބަޖެޓް ކުޑަކޮށްފައި އޮތީ. މިނިސްޓަރުންނަށް ކުރާ ޚަރަދާއި ރިކަރަންޓް ޚަރަދު ބޮޑުވީ. އެއީ އުންމީދެއް ކަަމަށް ވާނަމަ އުންމީދެއް ކަމަށް ބުނެވިދާނެ. ރައީސާއި ވަޒީރުންނަށް އުންމީދީ ބަޖެޓެއް މިއީ.ދިއްދޫ ދާއިރާގެ ކުރީގެ މެމްބަރު އަބްދުﷲ ވަހީދު ވިދާޅުވެއްޖެއެެވެ.
ބަޖެޓާއި ގުޅޭގޮތުން މި މޭރުމުން އޭނާ ވާހަކަދައްކަވާފައިވާއިރު 2025 ވަނަ އަހަރުގެ ބަޖެޓުގެ މަސައްކަތްތައް މި ހިނގާ ނޮވެމްބަރު މަހުގެ 20 ވަނަ ދުވަހުގެ ކުރިން ނިންމުމަށް މަޖިލީހުގެ ބަޖެޓު ދިރާސާކުރާ ކޮމިޓީން ވަނީ ފާސްކޮށްފައެވެ.
އަންނަ އަހަރުގެ ބަޖެޓަކީ 56,647,600,859 (ފަންސާސް ހަ ބިލިޔަން، ހަސަތޭކަ ސާޅީސް ހަތް މިލިޔަން، ހަ ލައްކަ، އަށްސަތޭކަ ފަންސާސް ނުވަ) ރުފިޔާއެވެ. ބަޖެޓް ހުށަހަޅުއްވަމުން ފިނޭންސް މިނިސްޓަރު ޒަމީރު ވިދާޅުވީ ހަރަދުގެ ގޮތުގައި ހިނގާނީ 49.2 ބިލިޔަން ރުފިޔާ ކަމަށެވެ. އޭގެތެރޭގައި ހިމެނެނީ ރިކަރަންޓް ހަރަދުގެ ގޮތުގައި 35.9 ބިލިޔަން ރުފިޔާއާއި ކެޕިޓަލް ހަރަދުގެ ގޮތުގައި 13.3 ބިލިޔަން ރުފިޔާއެވެ.
މީގެ އިތުރުން އަންނަ އަހަރުގެ ބަޖެޓުގައި ޕަބްލިކް ސެކްޓަރ އިންވެސްޓްމަންޓު ޕްރޮގްރާމް، ޕީއެސްއައިޕީއަށް ހިނގާނެ ކަމަށް ލަފާކޮށްފައިވަނީ 12.4 ބިލިޔަން ރުފިޔާ ކަމަށް މިނިސްޓަރު ވިދާޅުވިއެވެ. އަދި އަންނަ އަހަރު އާމްދަނީ އާއި ހިލޭ އެހީގެ ގޮތުގައި 39.8 ބިލިއަން ރުފިޔާ ލިބޭނެ ކަމަށް ލަފާކޮށްފައިވާއިރު އަންނަ އަހަރަށް ހުށަހަޅަނީ 9.4 ބިލިއަން ރުފިޔާ ޑެފިސިޓް ބަޖެޓެކެވެ.
