ސްރީ ލަންކާގައި މިހާރު ކުރިއަށްދާ ކާވާ 20 އަހަރުން ދަށުގެ ފިރިހެން ވޮލީ ބޯޅަ މުބާރާތުގައި ދިވެހިރާއްޖެ އިން ކުޅުނު ފަހު މެޗުގައި ކިރްގިސްތާން އަތުން ވެސް ބަލިވެއްޖެ އެވެ.

ހަ ޤައުމު ވާދަކުރި މި މުބާރާތުގައި ރާއްޖެ އިން ކުޅުނު ފަސް މެޗުން ވެސް ވަނީ ބަލިވެފަ އެވެ. މުބާރާތުގައި ތުރްކެމިނިސްތާން، ސްރީ ލަންކާ، ނޭޕާލް، އުޒްބަކިސްތާން އަދި ކިރްގިސްތާނާ ދެކޮޅަށް ކުޅުނު މެޗުތަކުން ރާއްޖެ ބަލިވެފައި ވަނީ ސީދާ ތިން ސެޓުންނެވެ.

ކިރްގިސްތާނާ ދެކޮޅަށް ރާއްޖެ އިން ކުޅުނު މެޗުގައި ރާއްޖޭގެ ކުޅުންތެރިން ވަނީ ރަނގަޅު ކުޅުމެއް ދައްކައިފަ އެވެ. މެޗުގެ ފުރަތަމަ ސެޓު ކިރްގިސްތާނުން ކާމިޔާބު ކުރީ 25-15 އިންނެވެ. މެޗުގައި ރާއްޖެ އިން އެންމެ ރަނގަޅަށް ވާދަކުރީ ދެ ވަނަ ސެޓުގަ އެވެ. އެ ސެޓު ކިރްގިސްތާނުން ކާމިޔާބު ކުރީ 25-21 އިންނެވެ. އަދި ތިން ވަނަ ސެޓު އެ ޓީމުން ކާމިޔާބު ކުރީ 25-19 އިންނެވެ.

އެއާއެކު ރާއްޖެ އިން މުބާރާތް ނިންމާލަން ޖެހުނީ މެޗަކުން މޮޅެއް ނުހޯދި އެވެ.