ކުރީގެ ރައީސް އިބްރާހިމް މުހައްމަދު ޞާލިހުގެ ސަރުކާރުން ފެށި އައްޑޫގެ ތަރައްގީގެ މަސައްކަތާއެކު އިންވެސްޓަރުން އައްޑޫ ސިޓީއާއި މެދު ދެކޭގޮތަށް ބަދަލުވެގެންދާނެ ކަމަށް އައްޑޫ ސިޓީ މޭޔަރު އަލީ ނިޒާރު ވިދާޅުވެއްޖެއެވެ.

ރާއްޖެޓީވީގެ ފަށާއިރު ޕްރޮގްރާމުގައި ވާހަކަ ދައްކަވަމުން އައްޑޫ ސިޓީ މޭޔަރު އަލީ ނިޒާރު ވިދާޅުވީ ކުރީގެ ރައީސް އިބްރާހިމް މުހައްމަދު ޞާލިހުގެ ސަރުކާރުން އައްޑޫގެ ބަދަލަކަށް ވަރަށް ގިނަ މަސައްކަތް ކުރެއްވި ކަމަށެވެ. އައްޑޫ ރައްޔިތުންގެ ފަރާތުން އަންނަ އެންމެ ބޮޑު ޝަކުވާއަކީ އައްޑޫގެ މަގުތަކުގެ މައްސަލަ ކަމަށާއި، މާލެ ސިޓީ ފިޔަވައި ދުއްވާ އުޅަނދުތައް އެންމެ ގިނަ ތަނަކީ އައްޑޫ ސިޓީކަމަށް ވެފައި ހިނގާ މީހުންނަށް އުނދަގޫ ހާލަތެއް އޮތް ކަމަށް ނިޒާރު ވިދާޅުވިއެވެ.

އަދި މައްސަލަތަކަށް ހައްލެއް ގެނައުމަށް ސަރުކާރުން ފެށި މަސައްކަތަކީ ރައްޔިތުންގެ ޝަކުވާތަކަށް ހައްލު ގެނެވޭ ވަރުގެ މަސައްކަތެއް ކަމަށާއި، 100 ކިލޯމީޓަރުގެ ފެން ހިންދާ ނިޒާމް ގާއިމްކުރުމާއެކު، 60 ކިލޯ މީޓަރުގެ މަގު ރަނގަޅު ފެންވަރަކަށް ހަދައި، 40 ކިލޯ މީޓަރުގެ ފެން ހިންދާ ނިޒާމް ގާއިމްކުރި ހުރިހާ މަގެއްގައި ސީޓީބީ ލޭޔަރު އަދި ސިމެންތި ބޭނުންކޮށްގެން މަސައްކަތް ފެށި ކަމަށް ނިޒާރު ވިދާޅުވިއެވެ.

ނިޒާރު ވިދާޅުވީ ފަހުން ރިޔާސީ އިންތިހާބުގެ ތެރޭގައި ރައީސް ޞާލިހު ވަނީ އައްޑޫގެ މަސައްކަތް ނިންމާލައްވާނީ އައްޑޫގެ ހުރިހާ މަގުތަކެއްގެ މަސައްކަތް އެއްކޮށް ނިންމާލާފައި ކަމަށާއި، އެއީ ދެވަނަ ފޭސްގެ މަސައްކަތް ކަމަށެވެ. އެ ޕްރޮޖެކްޓްގެ ތެރެއިން 95 އިންސައްތަ މަސައްކަތް މިހާރު ނިމިފައިވާ ކަަމަށާއި، އިތުރު މަސައްކަތެއްގެ ގޮތުގައި ހަންކެނޑެ ބްރިޖުގެ މަސައްކަތް 14 މިލިއަން ޑޮލަރު ހަރަދުކޮށްގެން ކޮށްފައިވަ ކަމަށެވެ.

ނިޒާރު ވިދާޅުވީ އައްޑޫ ސިޓީގެ ޕްރޮޖެކްޓްތައް ނިމިގެންދާއިރު، އައްޑޫ ސިޓީގެ މަލަމަތި ބަދަލުވެގެންދާނެ ކަމަށެވެ. ނިޒާރު ވިދާޅުވީ މި މަސައްކަތް ކުރުމުގެ އެންމެ ބޮޑު ބޭނުމަކީ ރަނގަޅު އިގްތިސާދެއް ގެނައުން ކަމަށެވެ. ދެމިގެންދާ އިގްތިސާދެއް ގެނައުން އެންމެ މުހިންމު ބޭނުމަކަށް ވެފައިވާއިރު، އައްޑުއާއި ދޭތެރޭގައި އިންވެސްޓް ކުރަން ބޭނުންވާ ފަރާތްތަކުންވެސް ދެކޭ ދެކުމަށް ބަދަލު އަންނަނާނެ ކަމަށެވެ.

ނިޒާރު ވިދާޅުވީ ބުރިޖު ހުޅުވުން އަވަސްކޮށްދިނުމަށް ކޮންޓްރެކްޓަރު އަރިހުގައި އެދުނު ކަމަށާއި، އަދި މި މަހުގެ 20 ވަނަ ދުވަހަށް ތާރީހެއް ދިން ނަމަވެސް، މަސައްކަތްދާ ގޮތުން ހުޅުވޭނެކަމަށް ގަބޫލެއް ނުކުރައްވާ ކަމަށެވެ. ރެއިލިންގ އަދި ނުނިމޭ ކަމަށާއި، ކުރަންޖެހޭ ކުރެހުންތައް ނުނިމޭ ކަމަށާއި، ބުރިޖު ދަށުގައި ހުރި ވެލިތައް ނަގާ އޮއި ދެމޭގޮތަށް ހަދަންޖެހޭ އިރު އެކަށީގެންވާ މުއްދަތުގައި މަސައްކަތް ފެށިނަމަ ހުޅުވާ ބޭނުންކުރެވޭނެކަމަށް ގަބޫލުކުރައްވާ ކަމަށް ނިޒާރު ވިދާޅުވިއެވެ.