ހއ.އަތޮޅު އިހަވަންދޫ ކައުންސިލް މެމްބަރު އަހުމަދު ރިޟްވާން ރަހީނުކޮށް އޭނާގެ އަތުން ފޭރުނު މައްސަލައިގެ ތަހުގީގު ނިންމައި ދައުވާ ކުރަން އެދި ޕީޖީ އޮފީހަށް ފޮނުވައިފިއެވެ.

އެ ޙާދިސާ ހިނގި ގޮތް އޭނާ ވަނީ ރާއްޖެއެމްވީއަށް ކިޔާދީފައެވެ. އެގޮތުން ރިޟްވާން ބުނީ، އޭނާ ދިލްބަހާރު މަގުގައި ހުރި ގެއެއްގެ ކައިރީގައި ހުއްޓައި ދެބައި އުމުރުގެ އަންހެނަކު ގޮވާލާފައި، ގޭގައި އިން ބޮތްކެއް ބަދަލު ކޮށްލުމަށް އޭނާއަށް އެހީތެރިވެ ދިނުމަށް އެދުނު ކަމަށެވެ.

އެހެންކަމުން އޭނާ އެ ގެއަށް ދިޔައެވެ. ނަމަވެސް ގެއަށް ވަދެވުމާއެކު އަންހެން މީހާ ވަނީ ގޭގެ ދޮރު ތަންޑު އަޅުވާފައެވެ. އެހިސާބުން ދެ ފިރިހެނުން ނުކުމެ، އޭނާ ބިންމައްޗަށް ވައްޓާލުމަށްފަހު އަނިޔާ ކުރަން ފެށިއެވެ. އަދި އޭނާއަށް ބިރު ދައްކައި ފޭރުމަށް މަސައްކަތް ކުރިއެވެ. އެއަށްފަހު ފޯނާއި ވޮލެޓު އަތުލައި، އޭނާގެ އެކައުންޓުން 20،000 ރުފިޔާ އެހެން އެކައުންޓަކަށް ޓްރާންސްފަރ ކޮށްފައިވެއެވެ.

އެއަށްފަހު އެމީހުން އެންގީ އޭނާގެ ކޭޝްކާޑުގެ ޕާސްވޯޑު މިކަމުގައި ހިމެނޭ އަންހެން މީހާއަށް ދިނުމަށެވެ.

ފުލުހުން ބުނީ، 2024 ޖުލައި 24 ވަނަ ދުވަހުގެ ވަގުތެއްގައި، މއ. މަސްފަން ގެއަށް ދިވެހި ފިރިހެނަކު ވައްދައި، އެމީހާއަށް ވަޅިން ބިރުދައްކައި އޮރިޔާންކޮށް، އަނިޔާކޮށް، އޭނާގެ މޯބައިލް ފޯނުއަތުލައި އޭނާގެ ބެންކު އެކައުންޓުން ފައިސާ ޓްރާންސްފަރކުރުވައި އަދި އޭނާގެ ކޭޝްކާޑު ބޭނުންކޮށްގެން އޭޓީއެމްއިން ފައިސާ ނަގާފައިވާ ކަމަށް ތުހުމަތުކުރެވޭ މައްސަލައިގެ ތަހުގީގު ނިންމައި ދައުވާކޮށްދިނުމަށް އެދި ޕްރޮސެކިއުޓަރ ޖެނެރަލްގެ އޮފީހަށް ފޮނުވާފައިވާ ކަމަށެވެ.

މައްސަލައިގެ ތަހުގީގު ނިންމައި، މއ. މަސްފަން، ޢާއިޝަތު (43އ) އާއި މއ. މަސްފަން، މުޙައްމަދު ރީހާން (27އ) އަދި ސ. ހިތަދޫ / ސޯމާ، ޝަފީޤު އިބްރާހީމް (35އ) މައްޗަށް ދައުވާކުރުމާ މެދު ގޮތެއް ނިންމައިދިނުމަށް އެދި ޕްރޮސެކިއުޓަރ ޖެނެރަލްގެ އޮފީހަށް ފޮނުވާފައިވަނީ މި ސެޕްޓެންބަރު މަހުގެ 9 ވަނަ ދުވަހުއެވެ.